ഹൈദരാബാദ്: വിജയ് ഹസാരെ ട്രോഫിയിൽ മധ്യപ്രാദേശിനെതിരെ വെടിക്കെട്ട് ബാറ്റിങ്ങുമായി മുഹമ്മദ് ഷമി. ബംഗാളിന് വേണ്ടിയാണ് ഷമി മികച്ച പ്രകടനം പുറത്തെടുത്തത്. അവസാന ഓവറുകളായിൽ ഇറങ്ങി 34 പന്തിൽ 41 റൺസാണ് ഷമി നേടിയത്. അഞ്ചു ഫോറുകളും ഒരു സിക്സുമാണ് താരത്തിന്റെ ബാറ്റിൽ നിന്നും പിറന്നത്. 205 റൺസിന്‌ ഏഴ് വിക്കറ്റുകൾ എന്ന നിലയിൽ ബംഗാൾ തകർന്നുനിൽക്കുന്ന സമയത്താണ് ഷമി ക്രീസിൽ എത്തിയത്. പിന്നീട് കൗശിക് മെയ്തിയെ കൂട്ടുപിടിച്ചുകൊണ്ട് ബംഗാൾ സ്കോർ 269ൽ എത്തിക്കുകയായിരുന്നു ഷമി. 

2023 നവംബറിൽ ആണ് അവസാനമായി ഷമി ഇന്ത്യക്ക് വേണ്ടി കളിച്ചത്. പരുക്കിന്‌ പിന്നാലെ താരം ക്രിക്കറ്റിൽ നിന്നും ദീർഘകാലം പുറത്തായിരുന്നു. ഇപ്പോൾ പരുക്കിൽ നിന്നും മുക്തി നേടിക്കൊണ്ട് ഷമി വീണ്ടും ക്രിക്കറ്റിലേക്ക് തിരിച്ചുവരാൻ ഒരുങ്ങുകയാണ്. വരാനിരിക്കുന്ന ചാമ്പ്യൻസ് ട്രോഫിക്കുള്ള ഇന്ത്യൻ ടീമിൽ ഷമി ഇടം നെടുമോയെന്ന്‌ കണ്ടുതന്നെ അറിയണം.

അതേസമയം മധ്യപ്രദേശിനെതിരായ മത്സരത്തിൽ ഓപ്പണർ സുദീപ് കുമാർ ഘരാമിയും ബാംഗ്‌ലൈനായി മികച്ച പ്രകടനമാണ് നടത്തിയത്. 125 പന്തിൽ 99 റൺസാണ് സുദീപ് കുമാർ ഘരാമി നേടിയത്. സെഞ്ച്വറിക്ക് ഒരു റൺസ് അകലെ താരം പുറത്താവുകയായിരുന്നു. അഞ്ചു ഫോറുകളും ഒരു സിക്സുമാണ് താരം നേടിയത്.

സുദീപ് ചാറ്റർജി 57 പന്തിൽ 47 റൺസും നേടി. നാല് ഫോറുകൾ അടങ്ങുന്നതായിരുന്നു താരത്തിന്റെ ഇന്നിംഗ്സ്. മധ്യപ്രദേശ് ബൗളിങ്ങിൽ ആവേശ് ഖാൻ, ആര്യൻ പാണ്ഡെ എന്നിവർ രണ്ട് വീതം വിക്കറ്റും സാഗർ സോളങ്കി ഒരു വിക്കറ്റും നേടി.