മുംബൈ: തെരഞ്ഞെടുപ്പ് നടക്കാന്‍ ദിവസങ്ങള്‍ ബാക്കി നില്‍ക്കേ മഹാരാഷ്ട്രയില്‍ കോണ്‍ഗ്രസിന് തിരിച്ചടി. മഹാരാഷ്ട്ര കോണ്‍ഗ്രസ് ജനറല്‍ സെക്രട്ടറി ജാവേദ് ഷരൂഫ് എന്‍.സി.പി അജിത് പവാര്‍ വിഭാഗത്തില്‍ ചേര്‍ന്നു. ചൊവ്വാഴ്ച മഹാരാഷ്ട്ര ഉപമുഖ്യമന്ത്രി അജിത് പവാറിന്റെയും എന്‍.സി.പി സംസ്ഥാന അധ്യക്ഷന്‍ സുനില്‍ തത്കരെയുടെയും സാന്നിധ്യത്തിലാണ് ജാവേദ് ഷരൂഫ് കോണ്‍ഗ്രസില്‍ നിന്ന് എന്‍.സി.പിയിലേക്ക് കൂടുമാറ്റം നടത്തിയത്.

'മഹാരാഷ്ട്ര കോണ്‍ഗ്രസ് ജനറല്‍ സെക്രട്ടറി ജാവേദ് ഷരൂഫ് എന്‍.സി.പിയില്‍ ചേര്‍ന്നു. ഞാന്‍ അദ്ദേഹത്തെ പൂര്‍ണ്ണ ഹൃദയത്തോടെ സ്വാഗതം ചെയ്യുന്നു. അദ്ദേഹം പാര്‍ട്ടിയുടെ ആശയങ്ങള്‍ പിന്തുടര്‍ന്ന് പൊതുസേവനത്തിന് വളരെയധികം സംഭാവന നല്‍കുമെന്ന് എനിക്ക് ഉറപ്പുണ്ട്' 
അജിത് പവാര്‍ എക്‌സില്‍ കുറിച്ചു.

അതിനിടെ എന്‍.സി.പി പൂനെ സിറ്റി പ്രസിഡന്റ് ദീപക് മങ്കറിന് എം.എല്‍.സി സ്ഥാനം നല്‍കാത്ത ഗവര്‍ണറുടെ തീരുമാനത്തില്‍ പ്രതിഷേധിച്ച് 600ലധികം എന്‍സിപി പ്രവര്‍ത്തകരും ഉദ്യോഗസ്ഥരും രാജിവെച്ചു. ഗവര്‍ണര്‍ ക്വാട്ടയില്‍ നിന്ന് പാര്‍ട്ടിക്ക് അനുവദിച്ച മൂന്ന് എം.എല്‍.സി സീറ്റുകളില്‍ ഒന്നിലേക്ക് ദീപക് മങ്കറിനെ നിയമിക്കണമെന്ന് സിറ്റി ഘടകം ആവശ്യപ്പെട്ടിരുന്നു. പക്ഷെ പാര്‍ട്ടി അതിന് തയ്യാറായില്ല.