എവിടേക്കാ സ്വർണത്തിന്റെ പോക്ക് ? കുറച്ചു നാളുകളായി ആകെ പടർന്നു പിടിക്കുന്ന ഒരു ചോദ്യമാണിത്. കയ്യും കണക്കുമില്ലാതെയാണ് സ്വർണവില കുതിച്ചു കയറുന്നത്. ചുരുക്കി പറഞ്ഞാൽ ചരിത്രത്തിൽ തന്നെ ഏറ്റവും ഉയർന്ന നിരക്കുകളിൽ. വിപണിയെ മുൻനിർത്തുമ്പോൾ സ്വർണ വിലയിൽ ഇടിവ് സംഭവിക്കുന്നുണ്ടെങ്കിലും ആകെ വിപണയിയെ അവലോകനം ചെയ്‌താൽ സ്വർണ വില ഇനിയും കൂടും. സ്വർണ വിലയിലെ ഈ കുതിച്ചു ചാട്ടങ്ങൾക്ക് പിന്നിലെ കാരണങ്ങളെ കുറിച്ച് നിങ്ങൾ ആലോചിച്ചിട്ടുണ്ടോ? പരിശോധിക്കാം. 

സ്വർണ വില പല കാര്യങ്ങളുടെ അടിസ്ഥാനങ്ങളിലാണ് നിർവ്വചിക്കുക. സ്വർണത്തിന്റെ ആവശ്യം, പണപ്പെരുപ്പം, ഡോളറിന്റെ വിനിമയ നിരക്ക്,  ഇറക്കുമതി തീരുവ, പലിശ നിരക്ക് തുടങ്ങുന്ന കാര്യങ്ങളാണ് സ്വർണ വിലയെ പൊതുവെ സ്വാധീനിക്കുന്നത്. എളുപ്പമാക്കി പറഞ്ഞാൽ മേൽപറയുന്ന കാര്യങ്ങളാണ് സ്വർണത്തിന്റെ വിലയിൽ ഉയർച്ചയും താഴ്ചയുമൊക്കെ ഒരു പരിധി വരെ നിയന്ത്രിക്കുന്നത്. 

നിലവിൽ സ്വർണത്തിന്റെ ഈ കുതിച്ചു ചാട്ടങ്ങൾക്കു പിന്നിലുള്ള പ്രധാന കാരണം സ്വർണത്തിന്റെ ആവശ്യകത കൂടിയതാണ്. ഡൊണാൾഡ് ട്രംപ് അധികാരത്തിലേറിയത് മുതൽ അമേരിക്ക കൈ കൊള്ളുന്ന നിലപാടുകൾ ആഗോള വിപണിയെ പിടിച്ചു കുലുക്കിയിരുന്നു. ഒരു ആഗോള വ്യാപാര യുദ്ധം വരെ മുന്നിൽ കാണുന്ന സാഹചര്യത്തിൽ നിക്ഷേപകർ സ്വർണ്ണം വാങ്ങികൂട്ടാൻ തുടങ്ങി. പൊതുവെ സ്വർണത്തെ സുരക്ഷിത നിക്ഷേപ  മായാണ് പരിഗണിക്കുന്നത്. അതുകൊണ്ട് തന്നെ സ്വർണത്തിന്റെ ആവശ്യകതയുമേറി. 

സ്വർണം എങ്ങനെ സുരക്ഷിത നിക്ഷേപമാകുന്നു ? 
ലോകത്ത് പല മൂല്യത്തിൽ ഒട്ടേറെ നാണയങ്ങളും കറൻസികളും ലോഹങ്ങളുമൊക്കെയുണ്ടെങ്കിലും സ്വർണത്തെ പോലെ ആവശ്യകതയും നിത്യ ഉപയോഗവും മറ്റൊന്നിനുമില്ല എന്ന് തന്നെ വേണം പറയാൻ. ഇന്ത്യ പോലുള്ള രാജ്യങ്ങൾ അതിനേറെ ഉദാഹരണമാണ്. സാമൂഹ്യപരമായും സാംസ്കാരികമായും സ്വർണത്തോട് വളരെ അടുത്ത് നിൽക്കുന്നവരാണ് നമ്മൾ. തലമുറയിൽ നിന്ന് തലമുറയിലേക്കുള്ള കൈമാറ്റവും സ്വർണത്തിന് തന്റേതായ വ്യാപാര പദവി നൽകുന്നുണ്ട്. ലോകത്തെ പഴക്കം ചെന്ന ആസ്തികളിൽ ഒന്ന് കൂടെയാണ് സ്വർണ്ണം. സ്വർണം അതിന്റെ മൂല്യം സ്ഥിരമായി നിലനിർത്തുന്നു എന്ന് സാരം. സ്വർണത്തിന് എന്നും അതിന്റേതായ മൂല്യമുണ്ടെങ്കിലും  സ്വർണത്തെ എപ്പോഴും സുരക്ഷിത നിക്ഷേപമായി പരിഗണിക്കൽ സാധ്യമല്ല.

 കേരളത്തിൽ ഇന്ന് (13-02-2025) സ്വർണവിലയിൽ നേരിയ വർധനയാണ് ഉണ്ടായിരിക്കുന്നത്. ഒരു പവൻ സ്വർണത്തിന് 320 രൂപയാണ് വർധിച്ചത്. അതായത് പവൻ വാങ്ങാൻ 63840 രൂപയാണ് നൽകേണ്ടത്. ​ ഗ്രാമിന് 40 രൂപ കൂടി 7980 രൂപയായി. 

കേരളത്തിൽ ഈ മാസം (ഫെബ്രുവരി 2025) രേഖപ്പെടുത്തിയ ഏറ്റവും കുറഞ്ഞ പവൻ നിരക്ക് 61640 രൂപയാണ്. ഏറ്റവും  കൂടിയ നിരക്ക്  64480 രൂപയുമാണ്. വൻതോതിലുള്ള വിലക്കുറവ് ഇനി പ്രതീക്ഷിക്കണ്ടതില്ലെന്നാണ് വിദ​ഗ്ധർ ചൂണ്ടിക്കാട്ടുന്നത്. പകരം നേരിയ ചാഞ്ചാട്ടങ്ങൾക്കാണ് സാധ്യതയെന്നും അവർ പറയുന്നു.