ദോഹ : ദേശീയ കായിക ദിനാഘോഷത്തിൻ്റെ ഭാഗമായി രാജ്യത്ത് പൊതു അവധി പ്രഖ്യാപിച്ചു ഖത്തർ അമീർ. "ഒരിക്കലും വൈകരുത്" ( Never Too Late) എന്ന ആശയത്തോടെയാണ് ഈ വർഷത്തെ ദേശീയ കായിക ദിനം ഖത്തർ ആചരിക്കുന്നത്. ദേശീയ കായിക ദിനത്തിന്റെ ഭാഗമായി നാളെ (ഫെബ്രുവരി 11)ഔദ്യോഗിക അവധിയായിരിക്കുമെന്ന് അമീരി ദിവാൻ പ്രസ്താവനയിൽ അറിയിച്ചു. എല്ലാ വർഷവും ഫെബ്രുവരി രണ്ടാം വാരത്തിലെ ചൊവ്വാഴ്ചയാണ് ദേശീയ കായിക ദിനമായി ആഘോഷിക്കുന്നത്.

കായിക ദിനത്തോടനുബന്ധിച്ച് ഖത്തർ നാഷനൽ ഒളിംപിക് കമ്മിറ്റി, ഖത്തർ ഫൗണ്ടേഷൻ, സ്പോർട്സ് ക്ലബ്ബുകൾ, മന്ത്രാലയങ്ങൾ, ഖത്തറിലെ പ്രമുഖ കമ്പനികൾ തുടങ്ങിയവയ്ക്ക് കീഴിൽ വിപുലമായ പരിപാടികളാണ് നാളെ നടക്കാൻ പോകുന്നത്. ഖത്തർ ഒളിംപിക് കമ്മിറ്റി (ക്യുഒസി) സംഘടിപ്പിക്കുന്ന ഹാഫ് മാരത്തൺ ലുസൈൽ ബൊളിവാർഡിൽ നടക്കും. 21 കിലോമീറ്റർ ഹാഫ് മാരത്തൺ, 10 കിലോമീറ്റർ ഓട്ടം, 5 കിലോമീറ്റർ ഓട്ടം, 6 മുതൽ 14 വയസ്സുവരെയുള്ള കുട്ടികൾക്കായി ഒരു കിലോമീറ്റർ ഫൺ റൺ തുടങ്ങിയ ഇനങ്ങളിലാണ് മത്സരം നടക്കുന്നത്.

ഹാഫ് മാരത്തൺ രാവിലെ ആറു മണിക്ക് ആരംഭിക്കും. 

10 കിലോമീറ്റർ ഓട്ടം ഏഴ് മണിക്കും നടക്കും. 

5 കിലോമീറ്റർ ഓട്ടം 7:30 നു ആരംഭിക്കും.

കുട്ടികൾക്കുള്ള ഒരു കിലോമീറ്റർ ഫൺ റൺ 8:30 നും നടക്കും.

 വിവിധ വിഭാഗങ്ങളിൽ വിജയികളാകുന്നവർക്ക് ക്യാഷ് അവാർഡ് ഉൾപ്പെടയുള്ള സമ്മാനങ്ങളും ഉണ്ടാകും.

 ഹാഫ് മാരത്തൺ മത്സരങ്ങളിൽ പങ്കെടുക്കനായി പ്രവാസികൾ ഉൾപ്പെടെ നൂറിലധികം രാജ്യങ്ങളിൽ നിന്നായി ആയിരങ്ങൾ പേര് റജിസ്റ്റർ ചെയ്തതായി QOC അറിയിച്ചു. 

 വനിതകൾക്കായി എജ്യുക്കേഷൻ സിറ്റി സ്റ്റേഡിയത്തിൽ വിമൻസ് ഫിറ്റ്നസ് ചലഞ്ച്, വനിതാ ഫുട്ബോൾ, ഓട്ടം എന്നിവയും സംഘടിപ്പിക്കും. ഓക്സിജൻ പാർക്കിലെ ഫാമിലി സോണിൽ കുട്ടികൾക്കും കുടുംബങ്ങൾക്കുമായി വിപുലമായ ഇനങ്ങളും ഉണ്ടാകും. ഇതോടൊപ്പം വികലാംഗർക്കുള്ള സ്‌പോർട്‌സ് പരിപാടികളും എജ്യുക്കേഷൻ സിറ്റിയിൽ നടക്കും.

കൂടാതെ കാണികൾക്കായും വിവിധ വിനോദ പരിപാടികൾ സംഘടിപ്പിക്കുന്നുണ്ട്. അത്‌ലറ്റിക്‌സ്, ഫുട്‌ബോൾ, ബാസ്‌ക്കറ്റ്‌ബോൾ, ഹാൻഡ്‌ബോൾ, ഷൂട്ടിങ്, വോളിബോൾ, ബോക്‌സിങ്, ആയോധനകല തുടങ്ങിയ കായിക ഇനങ്ങളാണ് കാണികൾക്ക് ആയി നടത്തുന്നത്.

  'വിസിറ്റ് ഖത്തർ' സംഘടിപ്പിക്കുന്ന ഫൺ റൺ നാളെ വൈകുന്നേരം 5.50 ന് മുശൈരിബ് ഡൗൺ ടൗണ്ണിൽ നടക്കും.

 ഖത്തർ നാഷനൽ ലൈബ്രറി സംഘടിപ്പിക്കുന്ന പരിപാടികൾ ഉച്ചക്ക് ഒരു മണി മുതൽ നാല് മണി വരെ നാഷണൽ ലൈബ്രറി ഹാളിൽ നടത്തും.

 ഖത്തർ സൈക്ലിസ്റ്റ് സെന്റ‍ർ കായിക ദിനപരിപാടികൾ എജ്യുക്കേഷൻ സിറ്റിയിലെ സെറിമോണിയൽ കോർട്ടിൽ നടക്കും. 

ഖത്തറിലെ വിവിധ സ്ഥാപനങ്ങളും കായിക കൂട്ടായ്മകളും പ്രവാസി സംഘടനകളും വിപുലമായ പരിപാടികളാണ് കായിക ദിനത്തിന്റെ ഭാഗമായി സംഘടിപ്പിക്കുന്നത്. 

Qatar announces public holiday for National Sports Day tomorrow