മൂന്നാര്‍: എ.ടി.എം കൗണ്ടറില്‍ നിന്നു പണം തട്ടിയെടുത്ത രണ്ടു പ്രതികളെ പൊലിസ് അറസ്റ്റ് ചെയ്തു. കൊടുങ്ങല്ലൂര്‍ ചാപ്പാറ കടമറ്റത്ത് വീട്ടില്‍ ടി.വി ദില്‍മോന്‍(27), കൂത്താട്ടുകുളം ചോരക്കുഴി വെട്ടിക്കാട്ട് വീട്ടില്‍ റോണി (33) എന്നിവരെയാണ് മൂന്നാര്‍ പൊലിസ് അറസ്റ്റ് ചെയ്തത്. മൂന്നാര്‍ കണ്ണന്‍ ദേവന്‍ കമ്പനി കടലാര്‍ എസ്റ്റേറ്റിലെ തൊഴിലാളി മുരുകദാസി(52) ന്റെ ബാങ്ക ് അക്കൗണ്ടില്‍ നിന്നു 30000 രൂപയാണ് പ്രതികള്‍ കവര്‍ന്നത്.
സംഭവത്തെപ്പറ്റി പൊലിസ് പറയുന്നതിങ്ങനെ: വ്യാഴാഴ്ച ഉച്ചയ്ക്ക് 3 മണിയോടെ മുരുകദാസ് മൂന്നാര്‍ എസ്ബിഐ ശാഖയില്‍ പണയംവച്ച സ്വര്‍ണ്ണം തിരിച്ചെടുക്കാന്‍ എത്തി. ബാങ്കില്‍ തിരക്കായതിനാല്‍ പണം സി.ഡി.എം മുഖേന നിക്ഷേപിക്കാന്‍ അധിക്യതര്‍ ആവശ്യപ്പെട്ടു. മെഷീന്‍ മുഖേന പണമിടപാടുകള്‍ നടത്താന്‍ വശമില്ലാത്ത മുരുകദാസ് കൗണ്ടറില്‍ നിന്നിരുന്ന ദില്‍മോന്‍, റോണി എന്നിവരെ സമീപിച്ചു. ഇരുവരും പണം സി.ഡി.എമ്മില്‍ നിക്ഷേപിച്ചശേഷം അക്കൗണ്ടില്‍ പണമെത്തിയത് പരിശോധിക്കണമെന്ന വ്യാജേന എ.ടി.എം കാര്‍ഡ് ആവശ്യപ്പെട്ട് രഹസ്യ നമ്പര്‍ ചോദിച്ചറിഞ്ഞു. പണം അക്കൗണ്ടിലെത്തിയതായുള്ള രസീത് മുരുകദാസിന് കൈമാറിയശേഷം ഇരുവരും പണം തട്ടിയെടുക്കുകയായിരുന്നു.
ബാങ്കില്‍ മടങ്ങിയെത്തിയ മുരുകദാസ് സ്വര്‍ണ്ണം തിരിച്ചെടുക്കാന്‍ ശ്രമിക്കവെ പണം അക്കൗണ്ടിലില്ലെന്ന് ജീവനക്കാരന്‍ അറിയിച്ചു. തുടര്‍ന്ന് ബാങ്ക് അധിക്യതര്‍ സംഭവം പൊലിസിനെ അറിയിക്കുകയായിരുന്നു. എ.ടി.എം കൗണ്ടറിലെ സിസിടിവിയുടെ സഹായത്തോടെ വൈകുന്നേരം എട്ടു മണിയോടെ പ്രതികളെ ബാങ്കിന്റെ പരിസരത്തുനിന്ന് പൊലിസ് അറസ്റ്റ് ചെയ്തതു. മൂന്നാര്‍ ടൗണില്‍ ഹോംസ്‌റ്റേ നടത്തുകയാണ് പ്രതികള്‍. പ്രതികളെ കോടതിയില്‍ ഹാജരാക്കി റിമാന്റ് ചെയ്തു.