കുവൈത്ത് സിറ്റി: ഇറാന്റെ ആക്രമണത്തെ തുടർന്ന് കുവൈത്തിലെ വൈദ്യുതിനിലയത്തിലും സമുദ്രജലം ശുദ്ധീകരിച്ച് കുടിവെള്ളമാക്കുന്ന പ്ലാന്റിലും തീപിടിത്തമുണ്ടായതായി കുവൈത്ത് വൈദ്യുതി, ജല മന്ത്രാലയം അറിയിച്ചു. തീപിടിത്തത്തെ തുടർന്ന് നിലയത്തിന്റെ സുരക്ഷ ഉറപ്പാക്കുന്നതിനും രാജ്യത്തെ വൈദ്യുതി വിതരണ ശൃംഖലയുടെ സ്ഥിരത നിലനിർത്തുന്നതിനുമായി മുൻകരുതൽ പ്രവർത്തന നടപടികൾ സ്വീകരിച്ചതായും അധികൃതർ അറിയിച്ചു. 

അടിയന്തര സാങ്കേതിക സംഘങ്ങൾ സ്ഥലത്തെത്തി തീ നിയന്ത്രണവിധേയമാക്കുന്നതിനും കേടുപാടുകൾ വിലയിരുത്തുന്നതിനുമുള്ള പ്രവർത്തനങ്ങൾ ആരംഭിച്ചു. നിലവിൽ വൈദ്യുതി വിതരണത്തിലും കുടിവെള്ള ഉൽപാദനത്തിലും വലിയ തടസ്സമുണ്ടാകാതിരിക്കാൻ ആവശ്യമായ ക്രമീകരണങ്ങൾ ഏർപ്പെടുത്തിയിട്ടുണ്ടെന്ന് മന്ത്രാലയം വ്യക്തമാക്കി. ഇറാന്റെ കുറ്റകരമായ ആക്രമണം എന്നാണ് സംഭവത്തെ മന്ത്രാലയം വിശേഷിപ്പിച്ചത്.

  കുവൈത്ത് എയർവേയ്സ് ഭൂരിഭാഗം സർവീസുകളും പുനഃക്രമീകരിച്ചു

പുതിയ സാഹചര്യത്തിൽ രാജ്യത്തിന്റെ വ്യോമാതിർത്തി അടച്ചുട്ടുണ്ട്. ഇതേ തുടർന്ന് കുവൈത്ത് എയർവേയ്സ് ഭൂരിഭാഗം വിമാന സർവീസുകളും പുനഃക്രമീകരിച്ചതായി അധികൃതർ അറിയിച്ചു. യാത്രക്കാർ തങ്ങളുടെ വിമാനങ്ങളുടെ ഏറ്റവും പുതിയ വിവരങ്ങൾ നിരന്തരം പരിശോധിക്കണമെന്ന് എയർലൈൻ അഭ്യർഥിച്ചു. ബുക്കിംഗിനിടെ നൽകിയ മൊബൈൽ നമ്പറുകളിലേക്ക് സർവീസുകളിലെ മാറ്റങ്ങൾ സംബന്ധിച്ച അറിയിപ്പുകളും എസ്.എം.എസ് സന്ദേശങ്ങളും അയയ്ക്കുമെന്നും കമ്പനി വ്യക്തമാക്കി.