മസ്‌കത്ത്: 30 വര്‍ഷത്തിനു ശേഷം ചെമ്പ് കയറ്റുമതി പുനരാരംഭിച്ച് ഒമാന്‍. സൊഹാറിലെ ലസെയില്‍ ഖനിയില്‍ നിന്നാണ് ചെമ്പ് കയറ്റുമതി പുനരാരംഭിച്ചത്. ഏകദേശം 30 വര്‍ഷത്തിന് ശേഷം അതിന്റെ ആദ്യത്തെ കയറ്റുമതി. 

500,000 ടണ്‍ വാര്‍ഷിക ചെമ്പ് അയിര് ഉല്‍പ്പാദനം പ്രതീക്ഷിക്കുന്ന ലസൈല്‍ ഖനിയുടെ വികസനം ഒരു നിര്‍ണായക ചുവടുവെപ്പാണെന്ന് ഒമാന്‍ മിനറല്‍സ് ഡെവലപ്‌മെന്റ് കമ്പനി സിഇഒ മതര്‍ ബിന്‍ സലേം അല്‍ബാദി പറഞ്ഞു.
വൈകാതെ അല്‍ബൈദ ഖനിയും പ്രവര്‍ത്തനക്ഷമമാകുമെന്ന പ്രതീക്ഷയും അദ്ദേഹം പ്രകടിപ്പിച്ചു.

ആഗോള തലത്തില്‍ ചെമ്പിന് ആവശ്യക്കാര്‍ ഉയരുമെന്ന് പ്രതീക്ഷിക്കുന്നതിനാല്‍, ആഗോള ചെമ്പ് വിപണിയിലേക്കുള്ള ഒമാന്റെ ചെമ്പ് കയറ്റുമതി ശുദ്ധ ഊര്‍ജ്ജ സാങ്കേതികവിദ്യകള്‍, ഇലക്ട്രിക് വാഹനങ്ങള്‍, ബാറ്ററികള്‍ എന്നിവയ്ക്ക് നിര്‍ണായകമാണ്.

1990കളില്‍ ധാതുക്കളുടെ കൈവശവ്യവസ്ഥയില്‍ വന്ന പ്രതിസന്ധികളും ചെമ്പു സമ്പത്തിന്റെ ഉപയോഗശൂന്യതയും രാജ്യത്തെ ഈ വ്യവസായത്തില്‍ നിന്ന് പിന്‍വലിയാന്‍ പ്രേരിപ്പിച്ചത്. എന്നാല്‍ പുതിയ സാഹചര്യങ്ങളും സമ്പത്തിന്റെ പ്രാധാന്യത്തെ കുറിച്ചുള്ള പുതുക്കപ്പെട്ട ധാരണയും മൂലം ചെമ്പ് വ്യവസായം വീണ്ടും ഒമാന്റെ സാമ്പത്തികനീതി പുനര്‍ജ്ജീവിപ്പിക്കുന്നതിന് ഇടയാക്കിയിട്ടുണ്ട്.

പ്രാദേശിക ഖനനശേഷി ഉപയോഗപ്പെടുത്തുന്നതിലൂടെ ദശലക്ഷക്കണക്കിന് നിക്ഷേപങ്ങള്‍ ചെമ്പ് ഖനന മേഖലയിലേക്കും കയറ്റുമതി സംവിധാനങ്ങളിലേക്കും ഒഴുകിയെത്തുമെന്നാണ് പ്രതീക്ഷിക്കുന്നത്. ഇത് തൊഴില്‍സാധ്യതകളുടെ വ്യാപനത്തിനും പ്രാദേശിക വികസനത്തിനും വഴിയൊരുക്കും.