ദുബൈ: യുഎഇ നിവാസിയായ യുവതിയെ വ്യാജ ഓണ്‍ലൈന്‍ വളര്‍ത്തു മൃഗങ്ങളെ വാങ്ങാനാകുന്ന ഒരു സംവിധാനം വഴി കബളിപ്പിച്ചതിന് കാമറൂണ്‍ പൗരനെ ദുബൈ കോടതി ശിക്ഷിച്ചു. പ്രതിയുടെ മേല്‍ 16,200 ദിര്‍ഹമാണ് കോടതി പിഴയായി ചുമത്തിയത്. 2022 അവസാനത്തോടെ നടന്ന സംഭവത്തില്‍, പൂച്ചക്കുട്ടിയെ ദത്തെടുക്കുന്നതിനായി തെറ്റായി പരസ്യം നല്‍കുകയും ഇരയെ കബളിപ്പിച്ച് 6,200 ദിര്‍ഹം കൈപ്പറ്റിയെന്നുമാണ് കേസ്.

കോടതി രേഖകള്‍ പ്രകാരം, പൂച്ചക്കുട്ടികളെ വാങ്ങാന്‍ വാഗ്ദാനം ചെയ്യുന്ന ഒരു ഓണ്‍ലൈന്‍ പരസ്യമാണ് ഇരയെ തട്ടിപ്പിലേക്കെത്തിച്ചത്. വെബ്‌സൈറ്റില്‍ നിന്ന് ഒരു പൂച്ചക്കുട്ടിയെ തിരഞ്ഞെടുത്തുവെന്നും തുടര്‍ന്നാണ് തട്ടിപ്പുകാരനുമായി വാട്‌സാപ്പില്‍ സംസാരിച്ചതെന്നുമാണ് ഇരയുടെ മൊഴി.

അബൂദബി ആസ്ഥാനമായുള്ള ഒരു സ്ഥാപനവുമായി ബന്ധിപ്പിച്ചിട്ടുള്ള വിശദമായ ബാങ്ക് വിവരങ്ങള്‍ നല്‍കി തന്റെ ബാങ്ക് അക്കൗണ്ടിലേക്ക് ഫീസായി 2,200 ദിര്‍ഹം പ്രാരംഭമായി അടയ്ക്കാന്‍ പ്രതി ആവശ്യപ്പെട്ടു. തുടര്‍ന്ന് യുവതി 2022 ഡിസംബര്‍ 30ന് തുക കൈമാറി.

ഇതിനെത്തുടര്‍ന്ന്, ഒരു ഡെലിവറി ബോയ് പൂച്ചക്കുട്ടിയെ ഇവരുടെ വസതിയിലേക്ക് കൊണ്ടുവരുമെന്ന് തട്ടിപ്പുകാരന്‍ പറഞ്ഞു. ഡെലിവറി ഏജന്റ് എന്ന് സ്വയം പരിചയപ്പെടുത്തി മറ്റൊരു വ്യക്തി ഇരയെ ബന്ധപ്പെട്ടു. പൂച്ചക്കുട്ടി 'വളരെ ചെറുതാണ്' എന്നും അവളുടെ ലൊക്കേഷനിലേക്കുള്ള ദൂരത്തിന് റീഫണ്ടബിള്‍ ഇന്‍ഷുറന്‍സ് ഡെപ്പോസിറ്റായി 4,000 ദിര്‍ഹം കൂടി വേണമെന്നും അയാള്‍ ഇവരെ അറിയിക്കുകയായിരുന്നു.

ഈ തുക അടുത്ത ദിവസം റാസല്‍ഖൈമ ആസ്ഥാനമായുള്ള ബാങ്കിലെ അക്കൗണ്ടിലേക്ക് ട്രാന്‍സ്ഫര്‍ ചെയ്തു. പൂച്ചക്കുട്ടിയെ എത്തിക്കാതിരിക്കുകയും ഇരുകൂട്ടരുമായുള്ള ആശയവിനിമയം നിലക്കുകയും ചെയ്തപ്പോഴാണ് താന്‍ വഞ്ചിക്കപ്പെട്ടുവെന്ന് ഇര തിരിച്ചറിഞ്ഞത്. വാട്ട്‌സ്ആപ്പ് സന്ദേശങ്ങളും പണമടച്ച രസീതുകളും ഉള്‍പ്പെടെയുള്ള തെളിവുകള്‍ സമര്‍പ്പിച്ച് ഇവര്‍ ഉടന്‍ തന്നെ ദുബൈ പോലീസില്‍ പരാതി നല്‍കി.

അന്വേഷണത്തില്‍, പദ്ധതിക്ക് പിന്നില്‍ ഒരു കാമറൂണ്‍ പൗരനാണെന്ന് അധികൃതര്‍ തിരിച്ചറിയുകയായിരുന്നു.

സോഷ്യല്‍ മീഡിയ പ്ലാറ്റ്‌ഫോമുകള്‍ വഴി ഓണ്‍ലൈനായി വളര്‍ത്തുമൃഗങ്ങളെ വില്‍ക്കുന്നതായും ബാങ്ക് ട്രാന്‍സ്ഫര്‍, ക്രിപ്‌റ്റോകറന്‍സി വഴി പേയ്‌മെന്റുകള്‍ സ്വീകരിക്കുന്നതായും ഇയാള്‍ സമ്മതിച്ചു. ഇരയുടെ മൊഴിയും അനുബന്ധ രേഖകളും അടിസ്ഥാനമാക്കി, ഓണ്‍ലൈന്‍ തട്ടിപ്പ് നടത്തിയ പ്രതിയെ ശിക്ഷിക്കാന്‍ മതിയായ തെളിവുകളുണ്ടെന്ന് കോടതി നിരീക്ഷിച്ചു.

പ്രതിക്ക് 16,200 ദിര്‍ഹം പിഴ ചുമത്തി. അതില്‍ ഇയാള്‍ക്കെതിരായ കുറ്റങ്ങള്‍ക്ക് 10,000 ദിര്‍ഹം പിഴയും കുറ്റകൃത്യത്തില്‍ ഉള്‍പ്പെട്ട തുകയായ 6,200 ദിര്‍ഹവും ഉള്‍പ്പെടുന്നു. പിഴയടച്ചില്ലെങ്കില്‍, ഓരോ 100 ദിര്‍ഹത്തിനും പ്രതി ഒരു ദിവസം തടവ് അനുഭവിക്കണം.

UAE; Court fined young man 16,200 dirhams for cheating by pretending to sell pet cat.