കട്ടന്‍ ചായക്കൊപ്പം കറുമുറെ  കഴിക്കാന്‍ ക്രിസ്പി ചിപ്‌സ് കിട്ടിയാല്‍ സൂപ്പറല്ലേ... വെളിച്ചെണ്ണയില്‍ ഉണ്ടാക്കുന്ന ഈ ചിപ്‌സിന് വലിയ ഡിമാന്‍ഡുമാണ്. മറ്റാരൊക്കെ വിപണിയിലെത്തിയാലും എനിക്കെന്നും ഡിമാന്‍ഡ് തന്നെയാണെന്നാണ് സ്വര്‍ണനിറമുള്ള ചിപ്‌സ് പറയുന്നത്. 

നല്ല രുചിയുള്ള കായവറുത്തത് ഉണ്ടാക്കണമെങ്കില്‍ നേന്ത്രക്കായ തിരഞ്ഞെടുക്കുമ്പോള്‍ നല്ല ശ്രദ്ധവേണം. നല്ല മൂത്ത കായ വേണം വറുക്കാന്‍ എടുക്കാന്‍. അല്ലെങ്കില്‍ ചിപ്‌സിനൊരു രുചിയുണ്ടാവില്ല. നല്ല ക്രിസ്പിയായി  കിട്ടണമെങ്കില്‍ മൂത്ത കായ തന്നെവേണം.
ഒരേപോലെ ഒരേ അളവില്‍ തന്നെ കനം കുറച്ചരിഞ്ഞുവേണം കായ വറുക്കാന്‍. എങ്കിലേ കൃത്യമായി ഇവ ഒരുമിച്ചു പാകമായി കിട്ടുകയുള്ളൂ.

അരിഞ്ഞ കായകള്‍ ഉപ്പ് കലക്കിയ വെള്ളത്തില്‍ ഇട്ടു വയ്ക്കണം. എന്നാലേ കായയിലെ കറ പോവുകയുള്ളൂ. മാത്രമല്ല വറുക്കുമ്പോള്‍ ഇവ തമ്മില്‍ ഒട്ടിപ്പിടിക്കാതെ ഇരിക്കുകയും ചെയ്യും. മൂത്തുപാകമായ നേന്ത്രക്കായ നേര്‍മയായി അരിഞ്ഞ ശേഷം മഞ്ഞളും ഉപ്പും മിക്‌സ് ചെയ്ത വെള്ളത്തില്‍ അഞ്ചുമിനിറ്റ് ഇട്ടുവയ്ക്കണം.

വെള്ളം വാരാന്‍ വച്ച ശേഷം അടികട്ടിയുളള ചീനച്ചട്ടിയിലോ മറ്റെതെങ്കിലും പാത്രത്തിലോ വെളിച്ചെണ്ണ ഒഴിച്ച് ചൂടായതിനു ശേഷം കുറേശ്ശേ ഇട്ടു വറുത്തു കോരുക. ചൂടാറിയാല്‍ നല്ലൊരു കണ്ടെയ്‌നറില്‍ അടച്ചു സൂക്ഷിക്കാം.