ഗൗതം ഗംഭീറിന്റെ കീഴിൽ സമീപകാലങ്ങളിൽ ഇന്ത്യൻ ക്രിക്കറ്റ് ടീം നിരാശാജനകമായ പ്രകടനങ്ങളാണ് കാഴ്ചവെച്ചുകൊണ്ടിരിക്കുന്നത്. അടുത്തിടെ അവസാനിച്ച ബോർഡർ ഗവാസ്കർ ട്രോഫിയിൽ ഓസ്‌ട്രേലിയയോടും ഇന്ത്യ മോശം പ്രകടനമാണ് നടത്തിയത്. അഞ്ചു മത്സരങ്ങളുടെ പരമ്പര ഓസ്‌ട്രേലിയ 2-1നാണ് വിജയിച്ചത്.

ഈ തോൽവിയോടെ ഇന്ത്യ വേൾഡ് ടെസ്റ്റ് ചാമ്പ്യൻഷിപ്പിന്റെ ഫൈനലിൽ നിന്നും പുറത്താവുകയും ചെയ്തു. ഇപ്പോൾ ഈ മോശം പ്രകടനങ്ങൾക്ക് പിന്നാലെ ഗംഭീറിനെ വിമർശിച്ചുകൊണ്ട് മുന്നോട്ട് വന്നിരിക്കുകയാണ് മുൻ ഇംഗ്ലണ്ട് താരം മോണ്ടി പനേസർ. ഗംഭീറിന് പകരം ഇന്ത്യൻ ടെസ്റ്റ് ടീമിന്റെ പരിശീലകനായി വിവിഎസ് ലക്ഷ്മണിനെ നിയമിക്കണമെന്നാണ് മോണ്ടി പനേസർ പറഞ്ഞത്. 

'ഓസ്‌ട്രേലിയയിലെ ഗംഭീറിന്റെ പ്രകടനങ്ങളുടെ ശരാശരി കുറവാണ്. ഇംഗ്ലണ്ടിലും അദ്ദേഹത്തിന് നല്ല ശരാശരിയില്ല. പരിശീലകൻ എന്ന നിലയിൽ ഗംഭീർ ഇത് ഗൗരവമായി എടുക്കുന്നുണ്ടോ എന്ന് സെലക്ടർമാർ ചിന്തിക്കുമെന്ന് ഞാൻ കരുതുന്നു.  വിവിഎസ് ലക്ഷ്മണിനെ പോലെയുള്ള ഒരാളെ ടെസ്റ്റ് ടീമിന്റെ പരിശീലകനായി കൊണ്ടുവരുകയോ അല്ലെങ്കിൽ അദ്ദേഹത്തെ സഹായിക്കാൻ മികച്ച ഒരു ബാറ്റിംഗ് കോച്ചിനെ കൊണ്ടുവരുകയോ ചെയ്യണം. ഇത് ഏകദിനത്തിലും ട്വന്റി ട്വന്റിയിലും കൂടുതൽ ശ്രദ്ധ കേന്ദ്രീകരിക്കാൻ ഗംഭീറിന് കഴിയും,' മോണ്ടി പനേസർ പറഞ്ഞു.

ബോർഡർ ഗവാസ്‌കർ ട്രോഫിയിലേറ്റ തിരിച്ചടികളിൽ നിന്നും കരകയറാനുള്ള തയ്യാറെടുപ്പിലാണ് ഇന്ത്യൻ ടീം. സ്വന്തം തട്ടകത്തിൽ ഇംഗ്ലണ്ടിനെതിരായ പരമ്പരയാണ് ഇനി ഇന്ത്യയുടെ മുന്നിലുള്ളത്. അഞ്ച് ട്വന്റി ട്വന്റിയും മൂന്ന് ഏകദിനവുമാണ്‌ പാരമ്പരയിലുള്ളത്. ട്വന്റി ട്വന്റി പരമ്പര ജനുവരി 22 മുതൽ ഫെബ്രുവരി രണ്ട് വരെയാണ് നടക്കുക. 

ഏകദിന പരമ്പര ഫെബ്രുവരി ആറ് മുതൽ  ഫെബ്രുവരി 12 വരെയും നടക്കും. ഇത് കഴിഞ്ഞാൽ ചാമ്പ്യൻസ് ട്രോഫിയിൽ ആയിരിക്കും ഇന്ത്യ കളിക്കുക. ഫെബ്രുവരി 19 മുതൽ മാർച്ച് ഒമ്പത് വരെയാണ് ചാമ്പ്യൻസ് ട്രോഫി നടക്കുന്നത്.ചാമ്പ്യൻസ് ട്രോഫിയിൽ ഗ്രൂപ്പ് എയിൽ ആണ് ഇന്ത്യ ഉള്ളത്. ബംഗ്ലാദേശ്, പാകിസ്താൻ, ന്യൂസിലാൻഡ് എന്നീ ടീമുകളാണ് ഇന്ത്യക്കൊപ്പം ഉള്ളത്.