നീലേശ്വരം: ആശാപുര കമ്പനിക്ക് ബോക്‌സൈറ്റ് അനുമതി നല്‍കിയതായി പറയപ്പെടുന്ന കടലാടിപ്പാറയില്‍ കഴിഞ്ഞ കുറച്ചു ദിവസങ്ങളായി വരുന്ന അജ്ഞാത സംഘം ആരാണെന്ന ആശങ്കയിലാണു ജനങ്ങള്‍. ഇവര്‍ തദ്ദേശീയരല്ലെന്നാണു നാട്ടുകാര്‍ പറയുന്നത്.
കടലാടി ചെടി കാണാനും കടലാടിപ്പാറ കാണാനുമാണ് വന്നതെന്നായിരുന്നു ഇവര്‍ നാട്ടുകാരോടു പറഞ്ഞിരുന്നത്. എന്നാല്‍ ഇത് പഠനം നടത്താനെത്തിയ ആശാപുരയുടെ ആള്‍ക്കാരാണോയെന്നു സംശയമുണ്ടെന്നും ഇനിയും വന്നാല്‍ അവരെ തടയുമെന്നുമാണ് നാട്ടുകാരുടെ നിലപാട്.
അതേസമയം കടലാടിപ്പാറയില്‍ ബോക്‌സൈറ്റ് ഖനനത്തിനു അനുമതി ലഭിച്ചതായുള്ള ആശാപുര ജനറല്‍ മാനേജര്‍ സന്തോഷ് മേനോന്റെ പ്രസ്താവനയുടെ പശ്ചാത്തലത്തില്‍ ബന്ധപ്പെട്ട മന്ത്രിമാരെ നേരില്‍ കാണാനുള്ള സര്‍വകക്ഷി ജനകീയ സമിതിയുടെ തീരുമാനം നടപ്പിലാവാത്തതില്‍ ജനങ്ങള്‍ക്ക് അമര്‍ഷമുണ്ട്. ഓഗസ്റ്റ് ആദ്യ വാരത്തില്‍ മുഖ്യമന്ത്രിയേയും വ്യവസായ മന്ത്രിയേയും നേരില്‍ കണ്ട് സ്ഥിതിഗതികള്‍ ബോധിപ്പിക്കാന്‍ സര്‍വകക്ഷി ജനകീയ സമിതി തീരുമാനിച്ചിരുന്നു. എന്നാല്‍ മാസം ഒന്നു കഴിഞ്ഞിട്ടും ഇതു നടപ്പിലാവാത്തതാണ് ജനങ്ങളുടെ അമര്‍ഷത്തിനു കാരണമായത്.
പഞ്ചായത്ത് പ്രസിഡന്റ് എ വിധുബാല ചെയര്‍മാനും ഒ.എം ബാലകൃഷ്ണന്‍ കണ്‍വീനറുമായാണ് സര്‍വകക്ഷി ജനകീയ സമിതി രൂപീകരിച്ചിരിക്കുന്നത്. കടലാടിപ്പാറയില്‍ ഖനനം നടത്താന്‍ ആശാപുര മൈന്‍ കെം ലിമിറ്റഡിനെ അനുവദിക്കാത്തതിനു പിന്നില്‍ വലിയ ഇടപെടലുണ്ടെന്നും മന്ത്രി ചന്ദ്രശേഖരന്‍ പദ്ധതിയെക്കുറിച്ച് അഭിപ്രായം പറയേണ്ട ആളല്ലെന്നും കഴിഞ്ഞ ദിവസം സുപ്രഭാതത്തിനു നല്‍കിയ അഭിമുഖത്തില്‍ ആശാപുര ജനറല്‍ മാനേജര്‍ സന്തോഷ് മേനോന്‍ വ്യക്തമാക്കിയിരുന്നു.
വ്യവസായ മന്ത്രിയാണ് ഇക്കാര്യത്തില്‍ അഭിപ്രായം പറയേണ്ടതെന്നും അദ്ദേഹം പറഞ്ഞിരുന്നു.