കൊച്ചി: ബലാത്സംഗ കേസില്‍ പ്രതിയായതിന് പിന്നാലെ ആരോപണങ്ങളില്‍ പ്രതികരിച്ച് നടന്‍ നിവിന്‍ പോളി. ഫേസ്ബുക്ക് കുറിപ്പിലൂടെയാണ് പ്രതികരണം. തനിക്കെതിരെ ഉയര്‍ന്നിരിക്കുന്നത് വ്യാജ ബലാത്സംഗ പരാതിയാണെന്ന് നിവിന്‍ പോളി പറയുന്നു.

വ്യാജ ആരോപണത്തിന് പിന്നില്‍ പ്രവര്‍ത്തിച്ചവരെ വെളിച്ചത്ത് കൊണ്ടു വരാനുള്ള നടപടികള്‍ സ്വീകരിക്കും. കേസില്‍ നിയമപരമായി നീങ്ങുമെന്നും നിരപരാധിത്വം തെളിയിക്കാന്‍ ഏതറ്റം വരെയും പോകുമെന്നും നിവിന്‍ പോളി ഫേസ്ബുക്ക് കുറിപ്പില്‍ പറഞ്ഞു. അഭിനയിക്കാന്‍ അവസരം വാഗ്ദാനം ചെയ്ത് ലൈംഗികമായി പീഡിപ്പിച്ചുവെന്ന യുവതിയുടെ പരാതിയില്‍ എറണാകുളം ഊന്നുകല്‍ പൊലീസ് ജാമ്യമില്ലാ വകുപ്പുകള്‍ പ്രകാരമാണ് നിവിന്‍ പോളിക്കെതിരെ കേസെടുത്തത്. 

വിദേശത്ത് വെച്ച് പീഡിപ്പിച്ചുവെന്നാണ് നേര്യമംഗലം ഊന്നുകല്‍ സ്വദേശിയായ യുവതിയുടെ പരാതി. നിവിന്‍ പോളിക്കൊപ്പം മറ്റു ചിലരും പീഡിപ്പിച്ചുവെന്ന് പരാതിയില്‍ പറയുന്നു. കഴിഞ്ഞ ദിവസമാണ് യുവതി പരാതി നല്‍കിയത്. കേസില്‍ നിവിന്‍ പോളി ആറാം പ്രതിയാണ്. യുവതിയുടെ പരാതി സിനിമാ രംഗത്തെ ലൈംഗികാതിക്രമ വെളിപ്പെടുത്തലുകള്‍ അന്വേഷിക്കുന്ന പ്രത്യേക സംഘത്തിന് കൈമാറുമെന്ന് പൊലീസ് വ്യക്തമാക്കി.

Malayalam actor Nivin Pauly has vehemently denied the allegations against him, asserting his innocence and stating that he will take all necessary steps to prove his innocence and clear his name.