ഹൈദരാബാദ്: സൈബർ തട്ടിപ്പുകൾ രാജ്യവ്യാപകമായി വർധിക്കുന്ന സാഹചര്യത്തിൽ, തെലങ്കാനയിൽ 100 കോടി രൂപയുടെ വെബ്‌ലിങ്ക് തട്ടിപ്പ് പോലീസ് പിടികൂടി. ആറ് മാസത്തിനുള്ളിൽ പണം ഇരട്ടിയാക്കാമെന്നും ഗോവയിലേക്ക് കുടുംബസമേതമുള്ള സൗജന്യ യാത്ര നൽകാമെന്നും വാഗ്ദാനം ചെയ്താണ് തട്ടിപ്പുകാർ ഖമ്മം, കരേപ്പള്ളി, നെലകൊണ്ടപ്പള്ളി എന്നിവിടങ്ങളിലെ നൂറുകണക്കിന് ആളുകളെ കബളിപ്പിച്ചത്.

തട്ടിപ്പുകാർ ഡിജിറ്റൽ സംരംഭകരായി വേഷമിട്ട്, ഡോളറിൽ നടത്തുന്ന നിക്ഷേപങ്ങൾക്ക് പ്രതിദിനം 100 രൂപക്ക് ഒരു രൂപ നിരക്കിൽ ആറ് മാസത്തേക്ക് 180 രൂപ എന്ന നിരക്കിൽ വരുമാനം ലഭിക്കുമെന്ന് വഗ്‌ദാനം നൽകി സംഘം ഒരു വെബ് ലിങ്ക് സൃഷ്‌ടിക്കുകയായിരുന്നു.. കൂടുതൽ നിക്ഷേപിക്കുന്നവർക്ക് ഗോവ യാത്രയും വാഗ്ദാനം ചെയ്തു. വിശ്വാസ്യത നേടാൻ, ആദ്യഘട്ടത്തിൽ ഒരു ലക്ഷം രൂപ നിക്ഷേപിച്ചവർക്ക് 5 ലക്ഷം രൂപ വരെ നൽകി. എന്നാൽ, 419 പേർ ഈ തട്ടിപ്പിന് ഇരയായി.

നെറ്റ്‌വർക്ക് വിപുലീകരിക്കാൻ സൂം മീറ്റിംഗുകൾ സംഘടിപ്പിച്ചും മറ്റുള്ളവരെ പദ്ധതിയിലേക്ക് ആകർഷിക്കാൻ പ്രോത്സാഹിപ്പിച്ചും തട്ടിപ്പുകാർ പ്രവർത്തിച്ചു. ഖമ്മത്തെ ഹവേലി പ്രദേശത്ത് നാല് മാസം മുമ്പ് ഉണ്ടായ സംഘർഷത്തെ തുടർന്നാണ് തട്ടിപ്പ് പുറത്തുവന്നത്. നിക്ഷേപവുമായി ബന്ധപ്പെട്ട പ്രശ്നങ്ങൾ സംഘർഷത്തിന് കാരണമായതായി പോലീസ് കണ്ടെത്തി.

സിഐ സഞ്ജീവിന്റെ നേതൃത്വത്തിൽ നടന്ന അന്വേഷണത്തിൽ, തട്ടിപ്പ് സംഘത്തിന്റെ പ്രധാനിയായ നാസിർ ദുബായിലേക്ക് കടന്നതായും വ്യാജ വെബ്‌ലിങ്ക് സൃഷ്ടിച്ച പ്രതിയെ ആന്ധ്രാപ്രദേശിൽ ചോദ്യം ചെയ്യുന്നതായും പോലീസ് അറിയിച്ചു. വിശ്വാസം നേടാൻ 20 നിക്ഷേപകരെ ഗോവയിലേക്ക് കൊണ്ടുപോയതായും, ഒരു ഖമ്മം നിവാസി യാത്രാ ചെലവിനായി 10 ലക്ഷം രൂപ നൽകിയതായും അന്വേഷണത്തിൽ വ്യക്തമായി.

സൂം മീറ്റിംഗുകൾ വഴി പദ്ധതി പ്രചരിപ്പിച്ച ശ്രീദേവിയും പ്രദേശവാസിയായ നവീനും അറസ്റ്റിലായി റിമാൻഡ് ചെയ്യപ്പെട്ടു. തട്ടിപ്പിന് പിന്നിൽ വലിയ അന്തർസംസ്ഥാന ശൃംഖലയുണ്ടെന്നും അന്വേഷണം തുടരുകയാണെന്നും പോലീസ് അറിയിച്ചു.