പാലക്കാട് : സ്‌കൂളിലേക്കു പോകുകയായിരുന്ന പെണ്‍കുട്ടികളുടെ അടുത്തേക്ക് കാര്‍ ചേര്‍ത്തുനിര്‍ത്തി നഗ്നത പ്രദര്‍ശിപ്പിക്കുകയും പെണ്‍കുട്ടികളെ ഉള്‍പ്പെടുത്തി സെല്‍ഫി എടുക്കുകയും ചെയ്ത സംഭവത്തില്‍ പ്രമുഖ യുവനടനെതിരേ ഒറ്റപ്പാലം പൊലിസ് കേസ് രജിസ്റ്റര്‍ ചെയ്തു. കഴിഞ്ഞ മാസം 27നാണ് സംഭവം.
പത്തിരിപ്പാലയിലെ പ്രമുഖ സ്‌കൂളിലേക്ക് സംഘമായി പോകുകയായിരുന്ന പെണ്‍കുട്ടികള്‍ക്കടുത്തെത്തി കാറില്‍ ഡ്രൈവര്‍സീറ്റിലിരുന്ന് നഗ്നത പ്രദര്‍ശിപ്പിക്കുകയും കുട്ടികള്‍ ഉള്‍പ്പെടുന്ന തരത്തില്‍ സെല്‍ഫി എടുക്കുകയും ചെയ്തിരുന്നുവത്രെ.
കുട്ടികള്‍ ബഹളം വച്ചതോടെ യുവനടന്‍ പെട്ടെന്നു കാര്‍ ഓടിച്ചുപോകുകയായിരുന്നു. സംഭവം അറിഞ്ഞ് രക്ഷിതാക്കള്‍ ഒറ്റപ്പാലം പൊലിസ് സ്റ്റേഷനിലെത്തി പരാതി കൊടുക്കുകയായിരുന്നു.
അതേസമയം ഒറ്റപ്പാലം പൊലിസ് സ്റ്റേഷനിലെ പ്രദീപ് എന്ന് പേരുള്ള പൊലിസുകാരന്‍ പരാതിക്കാരായ പെണ്‍കുട്ടികളെ സന്ധ്യാസമയത്തിനുശേഷം മൊഴിയെടുക്കാനെന്ന പേരില്‍ സ്റ്റേഷനിലേക്ക് വിളിച്ചുവരുത്തി ഭീഷണിപ്പെടുത്തിയതായി പെണ്‍കുട്ടികള്‍ പരാതിപ്പെട്ടു.
ഈ സമയത്ത് വനിതാപൊലിസിന്റെ സാന്നിധ്യവുമുണ്ടായിരുന്നില്ല. സിനിമാനടന്‍ സമൂഹത്തില്‍ ഉയര്‍ന്ന സ്ഥാനമുള്ളയാളാണെന്നും അത്തരക്കാരോട് ഏറ്റുമുട്ടാന്‍ നിന്നാല്‍ ഭാവി ഇല്ലാതാകുമെന്നും ഇയാള്‍ പറഞ്ഞതായി കുട്ടികള്‍ പറയുന്നു.
ഒറ്റപ്പാലം സബ്ഇന്‍സ്‌പെക്ടറുടെ നിലപാടുകളിലും പൊരുത്തക്കേടുകളുള്ളതായി രക്ഷിതാക്കളും കുട്ടികളും കുറ്റപ്പെടുത്തി. ചൈല്‍ഡ്‌ലൈന്‍, ചൈല്‍ഡ് പ്രൊട്ടക്ഷന്‍ ഓഫിസറുടെ ഓഫിസ് എന്നിവരും സംഭവത്തില്‍ ഇടപെട്ടിട്ടുണ്ട്.
കുട്ടികളുടെ പരാതിയില്‍ പറയുന്ന കുറ്റകൃത്യംചെയ്തത് ആരായാലും മുഖംനോക്കാതെ നടപടിയെടുക്കുമെന്ന് പാലക്കാട് ജില്ലാ പൊലിസ് മേധാവി പറഞ്ഞു. സംഭവത്തെക്കുറിച്ച് അന്വേഷിച്ച് റിപ്പോര്‍ട്ട് നല്‍കാന്‍ ഒറ്റപ്പാലം സബ്കലക്ടര്‍ നൂഹിന് നിര്‍ദേശം നല്‍കിയതായി ജില്ലാ കലക്ടര്‍ മേരിക്കുട്ടി അറിയിച്ചു.
അതേസമയം കേസ് വഴിതിരിച്ചുവിടാനും യുവനടനുപകരം വേറെ ആളെവെച്ച് കേസ് ഇല്ലാതാക്കാനും അണിയറയില്‍ശ്രമം നടക്കുന്നതായും സൂചനയുണ്ട്. പരാതിക്കാരായ കുട്ടികളും രക്ഷിതാക്കളും ഇന്ന് ജില്ലാകലക്ടറെ കണ്ട് കാര്യങ്ങള്‍ വിശദീകരിക്കുമെന്ന് രക്ഷിതാക്കള്‍ അറിയിച്ചു.

പെണ്‍കുട്ടികളിലൊരാള്‍ ആത്മഹത്യക്ക് ശ്രമിച്ചു

പാലക്കാട്: യുവനടന്‍ നഗ്നത പ്രദര്‍ശിപ്പിക്കുകയും ഫോട്ടോയെടുക്കുകയും ചെയ്ത കേസില്‍ പെണ്‍കുട്ടികളിലൊരാള്‍ ഇന്നലെ വൈകുന്നേരത്തോടെ ആത്മഹത്യക്ക് ശ്രമിച്ചു. ഒറ്റപ്പാലം പൊലിസ് സ്റ്റേഷനില്‍ നിന്നും വൈകീട്ട് ഏഴോടെ സ്‌റ്റേഷനിലേക്ക് ചെല്ലണമെന്നും ചെന്നില്ലെങ്കില്‍ വനിതാപൊലിസ് വീട്ടില്‍ വന്ന് അറസ്റ്റ് ചെയ്തുകൊണ്ടുപോകുമെന്നും ഭീഷണിപ്പെടുത്തി ഫോണ്‍കോള്‍ വന്നതായി പെണ്‍കുട്ടിയുടെ വീട്ടുകാര്‍ പറയുന്നു. ഇതിനുശേഷമാണ് കുട്ടി ആത്മഹത്യക്ക് ശ്രമിച്ചത്. തക്കസമയത്ത് വീട്ടുകാര്‍ സംഭവം കണ്ടതിനാല്‍ ദുരന്തം ഒഴിവായി. തിങ്കളാഴ്ച വൈകിട്ട് ആറരയോടെ പെണ്‍കുട്ടികളെ മൊഴിയെടുക്കാനെന്ന പേരില്‍ ഒറ്റപ്പാലം സ്റ്റേഷനിലേക്ക് വിളിപ്പിച്ച് കുട്ടികളെ പൊലിസ് ഭീഷണിപ്പെടുത്തുകയും ഭാവി ഇല്ലാതാകുമെന്നും, കേസ് പിന്‍വലിക്കുന്നതാണ് നല്ലതെന്നും പറഞ്ഞിരുന്നുവെന്നും വീട്ടുകാര്‍ വ്യക്തമാക്കി.