അഹമ്മദാബാദ്: ഇംഗ്ലണ്ടിനെതിരെയുള്ള മൂന്ന് ഏകദിന മത്സരങ്ങളുടെ പരമ്പരയിൽ മൂന്നും വിജയിച്ചുകൊണ്ട് ആധികാരികമായാണ് ഇന്ത്യ പരമ്പര സ്വന്തമാക്കിയത്. അവസാന മത്സരത്തിൽ 142 റൺസിന്റെ കൂറ്റൻ വിജയമാണ് ഇന്ത്യ സ്വന്തമാക്കിയത്. മത്സരത്തിൽ ആദ്യം ബാറ്റ് ചെയ്ത ഇന്ത്യ 356 റൺസാണ് നേടിയത്. വിജയലക്ഷ്യം പിന്തുടർന്ന ഇംഗ്ലണ്ട് 214 റൺസിൽ ഓൾ ഔട്ടാവുകയായിരുന്നു. ഈ പരമ്പര വിജയത്തോടെ ക്യാപ്റ്റനെന്ന നിലയിൽ രോഹിത് ശർമ്മ ഒരു തകർപ്പൻ നേട്ടമാണ് സ്വന്തമാക്കിയത്. 

ഏറ്റവും കൂടുതൽ ഏകദിന പരമ്പരകൾ വൈറ്റ്‌വാഷ് ചെയ്ത് വിജയങ്ങൾ സ്വന്തമാക്കുന്ന ഇന്ത്യൻ ക്യാപ്റ്റനായാണ് രോഹിത് മാറിയത്. രോഹിത് ശർമ്മയുടെ നേതൃത്വത്തിൽ ഇന്ത്യ നേടുന്ന നാലാമത്തെ വൈറ്റ്‌വാഷ് പരമ്പര ആയിരുന്നു ഇംഗ്ലണ്ടിനെതിരെ നേടിയത്. വെസ്റ്റ് ഇൻഡീസ് (2022), ശ്രീലങ്ക (2023), ന്യൂസിലാൻഡ് (2023) എന്നീ ടീമുകളെയാണ് രോഹിത് ശർമയുടെ കീഴിൽ ഇന്ത്യ പരാജയപ്പെടുത്തിയിരുന്നത്. മൂന്ന് തവണ എതിരാളികളെ സമ്പൂർണമായി പരാജയപ്പെടുത്തി പരമ്പരകൾ സ്വന്തമാക്കിയ മുൻ ഇന്ത്യൻ ക്യാപ്റ്റന്മാരായ എംഎസ് ധോണി, വിരാട് കോഹ്‌ലി എന്നിവരെ മറികടന്നാണ് രോഹിത് ഈ നേട്ടം സ്വന്തമാക്കിയത്. 

പരമ്പരയിലെ രണ്ടാം മത്സരത്തിൽ രോഹിത് സെഞ്ച്വറി നേടിയും തിളങ്ങിയിരുന്നു. മത്സരത്തിൽ 90 പന്തിൽ 119 റൺസാണ് രോഹിത് അടിച്ചെടുത്തത്. 12 ഫോറുകളും ഏഴ് സിക്സറുകളും അടങ്ങുന്നതായിരുന്നു രോഹിത്തിന്റെ തകർപ്പൻ ഇന്നിങ്‌സ്. ഇംഗ്ലണ്ട് ഉയർത്തിയ 304 റൺസ്  പിന്തുടർന്നിറങ്ങിയ ഇന്ത്യ രോഹിത്തിന്റെ സെഞ്ച്വറി കരുത്തിൽ നാല് വിക്കറ്റ് ബാക്കിനിൽക്കെ മറികടക്കുകയായിരുന്നു. 

ഇനി ഇന്ത്യയുടെ മുന്നിലുള്ളത് ഐസിസി ചാമ്പ്യൻസ് ട്രോഫിയാണ്. ഫെബ്രുവരി 19 മുതൽ മാർച്ച് ഒമ്പത് വരെയാണ് ചാമ്പ്യൻസ് ട്രോഫി നടക്കുന്നത്. ചാമ്പ്യൻസ് ട്രോഫിയിൽ ഗ്രൂപ്പ് എയിൽ ഇന്ത്യ, ബംഗ്ലാദേശ്, പാകിസ്താൻ, ന്യൂസിലാൻഡ് എന്നീ ടീമുകളാണ് ഉള്ളത്. ഗ്രൂപ്പ് ബിയിൽ ഓസ്ട്രേലിയ, ഇംഗ്ലണ്ട്, അഫ്ഗാനിസ്ഥാൻ, ദക്ഷിണാഫ്രിക്ക എന്നീ ടീമുകളുമാണ് ഉള്ളത്.

ഐസിസി ചാമ്പ്യൻസ് ട്രോഫി ഇന്ത്യൻ സ്‌ക്വാഡ് 

രോഹിത് ശർമ്മ (ക്യാപ്റ്റൻ), ശുഭ്മൻ ഗിൽ, വിരാട് കോഹ്‌ലി, ശ്രേയസ് അയ്യർ, കെഎൽ രാഹുൽ(വിക്കറ്റ് കീപ്പർ), റിഷബ് പന്ത്(വിക്കറ്റ് കീപ്പർ), ഹർദിക് പാണ്ഡ്യ, അക്സർ പട്ടേൽ, വാഷിംഗ്ടൺ സുന്ദർ, കുൽദീപ് യാദവ്, ഹർഷിത് റാണ, മുഹമ്മദ്. ഷമി, അർഷ്ദീപ് സിങ്, രവീന്ദ്ര ജഡേജ, വരുൺ ചക്രവർത്തി.