ചാലക്കുടി: പോട്ടയിലെ ബാങ്കിൽ കത്തി കാട്ടി കവർച്ച നടത്തിയ പ്രതി പിടിയിൽ. ചാലക്കുടി ആശാരിക്കാട് സ്വദേശി റിജോ ആൻ്റണിയാണ് പിടിയിലായതെന്ന് പൊലിസ് വ്യക്തമാക്കി. പ്രത്യേക അന്വേഷണസംഘമാണ് ഇയാളെ പിടികൂടിയത്. ഇയാളിൽനിന്ന് പത്തുലക്ഷം രൂപ കണ്ടെടുത്തതായാണ് വിവരം. സംഭവം നടന്ന് 36 മണിക്കൂറുകൾക്ക് ശേഷമാണ് മോഷ്‌ടാവ് പിടിയിലായത്. കടം വീട്ടാനാണ് മോഷണം നടത്തിയതെന്നാണ് പ്രതിയുടെ മൊഴി. ഇയാൾ കുറ്റം സമ്മതിച്ചിട്ടുണ്ടെന്ന് പൊലിസ് അറിയിച്ചു.

ആഡംബര ജീവിതം നയിക്കുന്നയാളാണ് പ്രതിയെന്നും, ഈ ആഡംബര ജീവിതമാണ് കടബാധ്യതയുണ്ടാവാനുള്ള കാരണമെന്നും പൊലിസ് പറഞ്ഞു. വിദേശത്തുനിന്ന് ഭാര്യ അയച്ച പണം ധൂർത്തടിച്ച റിജോ, ഭാര്യ നാട്ടിലെത്താൻ സമയമായപ്പോഴാണ് കടം വീട്ടാനായി ബാങ്ക് കൊള്ളയടിച്ചത്. സ്വന്തം ബൈക്കിൽ വ്യാജനമ്പർ വെച്ചാണ് പ്രതി ഉപയോഗിച്ചതെന്നും പൊലിസ് പറഞ്ഞു. സിസിടിവി ദൃശ്യങ്ങളും ഫോൺകോളും പ്രതിയെ പിടികൂടുന്നതിൽ നിർണായകമായി. അതേസമയം, പിടിച്ചെടുത്ത പണം ബാങ്കിൽ നിന്ന് മോഷ്ടിക്കപ്പെട്ടതാണെന്ന് പൊലിസ് സ്ഥിരീകരിച്ചു.

വെള്ളിയാഴ്ച ഉച്ചക്കായിരുന്നു ചാലക്കുടിക്കടുത്ത് പോട്ടയിലെ ഫെഡറൽ ബാങ്ക് ശാഖയിൽ കവർച്ച നടന്നത്. കറുത്ത ഹെൽമെറ്റും ജാക്കറ്റും കൈയുറകളും ധരിച്ചായിരുന്നു പ്രതി മോഷണം നടത്തിയത്. ഹിന്ദി സംസാരിക്കുന്ന ആളായതിനാൽ റെയിൽവേ സ്റ്റേഷനും മറ്റും കേന്ദ്രീകരിച്ചും അന്വേഷണം നടത്തി. മുറി പൂട്ടിയശേഷം കാഷ് കൗണ്ടർ തോൾകൊണ്ട് ഇടിച്ചുതുറക്കാൻ ശ്രമിക്കുന്ന പ്രതിയുടെ സി.സി.ടി.വി. ദൃശ്യങ്ങൾ പുറത്തുവന്നിരുന്നു, പിന്നീട് കൈകൊണ്ട് ചില്ലുകൾ തകർത്താണ് പണം പ്രതി അപഹരിച്ചത്.

ചാലക്കുടി ഡിവൈ.എസ്.പി.യുടെ നേതൃത്വത്തിലാണ് പ്രതിക്കായുള്ള അന്വേഷണം നടന്നത്. എല്ലാ ടോൾ പ്ലാസകളിലും അയൽജില്ലകളിലും പൊലിസ് ജാഗ്രതാനിർദേശം നൽകിയിരുന്നു.

The accused in the Thrissur bank robbery has been arrested, revealing that he committed the crime to repay his debts.