2025 ജൂണിലാണ് ഇന്ത്യ ഇംഗ്ലണ്ടിനെതിരായ അഞ്ച് ടെസ്റ്റ് മത്സരങ്ങളുടെ പരമ്പര കളിക്കുന്നത്. ഈ കലണ്ടർ ഇയറിൽ ഇന്ത്യ കളിയ്ക്കാൻ പോവുന്ന പ്രധാനപ്പെട്ട പരമ്പര കൂടിയാണിത്. ഈ പരമ്പരയിൽ ഇന്ത്യൻ ടീമിൽ അരങ്ങേറ്റം കുറിക്കാൻ സാധ്യതയുള്ള താരത്തെക്കുറിച്ച് സംസാരിക്കുകയാണ് സുനിൽ ഗവാസ്കർ. വെങ്കിടേഷ് അയ്യരെ ഇംഗ്ലണ്ടിനെതിരെയുള്ള പര്യടനത്തിൽ ഉൾപ്പെടുത്താൻ ഇന്ത്യ ശ്രദ്ധ കേന്ദ്രീകരിക്കണമെന്നാണ് സുനിൽ ഗവാസ്കർ പറഞ്ഞത്.

'മികച്ച ഓൾ റൗണ്ട് മികവും ലെഫ്റ്റ് ഹാൻഡ് കൊണ്ട് മികച്ച രീതിയിൽ ബാറ്റ് ചെയ്യാൻ കഴിവുമുള്ള വെങ്കിടേഷ് അയ്യരെ ഇന്ത്യ നിരീക്ഷിക്കണം. അദ്ദേഹത്തിന് ബൗളിങ്ങിലും മികച്ചത് നല്കാൻ കഴിയും. അവൻ ഇംഗ്ലണ്ടിൽ കളിച്ചിട്ടുണ്ട്. മാത്രമല്ല മികച്ചൊരു ഓപ്ഷനുമാണ്‌. അതുകൊണ്ട് അവൻ ഇംഗ്ലണ്ടിനെതിരെയുള്ള പരമ്പരയിൽ ഉണ്ടായിരിക്കണം,' സുനിൽ ഗവാസ്‌കർ പറഞ്ഞു.

വെങ്കിടേഷ് അയ്യർ 2024-ൽ ലങ്കാഷെയറിനായി കൗണ്ടി ചാമ്പ്യൻഷിപ്പ് കളിച്ചിട്ടുണ്ട്. മൂന്ന് മത്സരങ്ങളിൽ നിന്ന് 19.33 ശരാശരിയിൽ 116 റൺസ് ആയിരുന്നു താരം നേടിയത്. നവംബറിൽ കഴിഞ്ഞ ഇന്ത്യൻ പ്രീമിയർ ലീഗ് താരലേലത്തിൽ 23 കോടിക്കായിരുന്നു നിലവിലെ ചാമ്പ്യന്മാരായ കൊൽക്കത്ത നൈറ്റ് റൈഡേഴ്‌സ് വെങ്കിടേഷ് അയ്യരെ വീണ്ടും തങ്ങളുടെ തട്ടകത്തിലെത്തിച്ചത്.