മുംബൈ: ഇംഗ്ലണ്ടിനെതിരെയായ അവസാന ടി-20യിൽ സെഞ്ച്വറി നേടി മിന്നും പ്രകടനമായിരുന്നു ഇന്ത്യൻ താരം അഭിഷേക് ശർമ്മ നടത്തിയത്. ഈ സെഞ്ച്വറിക്ക് പിന്നാലെ വലിയ അഭിനന്ദന പ്രവാഹങ്ങളാണ് ക്രിക്കറ്റ് ലോകത്തിൽ നിന്നും അഭിഷേകിന് ലഭിച്ചു കൊണ്ടിരിക്കുന്നത്. ഇപ്പോൾ തന്റെ ക്രിക്കറ്റ് കരിയർ ഇത്തരത്തിൽ ആവാൻ കാരണക്കാരനായ യുവരാജ് സിങ്ങിനെക്കുറിച്ച് സംസാരിക്കുകയാണ് അഭിഷേക് ശർമ്മ. 

'യുവി പാജി ആണ് മൂന്ന് നാല് വർഷം മുമ്പ് ഈ കാര്യങ്ങളെല്ലാം എൻ്റെ മനസ്സിൽ കൊണ്ടുവന്നത്. ഞാൻ പറയും അദ്ദേഹമാണ് എന്നെ വിശ്വസിച്ചതെന്ന്. അദ്ദേഹത്തെ പോലൊരാൾ നിങ്ങൾ ഇന്ത്യക്ക് വേണ്ടി കളിക്കുമെന്ന് പറയുമ്പോൾ ഞാൻ ഇന്ത്യക്ക് വേണ്ടി കളിക്കും മത്സരങ്ങൾ വിജയിക്കുമെന്നും എനിക്ക് തോന്നും. ഞാൻ അതിനായി പരമാവധി ശ്രമിച്ചു. എന്റെ കൂടെ ഇപ്പോഴും നിൽക്കുന്ന ആളാണ് അദ്ദേഹം. ഓരോ മത്സരങ്ങൾ കഴിയുമ്പോഴും ഞാൻ അദ്ദേഹവുമായി സംസാരിക്കാറുണ്ട്,' അഭിഷേക് ശർമ്മ പറഞ്ഞു. 

മത്സരത്തിൽ 54 പന്തിൽ 135 റൺസാണ് അഭിഷേക് അടിച്ചെടുത്തത്. 250 പ്രഹരശേഷിയിൽ 13 കൂറ്റൻ സിക്സറുകളും ഏഴ് ഫോറുകളുമാണ് താരത്തിന്റെ ബാറ്റിൽ നിന്നും പിറന്നത്. ഇന്റർനാഷണൽ ടി-20യിൽ ഇന്ത്യൻ താരത്തിന്റെ ഏറ്റവും ഉയർന്ന സ്കോർ ആണിത്. മത്സരത്തിൽ 150 റൺസിന്റെ കൂറ്റൻ വിജയമാണ് ഇന്ത്യ സ്വന്തമാക്കിയത്. അഭിഷേകിന്റെ സെഞ്ച്വറി കരുത്തിൽ 247 റൺസാണ് ഇന്ത്യ നേടിയത്. വിജയലക്ഷ്യം പിന്തുടർന്നിറങ്ങിയ ഇംഗ്ലണ്ട് 97 റൺസിന്‌ ഓൾ ഔട്ട് ആവുകയായിരുന്നു.