മുംബൈ: ബോളിവുഡ് നടന്‍ സെയ്ഫ് അലിഖാന് കുത്തേറ്റു. പരുക്കേറ്റ സെയ്ഫ് അലിഖാനെ മുംബൈ ലീലാവതി ആശുപത്രിയില്‍ പ്രവേശിപ്പിച്ചു. നടന്റെ ബാന്ദ്ര വെസ്റ്റിലെ വീട്ടില്‍  കവര്‍ച്ചക്കിടെ നടനെ അക്രമി കുത്തിയതായാണ് പുറത്തുവരുന്ന റിപ്പോര്‍ട്ടുകള്‍. ഇന്ന് പുലര്‍ച്ചെ രണ്ടരയോടെയാണ് സംഭവം.

നടനെ ശസ്ത്രക്രിയയ്ക്ക് വിധേയനാക്കിയെന്നും അപകടനില തരണം ചെയ്തതായും ആശുപത്രി അധികൃതര്‍ സ്ഥിരീകരിച്ചു. 

കുടുംബാംഗങ്ങള്‍ക്കൊപ്പം ഉറങ്ങിക്കിടക്കവെ മോഷ്ടാവ് അതിക്രമിച്ചുകയറിയതായാണ് മുംബൈ പൊലിസ് പറയുന്നത്. ശബ്ദം കേട്ട് ഉണര്‍ന്ന സെയ്ഫും അക്രമിയുമായുണ്ടായ മല്‍പ്പിടിത്തത്തിനിടെയാണ് താരത്തിന് പരുക്കേറ്റത്. ആറ് മുറിവുകളാണ് ശരീരത്തിലുള്ളത്. ഇതില്‍ രണ്ടെണ്ണം ഗുരുതരമാണെന്നും പൊലിസ് പറഞ്ഞു. 

പ്രതി ഉടന്‍ സ്ഥലത്ത് നിന്ന് ഓടി രക്ഷപ്പെട്ടു. സംഘര്‍ഷത്തിനിടെ, വീട്ടിലെ ജോലിക്കാരന് പരുക്കേറ്റതായും റിപ്പോര്‍ട്ടുണ്ട്. സംഭവത്തില്‍ അന്വേഷണം പുരോഗമിക്കുകയാണെന്ന് മുംബൈ പൊലിസ് അറിയിച്ചു.  മുംബൈ ക്രൈംബ്രാഞ്ചും സമാന്തര അന്വേഷണം നടത്തുന്നുണ്ട്.