ലോർഡ്‌സ്: ഇന്ത്യ-ഇംഗ്ലണ്ട് മൂന്നാം ടെസ്റ്റിന് തുടക്കമായിരിക്കുമായാണ് ലോർഡ്‌സിൽ നടക്കുന്ന മത്സരത്തിൽ ടോസ് നേടിയ ഇംഗ്ലണ്ട് ക്യാപ്റ്റൻ ബെൻ സ്റ്റോക്സ് ബാറ്റിംഗ് തെരഞ്ഞെടുത്തു. തുടക്കത്തിൽ തന്നെ ഇംഗ്ലണ്ടിന്റെ രണ്ട് വിക്കറ്റുകളാണ്‌ ഇന്ത്യ വീഴ്ത്തിയത്. നിതീഷ് കുമാർ റെഡ്ഢിയാണ് രണ്ട് വിക്കറ്റുകളും സ്വന്തമാക്കിയത്. സാക്ക് ക്രാളി, ബെൻ ഡക്കറ്റ് എന്നിവരെയാണ് നിതീഷ് കുമാർ പുറത്താക്കിയത്. താരത്തിന്റെ ഒറ്റ ഓവറിലാണ് രണ്ട് വിക്കറ്റുകളും വീണത്. സാക്ക് 43 പന്തിൽ 18 റൺസും ഡക്കറ്റ് 40 പന്തിൽ 23 റൺസും നേടിയാണ് മടങ്ങിയത്.  

മത്സരത്തിൽ രണ്ട് ടീമും ഓരോ മാറ്റങ്ങളുമായാണ് കളത്തിലിറങ്ങിയത്. രണ്ടാം ടെസ്റ്റിൽ വിശ്രമത്തിലായിരുന്ന പേസർ ജസ്പ്രീത് ബുംറ ടീമിൽ തിരിച്ചെത്തി. കഴിഞ്ഞ മത്സരത്തിൽ കളിച്ച ജോഷ് ടങ്കിനു പകരം ജോഫ്ര ആർച്ചർ ഇം​ഗ്ലണ്ട് പ്ലേയിങ്ങ് ഇലവനിലെത്തി. അഞ്ച് മത്സരങ്ങൾ അടങ്ങുന്ന പരമ്പരയിൽ നിലവിൽ ഇരു ടീമുകളും ഓരോ മത്സരം വീതം ജയിച്ച് സമനിലയിൽ പിരിഞ്ഞതിനാൽ ഇനിയുള്ള ഓരോ മത്സരത്തിലും ഇരു ടീമുകളും ശ്രദ്ധയോടെയാകും കരുക്കൾ നീക്കുക. 

ഇന്ന് മൂന്നാം ടെസ്റ്റിനായി ലോർഡ്സിൽ ഇറങ്ങുമ്പോൾ, എഡ്ജ്ബാസ്റ്റണിൽ നേടിയ ചരിത്ര വിജയം ആവർത്തിക്കുകയാണ് ഇന്ത്യയുടെ പ്രധാന ലക്ഷ്യം. എന്നാൽ, ലോർഡ്സിന്റെ ചരിത്രവും കണക്കുകളും ഇന്ത്യയ്ക്ക് പ്രതീക്ഷക്ക് വക നൽകുന്നതല്ല. ലോർഡ്സിൽ ഇംഗ്ലണ്ടിനെതിരെ ഇന്ത്യ ഇതുവരെ കളിച്ചത് 19 ടെസ്റ്റുകളാണ്. ഇതിൽ മൂന്നെണ്ണത്തിൽ മാത്രമാണ് ഇന്ത്യ വിജയിച്ചത്. നാല് മത്സരങ്ങൾ സമനിലയിൽ അവസാനിച്ചു. ബാക്കി 12 ടെസ്റ്റുകളിലും വിജയം ഇംഗ്ലണ്ടിനൊപ്പമായിരുന്നു.  

ഇംഗ്ലണ്ട് പ്ലെയിങ് ഇലവൻ

സാക്ക് ക്രാളി, ബെൻ ഡക്കറ്റ്, ഒല്ലി പോപ്പ്, ജോ റൂട്ട്, ഹാരി ബ്രൂക്ക്, ബെൻ സ്റ്റോക്സ്(ക്യാപ്റ്റൻ), ജാമി സ്മിത്ത്(വിക്കറ്റ് കീപ്പർ), ക്രിസ് വോക്സ്, ബ്രൈഡൺ കാർസ്, ജോഫ്ര ആർച്ചർ, ഷോയിബ് ബഷീർ

ഇന്ത്യ പ്ലെയിങ് ഇലവൻ 

യശസ്വി ജയ്സ്വാൾ, കെഎൽ രാഹുൽ, കരുണ് നായർ, ശുഭ്മാൻ ഗിൽ(ക്യാപ്റ്റൻ), ഋഷഭ് പന്ത്(വിക്കറ്റ് കീപ്പർ), നിതീഷ് കുമാർ റെഡ്ഡി, രവീന്ദ്ര ജഡേജ, വാഷിംഗ്ടൺ സുന്ദർ, ആകാശ് ദീപ്, ജസ്പ്രീത് ബുംറ, മുഹമ്മദ് സിറാജ്

India vs England Third Test Nithish Kumar Reddy Great Performance in first day