ന്യൂയോര്‍ക്ക്: ഇന്ത്യന്‍ താരങ്ങളായ ലിയാണ്ടര്‍ പെയ്‌സ്, സാനിയ മിര്‍സ, രോഹന്‍ ബൊപ്പണ്ണ എന്നിവരുടെ സഖ്യങ്ങള്‍ യു.എസ് ഓപണ്‍ ടെന്നീസിന്റെ രണ്ടാം റൗണ്ടിലേക്ക് കടന്നു.
മിക്‌സ്ഡ് ഡബിള്‍സിലെ നിലവിലെ ചാംപ്യന്‍മാരായ ലിയാണ്ടര്‍ പെയ്‌സും സ്വിറ്റ്‌സര്‍ലന്‍ഡ് താരം മാര്‍ട്ടിന ഹിംഗിസും ചേര്‍ന്ന സഖ്യം അമേരിക്കയുടെ സച്ചിയ വികെരി- ഫ്രാന്‍സെസ് ടിയോഫെ സഖ്യത്തെ ആദ്യ റൗണ്ടില്‍ കീഴടക്കി. സ്‌കോര്‍: 6-3, 6-2.
വനിതാ ഡബിള്‍സില്‍ സാനിയ മിര്‍സയും ചെക്ക് റിപബ്ലിക്കിന്റെ ബാര്‍ബറ സ്‌ട്രൈക്കോവയും ചേര്‍ന്ന സഖ്യം അമേരിക്കന്‍ സഖ്യമായ ജാഡ മയി ഹാര്‍ട്ട്- എന ഷിബഹര സഖ്യത്തെ കീഴടക്കിയാണ് വിജയം പിടിച്ചത്. സ്‌കോര്‍: 6-3, 6-2.
പുരുഷ ഡബിള്‍സില്‍ രോഹന്‍ ബൊപ്പണ്ണയും ഡെന്‍മാര്‍ക്കിന്റെ ഫ്രഡറിക് നീല്‍സനും ചേര്‍ന്ന സഖ്യം ചെക്ക് റിപബ്ലിക്കിന്റെ റാഡെക് സ്റ്റെപാനെകും സെര്‍ബിയയുടെ നെനദ് സിമോനിചും ചേര്‍ന്ന സഖ്യത്തെ കടുത്ത പോരാട്ടത്തില്‍ കീഴടക്കിയാണ് രണ്ടാം റൗണ്ടിലേക്ക് മുന്നേറിയത്. സ്‌കോര്‍: 6-3, 6-7 (3), 6-3.