ന്യൂയോര്‍ക്ക്: യു.എസ് ഓപണ്‍ ടെന്നീസിന്റെ പുരുഷ വിഭാഗം സിംഗിള്‍സില്‍ ലോക ഒന്നാം നമ്പര്‍ താരം ദ്യോക്കോവിച്, റാഫേല്‍ നദാല്‍ എന്നിവര്‍ മൂന്നാം റൗണ്ടില്‍ കടന്നു. ജിറി വെസ്സിക്ക് പരുക്കേറ്റതിനെ തുടര്‍ന്ന് വാക്കോവറിലാണ് ദ്യോക്കോവിച് ജയം സ്വന്തമാക്കിയത്. നദാല്‍ ആന്ദ്രിയാസ് സെപ്പിയെയാണ് പരാജയപ്പെടുത്തിയത്. സാകേത് മൈനേനിയെ പരാജയപ്പെടുത്തി രണ്ടാം റൗണ്ടിലെത്തിയ വെസ്സി ദ്യോക്കോവിചിന് വെല്ലുവിളിയുയര്‍ത്തുമെന്നു കരുതിയെങ്കിലും കൈക്കുഴയ്‌ക്കേറ്റ പരുക്ക് രൂക്ഷമായതിനെ തുടര്‍ന്ന് പിന്‍മാറുകയായിരുന്നു.
അതേസമയം ഇറ്റാലിയന്‍ താരം സെപ്പിയുമായുള്ള ജയത്തോടെ അടഞ്ഞ മേല്‍ക്കൂരയുള്ള കോര്‍ട്ടില്‍ ആദ്യത്തെ ജയം സ്വന്തമാക്കാന്‍ നദാലിന് സാധിച്ചു. സ്‌കോര്‍ 6-0, 7-5, 6-1. മത്സരത്തില്‍ വേഗമേറിയ റിട്ടേണുകള്‍ കൊണ്ട് എതിരാളിയെ സമ്മര്‍ദ്ദത്തിലാക്കാന്‍ നദാലിന് സാധിച്ചു. രണ്ടാം സെറ്റില്‍ സെപ്പി പൊരുതി നോക്കിയപ്പോള്‍ സ്‌കോര്‍ 3-3ന് ഒപ്പമെത്തി. എന്നാല്‍ മഴയെ തുടര്‍ന്ന് കളി തടസ്സപ്പെട്ടു. തുടര്‍ന്നാണ് മേല്‍ക്കൂര അടച്ചത്.
ഈ വര്‍ഷം മുതലാണ് യു.എസ് ഓപണില്‍ മേല്‍ക്കൂര അടയ്ക്കുന്ന രീതി പരീക്ഷിച്ചത്. തുടര്‍ന്നും മത്സരത്തില്‍ ആധിപത്യം സ്വന്തമാക്കിയ നദാല്‍ അവസാന സെറ്റും മത്സരവും സ്വന്തമാക്കുകയായിരുന്നു. അതേസമയം ഏറെ പ്രതീക്ഷയുമായെത്തിയ കനേഡിയന്‍ താരം മിലോസ് റാവോനിക്ക് അമേരിക്കന്‍ താരം റയാന്‍ ഹാരിസനോട് പരാജയപ്പെട്ടു.
സ്‌കോര്‍ 7-6, 7-5, 7-5, 6-1. മത്സരത്തിന്റെ തുടക്കം മുതല്‍ റാവോനിക്കിന് വെല്ലുവിളിയുയര്‍ത്താന്‍ ഹാരിസന് സാധിച്ചു. ആദ്യ സെറ്റില്‍ ഇഞ്ചോടിഞ്ച് പൊരുതിയാണ് റാവോനിക് ജയിച്ചത്. എന്നാല്‍ തുടരെ മൂന്നു സെറ്റുകളില്‍ കനേഡിയന്‍ താരത്തെ നിഷ്പ്രഭമാക്കിയ പ്രകടനം കാഴ്ച്ചവച്ച ഹാരിസന്‍ മത്സരം സ്വന്തമാക്കുകയായിരുന്നു.
വനിതാ വിഭാഗത്തില്‍ ഫ്രഞ്ച് ഓപണ്‍ ചാംപ്യന്‍ ഗാര്‍ബിന്‍ മുഗുരസയെ നേരിട്ടുള്ള സെറ്റുകള്‍ക്ക് ലാത്വിയയുടെ അനസ്താസിജ സെവാസ്‌തോവ അട്ടിമറിച്ചു. സ്‌കോര്‍ 6-4, 6-4. രണ്ടു സെറ്റുകളില്‍ നിരവധി പിഴവുകള്‍ വരുത്തിയ മുഗുരുസ തോല്‍വി ചോദിച്ചു വാങ്ങുകയായിരുന്നു. ആദ്യ സെറ്റില്‍ അനായാസം കീഴടങ്ങിയ മുഗുരുസ രണ്ടാം സെറ്റില്‍ 5-1ന് പിന്നിലെത്തി. എന്നാല്‍ തിരിച്ചടിക്കാന്‍ മുഗുരുസയ്ക്ക് സാധിച്ചെങ്കിലും സെറ്റ് സ്വന്തമാക്കാന്‍ സാധിച്ചില്ല. യു.എസ് ഓപണിന്റെ രണ്ടാം റൗണ്ടില്‍ മുഗുരുസയുടെ തുടര്‍ച്ചയായ രണ്ടാം തോല്‍വിയാണിത്.
മറ്റ് മത്സരങ്ങളില്‍ കരോലിന്‍ വോസ്‌നിയാക്കി, ആഞ്ചലിക്വ കെര്‍ബര്‍ എന്നിവര്‍ മൂന്നാം റൗണ്ടില്‍ കടന്നു. വോസ്‌നിയാക്കി കുസ്‌നെട്‌സോവയെ വീഴ്ത്തി. സ്‌കോര്‍ 6-4, 6-4. കെര്‍ബര്‍ ലൂസിക് ബാറോനിയെയും പരാജയപ്പെടുത്തി. സ്‌കോര്‍ 6-2, 7-6.