ദുബൈ: അപ്രതീക്ഷിതമായി വാഹനത്തിൻ്റെ ക്രൂയിസ് കൺട്രോൾ തകരാറിലായ ഡ്രൈവറെ കമാൻഡ് ആൻഡ് കൺട്രോൾ സെൻ്ററുമായി ഏകോപിപ്പിച്ച് ദുബൈ പൊലിസ് ട്രാഫിക് പട്രോളിങ് സംഘം രക്ഷപ്പെടുത്തി. സ്ഥിതിഗതികൾ നിയന്ത്രിക്കാൻ കഴിയാത്തതിനാൽ അടിയന്തര സഹായം അഭ്യർഥിച്ച് ഡ്രൈവർ എമർജൻസി നമ്പറിൽ (999) വിളിക്കുകയായിരുന്നു. ഉടൻ പ്രതികരിച്ച് അദ്ദേഹത്തിന് രക്ഷയാവാൻ പൊലിസിന് സാധിച്ചു. 

ദുബൈയിലുടനീളമുള്ള ശക്തമായ സുരക്ഷാ സാന്നിധ്യം കൊണ്ടാണ് അത് സാധ്യമായതെന്ന് പൊലിസ് സാക്ഷ്യപ്പെടുത്തുന്നു. സഹായത്തിനായുള്ള ഡ്രൈവറുടെ ആഹ്വാനത്തോട് ട്രാഫിക് പട്രോളിംഗ് ഉദ്യോഗസ്ഥർ അതിവേഗമാണ് പ്രതികരിച്ചത്. നിമിഷങ്ങൾക്കകം അവർ വാഹനത്തെത്തി. അതിനു മുമ്പിൽ എത്തിയ മറ്റൊരു പട്രോളിംഗിൻ്റെ സഹായത്തോടെ ക്രമേണ അത് നിർത്താൻ ശ്രമിച്ചു. ഈ വേഗത്തിലുള്ള പ്രവർത്തനം ട്രാഫിക് അപകടത്തിൽ നിന്നും ഡ്രൈവർക്ക് കാറിൻ്റെ പൂർണ്ണ നിയന്ത്രണം നഷ്‌ടപ്പെടുന്നതിൽ നിന്നും തടഞ്ഞു. 

ശൈഖ് മുഹമ്മദ് ബിൻ സായിദ് റോഡിൽ അബൂദബിയിലേക്ക് പോകുന്ന വാഹനത്തെക്കുറിച്ച് കമാൻഡ് ആൻഡ് കൺട്രോൾ സെൻ്ററിൽ നിന്ന് ട്രാഫിക് പട്രോളിംഗിന് റിപ്പോർട്ട് ലഭിച്ചതായി സംഭവത്തെക്കുറിച്ച് വിശദീകരിച്ചുകൊണ്ട് ഓപ്പറേഷൻസ് അഫയേഴ്‌സ് ആക്ടിംഗ് അസിസ്റ്റൻ്റ് കമാൻഡൻ്റ് മേജർ ജനറൽ സെയ്ഫ് മുഹൈർ അൽ മസ്‌റൂയി പറഞ്ഞു. പെട്ടെന്നുണ്ടായ ക്രൂയിസ് കൺട്രോൾ തകരാർ മൂലം ഡ്രൈവർക്ക് നിയന്ത്രിക്കാനാവാതെ വരികയായിരുന്നു. 

"ട്രാഫിക് പട്രോളിംഗ് ഉടൻ തന്നെ ശൈഖ് മുഹമ്മദ് ബിൻ സായിദ് റോഡിലേക്ക് അയച്ചു. എക്‌സ്‌പോ പാലം കടന്ന വാഹനത്തെ കണ്ടു. അതിവേഗ ട്രാക്കിൽ വലിയ അപകടം ഉണ്ടാകുന്നത് മുൻകൂട്ടിക്കണ്ട് പട്രോളിംഗ് വേഗത്തിൽ അതിൻ്റെ ചുറ്റുമുള്ള പ്രദേശം സുരക്ഷിതമാക്കി. മറ്റ് വാഹനമോടിക്കുന്നവർക്കായി മുന്നറിയിപ്പ് അടയാളങ്ങൾ സജീവമാക്കി'' -മേജർ ജനറൽ അൽ മസ്‌റൂയി വിശദീകരിച്ചു. 

ക്രൂയിസ് കൺട്രോൾ തകരാർ നേരിട്ടാൽ ഡ്രൈവർമാർ ശാന്തത പാലിക്കേണ്ടതിൻ്റെയും പരിഭ്രാന്തി ഒഴിവാക്കേണ്ടതിൻ്റെയും പ്രാധാന്യം അദ്ദേഹം ഊന്നിപ്പറഞ്ഞു. സീറ്റ് ബെൽറ്റ് ഉറപ്പിച്ചിട്ടുണ്ടെന്നും ഹസാർഡ് ലൈറ്റുകളും ഹെഡ്‌ലൈറ്റുകളും ഓണാക്കാനും കമാൻഡ് ആൻഡ് കൺട്രോൾ സെൻ്ററിലെ എമർജൻസി നമ്പറിൽ (999) ഉടൻ ബന്ധപ്പെടാനും മനക്കരുത്തു കാട്ടാൻ അദ്ദേഹം ആവശ്യപ്പെട്ടു.