ടെല്‍അവീവ്: ഗസ്സയിലും ലബനാനിലും ഇസ്‌റാഈല്‍ ആക്രമണം തുടരുന്നതിനിടെ പ്രധാനമന്ത്രി ബെന്യാമിന്‍ നെതന്യാഹുവിന്റെ ഓഫിസിലെ സുപ്രധാന  രേഖകള്‍ ചോര്‍ന്നു. യുദ്ധ ലക്ഷ്യങ്ങള്‍ നേടുന്നതുമായി ബന്ധപ്പെട്ട രഹസ്യ വിവരങ്ങള്‍ ഉള്‍പ്പെടെ ചോര്‍ന്നത് ഇസ്‌റാഈല്‍ ഭരണകൂടത്തെ ഞെട്ടിച്ചിട്ടുണ്ട്. ഇതുമായി ബന്ധപ്പെട്ട് ഏതാനും പേരെ അറസ്റ്റ് ചെയ്തു. പൊലിസും സൈന്യവും സംയുക്തമായി നടത്തിയ അന്വേഷണത്തിലാണ് നടപടി.

ജര്‍മന്‍ ന്യൂസ് സൈറ്റ് ബില്‍ഡിനാണ് വിവരങ്ങള്‍ ചോര്‍ന്നുകിട്ടിയത്. ഹമാസ് തടവിലുള്ള ബന്ദികളെ എന്തു ചെയ്യാനാണ് യഹ്‌യ സിന്‍വാര്‍ പദ്ധതിയിടുന്നതെന്ന് വ്യക്തമാക്കുന്ന ലേഖനം പ്രസിദ്ധീകരിച്ചത് രഹസ്യ വിവരങ്ങള്‍ ചോര്‍ന്നുകിട്ടിയ ശേഷമാണ്.

അറസ്റ്റിലായവരാരും പ്രധാനമന്ത്രിയുടെ ഓഫിസിലുള്ള ജീവനക്കാരല്ലെന്നാണ് നെതന്യാഹു പറയുന്നത്. അതേസമയം ഇതിലൊരാള്‍ നെതന്യാഹുവിന്റെ ഓഫിസില്‍ ജോലിചെയ്തിരുന്ന വക്താവാണെന്ന് വൈ നെറ്റ് റിപ്പോര്‍ട്ട് ചെയ്തു. സൈനിക രഹസ്യങ്ങള്‍ അറിയാവുന്നവിധം നെതന്യാഹുവിനൊപ്പം പല യോഗങ്ങളിലും ഇയാള്‍ ഉണ്ടായിരുന്നു.