ഗസ്സ: ഗസ്സയിലെ വംശഹത്യാ കൊന്നൊടുക്കലുകള്‍ ഒരു വര്‍ഷം തികയാന്‍ മണിക്കൂറുകള്‍ ബാക്കി നില്‍ക്കേ വീണ്ടും കൂട്ടക്കുരുതിയുമായി ഇസ്‌റാഈല്‍. ദെര്‍ എല്‍ ബലാഹിലെ ശുഹദാഉല്‍ അഖ്‌സ പള്ളിക്ക് നേരെ ഇസ്‌റാഈല്‍ നടത്തിയ ആക്രമണത്തില്‍ 18 പേര്‍ കൊല്ലപ്പെട്ടു. ആയിരക്കണക്കിന് ആളുകള്‍ അഭയം തേടിയ ഇടമാണ് പള്ളിയെന്ന് ദൃക്‌സാക്ഷികള്‍ പറയുന്നു. ഇസ്‌റാഈല്‍ ആക്രമണത്തില്‍ നിരവധി പേര്‍ക്ക് ഗുരുതരമായി പരുക്കേറ്റിട്ടുണ്ടെന്നും അല്‍ജസീറയുടെ റിപ്പോര്‍ട്ടില്‍ പറയുന്നു. 

شهداء وجرحى في قصف طائرات الاحتلال مسجدا قرب مدخل مستشفى شهداء الأقصى بدير البلح وسط قطاع غزة #حرب_غزة #فيديو pic.twitter.com/LJHo2T5BwQ

— الجزيرة فلسطين (@AJA_Palestine) October 6, 2024

പള്ളിയില്‍ ആക്രമണം നടത്തിയ വിവരം ഇസ്‌റാഈല്‍ പ്രതിരോധസേനയും സ്ഥിരീകരിച്ചിട്ടുണ്ട്. പള്ളിക്കൊപ്പം ഇബന്‍ റുഷദ് സ്‌കൂളിലും ആക്രമണം നടത്തിയെന്ന് ഇസ്‌റാഈല്‍ പ്രതിരോധസേന അറിയിച്ചു. എക്‌സിലൂടെയായിരുന്നു ഇസ്‌റാഈല്‍ പ്രതിരോധസേനയുടെ അറിയിപ്പ്.

അതേസമയം, ആക്രമണത്തില്‍ എത്രപേര്‍ മരിച്ചുവെന്ന്  പ്രതിരോധസേന സ്ഥിരീകരിച്ചിട്ടില്ല. സിവിലിയന്‍മാരുടെ മരണം പരമാവധി കുറക്കുന്ന രീതിയിലാണ് ആക്രമണം നടത്തിയതെന്നാണ് സേനയുടെ ന്യായീകരണം.

ഗസ്സ യുദ്ധത്തില്‍ ഇതുവരെ കൊല്ലപ്പെട്ട ഫലസ്തീനികളുടെ എണ്ണം 43,000 ത്തോളമായി.  96,910 പേര്‍ക്ക് പരിക്കേറ്റിരുന്നു. അധിനിവിഷ്ട വെസ്റ്റ് ബാങ്കിലെ വിവിധയിടങ്ങളില്‍ ഇസ്‌റാഈല്‍ സൈന്യം ഇപ്പോഴും ആക്രമണം തുടരുകയാണ്. മാത്രമല്ല ഫലസ്തീന്‍ അതിര്‍ത്തിയും കടന്ന് ലബനാനിലേക്കും സിറിയയിലേക്കും യമനിലേക്കും ഇറാനിലേക്കും ഇസ്‌റാഈല്‍ വ്യാപിപ്പിച്ചിരിക്കുകയാണ്.