ഇന്ത്യ- ഓസ്‌ട്രേലിയ ബോര്‍ഡര്‍ ഗാവസ്‌കര്‍ ട്രോഫിയിലെ മൂന്നാം ടെസ്റ്റ് സമനിലയില്‍ പിരിഞ്ഞു. രണ്ടാമത്തെ ഇന്നിങ്‌സില്‍ ഓസ്‌ട്രേലിയ 88  റണ്‍സിന് ഏഴു വിക്കറ്റ് എന്ന നിലയില്‍ ഡിക്ലയര്‍ ചെയ്യുകയായിരുന്നു. പിന്നീട് 275  റണ്‍സ് വിജയലക്ഷ്യം പിന്തുടര്‍ന്നിറങ്ങിയ ഇന്ത്യ എട്ട് റണ്‍സ് എടുത്തു നിന്ന സമയങ്ങളില്‍ മഴ വില്ലനായി വന്നതോടെ മത്സരം ഉപേഷിക്കുകയിരുന്നു. രണ്ടാം ഇന്നിങ്‌സില്‍ ഇന്ത്യന്‍ ബൗളിംഗ് നിരയില്‍ ജസ്പ്രീത് ബുംറ മൂന്ന് വിക്കറ്റുകള്‍ നേടി തിളങ്ങി. 

ആകാശ് ദീപ്, മുഹമ്മദ് സിറാജ് എന്നിവര്‍ രണ്ട് വീതം വിക്കറ്റുകളും വീഴ്ത്തി കരുത്തുകാട്ടി. രണ്ടാം ഇന്നിങ്‌സില്‍ ഓസീസിന്റെ മുന്‍ നിര താരങ്ങള്‍ക്ക് കാര്യമായൊന്നും ചെയ്യാന്‍ സാധിച്ചില്ല. 10 പന്തില്‍ 22 റണ്‍സ് നേടിയ പാറ്റ് കമ്മിന്‍സാണ് ടീമിലെ ടോപ് സ്‌കോറര്‍. രണ്ട് വീതം സിക്‌സും ഫോറുമാണ് കമ്മിന്‍സ് നേടിയത്. 

നേരത്തെ ഒന്നാം ഇന്നിഗ്‌സില്‍ ബാറ്റ് ചെയ്ത ഓസ്‌ട്രേലിയ 445  റണ്‍സാണ് നേടിയത്. സെഞ്ച്വറി നേടിയ ട്രാവിസ് ഹെഡും സ്റ്റീവന്‍ സ്മിത്തുമാണ് ഓസീസ് നിരയില്‍ മികച്ച പ്രകടനം നടത്തിയത്. ഹെഡ് 160  പന്തില്‍ 152  റണ്‍സും സ്മിത്ത് 190  പന്തില്‍ 101  റണ്‍സുമാണ് നേടിയത്. ഇന്ത്യന്‍ ബൗളിങ്ങില്‍ ഒന്നാം ഇന്നിഗ്‌സില്‍ ബുംറ ആറ് വിക്കറ്റുകള്‍ നേടി തിളങ്ങി. സിറാജ് രണ്ട് വിക്കറ്റും ആകാശ് ദീപ്, നിതീഷ് കുമാര്‍ റെഡ്ഢി എന്നിവര്‍ ഓരോ വിക്കറ്റും നേടി. 

ഒന്നാം ഇന്നിഗ്‌സില്‍ ഇന്ത്യ 260 റണ്‍സിനാണ് പുറത്തായത്. 134 പന്തില്‍ 84 റണ്‍സ് നേടി കെഎല്‍ രാഹുലും 123  പന്തില്‍ 77  റണ്‍സ് നേടി രവീന്ദ്ര ജഡേജയും മികച്ച പ്രകടങ്ങള്‍ പുറത്തെടുത്തു. നിലവില്‍ പരമ്പരയിലെ മൂന്ന് മത്സരങ്ങള്‍ പിന്നിട്ടപ്പോള്‍ 11 എന്ന നിലയില്‍ സമനിലയിലാണ് ഇരു ടീമുകളും. ഡിസംബര്‍ 26  മുതല്‍ 30 വരെയാണ് പരമ്പരയിലെ നാലാം മത്സരം നടക്കുന്നത്.

Rain played a role, India-Australia third Test tied