തളിപ്പറമ്പ്: ദേശീയ പണിമുടക്കിനെത്തുടര്‍ന്ന് ഹോട്ടലുകള്‍ അടഞ്ഞതോടെ ഭക്ഷണം കിട്ടാതെ വലയുന്നവരെ തേടി തളിപ്പറമ്പ് റിക്രിയേഷന്‍ ക്ലബ് എത്തി. വാഹനത്തില്‍ പൊതിച്ചോറുമായി എത്തിയ പ്രവര്‍ത്തകര്‍ പൊതുസ്ഥലങ്ങളിലും ആശുപത്രികളിലും രോഗികള്‍ക്കും കൂട്ടിരിപ്പുകാര്‍ക്കും ഉച്ചഭക്ഷണമെത്തിച്ചു. താലൂക്ക് ആശുപത്രി, ലൂര്‍ദ്ദ് ആശുപത്രി, സഹകരണ ആശുപത്രി, ഗവ.ആശുപത്രി എന്നിവിടങ്ങളിലുള്‍പ്പെടെ 400 ലേറെ പേര്‍ക്കാണ് ഭക്ഷണമെത്തിച്ചത്. പ്രസിഡന്റ് സാബു ജോണ്‍, സെക്രട്ടറി ബിജു മുതുകുട, ഡോ. ഒ.വി സനല്‍, കെ രമേശന്‍, കെ കരുണാകരന്‍, കെ മോഹനചന്ദ്രന്‍ എന്നിവര്‍ നേതൃത്വം നല്‍കി.