മൂന്നാര്‍: ദേവികുളം ആര്‍ഡിഒ ഓഫീസിന് സമീപത്ത് അനധികൃത കൈയേറ്റം ഒഴിപ്പിക്കാനെത്തിയ തഹസീല്‍ദാറുടെ നേതൃത്വത്തിലുള്ള റവന്യു സംഘത്തെ നാട്ടുകാര്‍ തടഞ്ഞു.
ഇന്നലെ രാവിലെ ദേവികുളം സബ് കലക്ടര്‍ ശ്രീറാം വെങ്കിട്ടരാമന്റെ നിര്‍ദ്ദേശപ്രകാരം കൈയ്യേറ്റം ഒഴിപ്പിക്കാനെത്തിയ ദൗത്യസംഘം സ്‌പെഷ്യല്‍ ഓഫീസര്‍ തഹസീല്‍ദാര്‍ എ. അശോകനെയും സംഘത്തെയുമാണ് അമ്പതോളംവരുന്ന നാട്ടുകാര്‍ തടഞ്ഞത്. സര്‍വെ നമ്പര്‍ 201 ല്‍പ്പെട്ട സര്‍ക്കാര്‍ ഭൂമിയില്‍ ഡിക്കോത്ത വിന്‍സന്റ്(52) എന്നയാള്‍ കൈയ്യേറി കെട്ടിടം നിര്‍മ്മിച്ചിരുന്നു. ആര്‍ഡിഒ ഓഫീസിന് സമീപത്തെ 66 സെന്റ് സര്‍ക്കാര്‍ ഭൂമി കൈയ്യേറിയാണ് ഇയാള്‍ നിര്‍മ്മാണം നടത്തിയത്.
അനധികൃതമായി നിര്‍മ്മാണം നടത്തിയ കെട്ടിടത്തില്‍ നിന്നും താമസക്കാര്‍ മാറണമെന്ന് അധികൃതര്‍ രണ്ടുദിവസം മുമ്പ് മുന്നറിയിപ്പ് നല്‍കി. എന്നാല്‍ ദിവസങ്ങള്‍ കഴിഞ്ഞിട്ടം താമസക്കാര്‍ ഒഴിഞ്ഞുപോകുന്നതിന് തയ്യറായിരുന്നില്ല. തുടര്‍ന്നെത്തിയ റവന്യു അധിക്യതര്‍ കെട്ടിടം പൊളിച്ചുനീക്കുന്നതിന് നടപടി സ്വീകരിച്ചതാണ് പ്രശ്‌നങ്ങള്‍ക്ക് ഇടയാക്കിയത്. കെട്ടിടമുടമയുടെ നേത്യത്വത്തിലെത്തിയ പ്രദേശവാസികള്‍ തഹസില്‍ദാരുടെ നേത്യത്വത്തിലെത്തിയ സംഘത്തെ തടഞ്ഞുവെച്ചു.
കെട്ടിടം പൊളിച്ചുനീക്കുന്നതിന് ദേവികുളം പൊലിസ് സ്‌റ്റേഷനില്‍ നിന്നും ഉദ്യോഗസ്ഥരെ ആവശ്യപ്പെട്ടെങ്കിലും ലഭിച്ചിരുന്നില്ല. നാലു പൊലിസുകാരെ മാത്രമാണ് റവന്യു സംഘത്തിന്റെ സുരക്ഷയ്ക്കായി നിയോഗിച്ചിരുന്നത്. കൂടുതല്‍ ഉദ്യോഗസ്ഥര്‍ ഇല്ലാത്തതാണ് ഒഴിപ്പിക്കലിന് തടസ്സം നേരിടാന്‍ കാരണമെന്ന് തഹസില്‍ദാര്‍ അറിയിച്ചു. സബ് കലക്ടറുടെ സാനിധ്യത്തില്‍ അടുത്തദിവസം ഒഴിപ്പിക്കല്‍ നടപടികള്‍ ആരംഭിക്കുമെന്ന് റവന്യു സംഘം അറിയിച്ചു.