കോഴികളും മലയാളികളും തമ്മില്‍ ആത്മബന്ധം തന്നെയുണ്ട്. നമ്മുടെ പ്രിയപ്പെട്ട വിഭവം കൂടെയാണ് ചിക്കന്‍. ഇറച്ചിയും മുട്ടയും ഒക്കെ നമുക്കില്ലാതെ പറ്റുകയുമില്ല. ഗ്രാമങ്ങളിലാണ് കോഴികൂവുന്നത് ഏറ്റവും കൂടുതല്‍ കേള്‍ക്കാറുള്ളത്. മിക്കവീടുകളിലും കോഴികളുണ്ടാവാറുമുണ്ട്. എന്തുകൊണ്ടാണ് പൂവന്‍കോഴികള്‍ പുലര്‍ച്ചെ ഉണര്‍ന്നു കൂവുന്നത്.

പഴമക്കാര്‍ക്കൊരു ചൊല്ലുണ്ട്. കോഴി കൂവിയാല്‍ നേരം വെളുത്തെന്നും എഴുന്നേല്‍ക്കാന്‍ സമയമായെന്നും. രാവിലെ കോഴികൂവുന്നത് എല്ലാവരും കേള്‍ക്കുന്നതുമാണ്. ചിലര്‍ക്ക് കോഴികൂവുന്നത് ഇഷ്ടവുമല്ല. കാരണം നന്നായി ഉറങ്ങുന്ന സമയത്തായിരിക്കും കോഴിയുടെ കൂവല്‍. ഉറക്കവും സമാധാനവും പോവുന്നതു കൊണ്ട് പലര്‍ക്കും ഇത് ദേഷ്യമാണ്.  

ചിന്തിച്ചിട്ടുണ്ടോ എന്താണ് ഇതിനു പിന്നിലെ കാരണമെന്ന്. വിദഗ്ധര്‍ പറയുന്നത് കോഴികളില്‍ ഒരു ബയോളജിക്കല്‍ ക്ലോക്ക്  ഉണ്ടെന്നാണ്. സര്‍ക്കാഡിന്‍ റിഥം എന്നാണ് ഇത് അറിയപ്പെടുന്നത്. കോഴികള്‍ പുലര്‍ച്ചെ കൂവുന്നതിനു കാരണം ഇതാണെന്നാണ് ഇവരുടെ അഭിപ്രായം. ഈ ക്ലോക്കുകളാണ് കോഴികളുടെ ശരീരത്തിന്റെ പ്രവര്‍ത്തനങ്ങളെ നിയന്ത്രിക്കുന്നത്. ഇവ കോഴിയുടെ തലച്ചോറിനു നല്‍കുന്ന സിഗ്നലുകളാണ് കോഴികൂവുന്നതിനുള്ള കാരണം.

അതായത് പുലര്‍ച്ചെ പതിയ്ക്കുന്ന സൂര്യവെളിച്ചം ആണ് ഈ ക്ലോക്കിനെ പ്രവര്‍ത്തനക്ഷമമാക്കുന്നത്. കോഴികളുടെ കണ്ണുകള്‍ സെന്‍സിറ്റീവായതിനാല്‍ സൂര്യപ്രകാശം തട്ടുമ്പോള്‍ തന്നെ ഇവയുടെ തലച്ചോറിലേക്ക് സിഗ്നലെത്തും. ഇതോടെ കോഴി കൂവും. മാത്രമല്ല, ബാക്കി കോഴികളെ ഉണര്‍ത്താനും കൂവല്‍ വിദ്യയാണ് ഇവര്‍ ഉപയോഗിക്കുന്നത്. പിടക്കോഴികളെ ആകര്‍ഷിക്കാനും പൂവന്‍കോഴി കൂവുകയാണ് ചെയ്യുക.

മറ്റു പക്ഷികളും അതിരാവിലെ അവരുടേതായ ശബ്ദങ്ങള്‍ പുറപ്പെടുവിക്കാറുള്ളതും നമ്മള്‍ കേള്‍ക്കാറുണ്ട്. കോഴി വളര്‍ത്തുപക്ഷി ആയതുമൂലം നാം അത് കൂടുതല്‍ ശ്രദ്ധിക്കുന്നതാവാം. പൂവന്‍കോഴിയാണ് നേതാവ്. മറ്റുകോഴികളെ ഉണര്‍ത്തേണ്ടത് തന്റെ കര്‍ത്തവ്യമായതിനാല്‍ തന്നെ ആദ്യം ഉണരുകയും മറ്റുള്ളവരെ ഉണര്‍ത്തുകയും ചെയ്യുന്നു. ചുരുക്കിപ്പറഞ്ഞാല്‍ കൂവുക എന്നത് പൂവന്റെയൊരു പൊതുസ്വഭാവമാണ്.