തിരുവനന്തപുരം: 500 രൂപയുടെ വ്യാജ നോട്ടുകള്‍ ബാങ്കില്‍ നിക്ഷേപിക്കാനെത്തിയ യുവതി അറസ്റ്റില്‍. ബീമാപ്പള്ളി ന്യൂ ജവഹര്‍ പള്ളിക്ക് സമീപം താമസിക്കുന്ന ബര്‍ക്കത്ത് എന്ന യുവതിയെയാണ് പൂന്തുറ പൊലിസ് അറസ്റ്റ് ചെയ്തത്. 

പൂന്തുറ കുമരിച്ചന്തയ്ക്ക് സമീപത്തെ എസ്.ബി.ഐയുടെ ശാഖയില്‍ പണം നിക്ഷേപിക്കാനെത്തിയതായിരുന്നു യുവതി. സംശയം തോന്നിയ ബാങ്ക് ഉദ്യോഗസ്ഥര്‍ പരിശോധന നടത്തി കള്ളനോട്ടാണെന്ന് ഉറപ്പിക്കുകയായിരുന്നു. തുടര്‍ന്ന് പൊലിസെത്തി യുവതിയെ കസ്റ്റഡിയിലെടുത്തു. 

500 രൂപയുടെ 25 നോട്ടുകളാണ് യുവതിയുടെ പക്കല്‍ നിന്നും പിടിച്ചെടുത്തത്. സഊദി അറേബ്യയില്‍ നിന്ന് നാട്ടിലേക്ക് മടങ്ങുന്നതിനിടെ ഭര്‍ത്താവിന്റെ സുഹൃത്തായ പാക്കിസ്ഥാന്‍ സ്വദേശി സമ്മാനമായി നല്‍കിയതാണ് നോട്ടുകളെന്നാണ് യുവതിയുടെ മൊഴി. പൊലിസ് ഇത് മുഖവിലക്കെതുടത്തിട്ടില്ല. തുടര്‍ന്ന് നടത്തിയ അന്വേഷണത്തില്‍ യുവതിയുടെ വീട്ടില്‍ നിന്ന് 1,80,000 രൂപ വിലമതിക്കുന്ന 500 ന്റെ ഒറിജിനല്‍ നോട്ടുകള്‍ പൊലിസ് കണ്ടെത്തി. 

നടപടികള്‍ പൂര്‍ത്തിയാക്കിയതിന് ശേഷം കോടതിയില്‍ ഹാജരാക്കിയ യുവതിയെ റിമാന്‍ഡ് ചെയ്തു.

Woman arrested for try to depositing fake Rs 500 note in bank