ന്യൂഡല്‍ഹി: ഡല്‍ഹി നിയമസഭാ തെരഞ്ഞെടുപ്പില്‍ അപ്രതീക്ഷിത തിരിച്ചടിക്ക് പിന്നാലെ ആം ആദ്മി പാര്‍ട്ടിയേയും കോണ്‍ഗ്രസിനേയും രൂക്ഷമായി വിമര്‍ശിച്ച് ജമ്മു കശ്മിര്‍ മുഖ്യമന്ത്രിയും നാഷണല്‍ കോണ്‍ഫറന്‍സ് നേതാവുമായ ഒമര്‍ അബ്ദുള്ള. ഇനിയും പോരടിക്കൂ, പോരാടി പരസ്പരം അവസാനിപ്പിക്കൂ എന്നാണ് ഒമര്‍ അബ്ദുള്ള എക്‌സില്‍ കുറിച്ചത്. 

 'കുറച്ചുകൂടി പോരാടൂ, നിങ്ങളുടെ മനസിന് തൃപ്തിയാവുന്നത് വരെ പോരാടൂ, പരസ്പരം അവസാനിപ്പിക്കൂ' എന്ന് എഴുതിയ മീം ആണ് ജമ്മു കശ്മിര്‍ മുഖ്യമന്ത്രി പങ്കുവച്ചത്. ഇതിന് ക്യാപ്ഷനായി 'നിങ്ങള്‍ തമ്മിലടി തുടരൂ' എന്നും എഴുതിയിട്ടുമുണ്ട്.

ഡല്‍ഹിയില്‍ ലോക്സഭാ തെരഞ്ഞെടുപ്പില്‍ ഇന്ത്യ സഖ്യത്തിന്റെ ഭാഗമായി മത്സരിച്ച കോണ്‍ഗ്രസും ആം ആദ്മി പാര്‍ട്ടിയും നിയമസഭാ തെരഞ്ഞെടുപ്പില്‍ വെവ്വേറെ മത്സരിക്കാന്‍ തീരുമാനിക്കുകയായിരുന്നു.

ലോക്സഭാ തെരഞ്ഞെടുപ്പില്‍ ആകെയുള്ള 7 സീറ്റുകളില്‍ 4 ഇടത്ത് എ.എ.പിയും, 3 ഇടത്ത് കോണ്‍ഗ്രസും മത്സരിച്ചെങ്കിലും ഇന്ത്യാ മുന്നണി സമ്പൂര്‍ണ തോല്‍വി ഏറ്റുവാങ്ങി. ഇതോടെ നിയമസഭാ തെരഞ്ഞെടുപ്പില്‍ 70 സീറ്റിലും സഖ്യമില്ലാതെയാണ് കോണ്‍ഗ്രസും എ.എപിയും മത്സരിച്ചത്.എന്നാല്‍ സഖ്യം പിരിഞ്ഞിട്ടും വന്‍ തോല്‍വിയാണ് എ.എ.പിയും കോണ്‍ഗ്രസും നേരിട്ടത്. എക്‌സിറ്റ് പോള്‍ ഫലങ്ങളെ ശരിവെക്കുന്ന രീതിയിലാണ് ബി.ജെ.പി മുന്നേറിയത്. കോണ്‍ഗ്രസിന് ചിത്രത്തില്‍ പോലും ഇടം നേടാനായില്ല.