അബൂദബി/ദുബൈ: മലയാളി യുവാവ് ദുബൈയിൽ നഗ്നപാദനായി ഓടിയത് 115 കിലോമീറ്റർ. സമുദ്ര പരിസ്‌ഥിതിയിലേക്കും ആരോഗ്യത്തിലേക്കും ലോകത്തിൻ്റെ ശ്രദ്ധ ക്ഷണിച്ചുകൊണ്ടാണ് കണ്ണൂർ കല്യാശേരി സ്വദേശിയും ദുബൈയിലെ സ്വകാര്യ കമ്പനിയിൽ ബിസിനസ് ഡവലപ്മെൻ്റ് മാനേജരുമായ ആകാശ് നമ്പ്യാരുടെ ഈ ഉദ്യമം. ബെയർഫുട്ട് മല്ലു എന്ന പേരിൽ സമൂഹമാധ്യമങ്ങളിൽ അറിയപ്പെടുന്ന ആകാശ് ഇത് മൂന്നാം തവണയാണ് യുഎഇയിൽ ഓടുന്നത്.

കഴിഞ്ഞ 2 തവണ ബെംഗളൂരുവിൽനിന്ന് എത്തിയായിരുന്നു ആകാശ് ഓടിയതെങ്കിൽ ഇതിനിടയിൽ ഹൃദയത്തിൽ കയറിക്കൂടിയ ദുബൈയിൽ തന്നെ ജീവിക്കാൻ തീരുമാനിക്കുകയായിരുന്നു ആകാശ്. വിവിധ രാജ്യക്കാർ സഹോദരങ്ങളെ പോലെ ജീവിക്കുകയും ജോലി ചെയ്യുന്നതുമായ സ്‌ഥലം. കൂടാതെ, ഓരോരുത്തരും ഇഷ്‌ടപ്പെടുന്ന വിനോദങ്ങൾക്ക് അനുയോജ്യമായ സംഘങ്ങൾ ദുബൈയിലുണ്ടെന്നതും ആകർഷണമായി.

യുഎഇ-ഒമാൻ അതിർത്തിയായ ഹത്തയിൽ നിന്ന് ഫെബ്രുവരി 15ന് രാവിലെ 6.15ന് ആരംഭിച്ച ഓട്ടം ദുബൈയിലെ മുഷ്റിഫ് പാർക്കിൽ എത്തുമ്പോഴേക്കും 17 മണിക്കൂർ പിന്നിട്ട് രാത്രി 11.05 ആയിരുന്നു. പരിസ്ഥിതി എൻജിഒ ആയ അസ്‌റാഖിൻ്റെയും സ്‌റ്റാർ ബാം, തായ് കൊക്കൊ, റൈഡ് ഡോട്ട് റെൻ്റ് തുടങ്ങിയവരുടെ സഹകരണത്തോടെയായിരുന്നു ഇത്തവണത്തെ ആകാശ് ഓടിയത്. 10 മണിക്ക് ലക്ഷ്യസ്ഥാനത്ത് എത്തുമെന്ന് പ്രതീക്ഷിച്ചതെങ്കിലും നഗരത്തിലെ ഗതാഗത കുരുക്ക് അൽപം വൈകുന്നതിലേക്ക് നയിച്ചു.

രാവിലത്തെ തണുപ്പിലായിരുന്നു ഓട്ടം ആരംഭിച്ചത്, എന്നാൽ പത്തുമണി ആയപ്പോഴേയ്ക്കും ചൂടിന് കാഠിന്യം കൂടിയത് അൽപം വെല്ലുവിളി ഉയർത്തി. ചെരുപ്പിടാതെയുള്ള ഓട്ടത്തിൽ ആകാശിന്റെ ഒരു കാൽപാദം വീർത്തു പൊട്ടുകയും പിന്നീട് പ്ലാസ്‌റ്റർ ഒട്ടിച്ചുമാണ് ഓടിയത്. ഒരു കാലിലെ പരുക്കും വച്ചുള്ള ഓട്ടം വലതുകാലിന് സമ്മർദം കൂട്ടുകയും മസിൽ പിടിക്കുകയും ചെയ്തെങ്കിലും ആകാശ് ലക്ഷ്യത്തിലേക്കുള്ള ഓട്ടം തുടർന്നു. അതേസമയം, കാലിലെ പരുക്കും ഓട്ടവും കണ്ടപ്പോൾ ട്രക്ക് ഡ്രൈവർമാർ ലിഫ്റ്റ് വാ​ഗാദാനം ചെയ്തതായും ആകാശ് പറയുന്നു.

പരിസ്ഥിതി ബോധവൽക്കരണത്തിന്റെ ഭാഗമായുള്ള ഓട്ടം ലക്ഷ്യസ്ഥാനം വരെ തുടരുമെന്ന് അറിയിച്ചതോടെ ട്രക്ക് ഡ്രൈവർമാർ സെൽഫിയെടുത്ത് ആകാശിനോട് യാത്ര പറയുകയായിരുന്നു. 30 കിലോമീറ്റർ ഇടവേളയിൽ 10 മിനിറ്റ് ബ്രേക്ക് എടുത്തായിരുന്നു ഓട്ടമെന്നും, ക്ഷീണം അകറ്റാൻ ഇളനീർ വെള്ളം മാത്രമാണ് കുടിച്ചതെന്നും ആകാശ് പറയുന്നു. മുൻപ്, 2023ൽ ആരോഗ്യമുള്ള മനുഷ്യരും ആരോഗ്യമുള്ള ഭൂമിയുമാണ് ലോകത്തിൻ്റെ ഭാവിക്ക് വേണ്ടതെന്ന സന്ദേശവുമായി 103.65 കിലോമീറ്റർ ആകാശ് ഓടിയിരുന്നു. അന്ന് ദുബൈ അൽഖുദ്ര മരുഭൂമിയിൽനിന്ന് ബുർജ് ഖലീഫ വരെയായിരുന്നു ആകാശിന്റെ ഉദ്യമം.

2020 ജനുവരി 25ന് ജീവിതശൈലി രോഗങ്ങളെ ഓടിത്തോൽപ്പിക്കണമെന്ന ആഹ്വാനത്തോടെ ആകാശ് അബൂദബിയിൽനിന്ന് ദുബൈയിലേക്ക് ഓടിയിരുന്നു. ദുബൈയിൽ മാത്രമല്ല ഇന്ത്യയ്ക്കകത്തും ശ്രീലങ്ക, ജപ്പാൻ, സ്പെയിൻ, പോർച്ചുഗൽ, അഫ്ഗാനിസ്ഥാൻ തുടങ്ങിയ രാജ്യങ്ങളിലും ആകാശ് ഓടിയിട്ടുണ്ട്. 

A young Malayali man completes an impressive 115 km barefoot run in Dubai, aiming to draw global attention to pressing environmental and health issues.