കരിപ്പൂർ: വിമാനയാത്രയ്ക്കിടെ ഹൃദയാഘാതമുണ്ടായ രണ്ട് വനിതകളെ ജീവിതത്തിലേക്കു തിരിച്ചെത്തിച്ച് ഡോക്ടർമാർ. ഹൃദയാഘാതത്തെ തുടർന്നു ശരീരം തളർന്ന എടവണ്ണ വെസ്‌റ്റ് ചാത്തല്ലൂരിലെ മണ്ടത്തൊടിക പള്ളിക്കുത്ത് ആയിഷ (76), ഫറോക്ക് സ്വദേശി പാത്തൈ എന്നിവരെയാണ് ആകാശത്തു ചികിത്സ നൽകി ഉംറ തീർഥാടക സംഘത്തിലെ നാല് ഡോക്‌ടർമാർ ജീവിതത്തിലേക്ക് തിരികെ കൊണ്ടുവന്നത്.

മഞ്ചേരി മെഡിക്കൽ കോളജിലെ ജനറൽ സർജൻ ബാസിം മേലേതൊടി, അദ്ദേഹത്തിന്റെ ഭാര്യ വണ്ടൂർ നിംസ് ആശുപത്രിയിലെ ഡെർമറ്റോളജിസ്‌റ്റുമായ മർജാൻ അബ്‌ദുൽ നസീർ, മർജാന്റെ സഹോദരിയും തൊട്ടിൽപാലം ഇഖ്റ ആശുപത്രിയിലെ ഇഎൻടി സ്പെഷലിസ്‌റ്റുമായ ഹഫീഫ അബ്ദുൽ നസീർ, ഹഫീഫയുടെ ഭർത്താവും കോഴിക്കോട് മെഡിക്കൽ കോളജിലെ ശിശുരോഗ വിദഗ്‌ധനുമായ സബീൽ അബ്ദു‌ല്ല എന്നിവരാണ് ആകാശത്ത് ഈ രണ്ട് യാത്രക്കാർക്ക് രക്ഷകരായത്.

കെഎൻഎമ്മിൻ്റെ നേതൃത്വത്തിലുള്ള ഉംറ തീർഥാടക സംഘത്തിലായിരുന്നു ഡോക്‌ടർമാരും ആയിഷയും ഉണ്ടായിരുന്നത്. സഊദി സമയം ഞായറാഴ്‌ച പുലർച്ചെയായിരുന്നു എയർ ഇന്ത്യ എക്‌സ്പ്രസ് വിമാനത്തിൽ ഇവർ നാട്ടിലേക്കു തിരിച്ചത്. കരിപ്പൂരിൽ വിമാനമിറങ്ങുന്നതിന് ഏകദേശം രണ്ട് മണിക്കൂർ മുൻപായിരുന്നു സംഭവം. ആയിഷയായിരുന്നു ആദ്യം  തളർന്നത്, തുടർന്ന് ഏറെനേരം പ്രാഥമിക ശുശ്രൂഷ നൽകിയെങ്കിലും ഇവർ ചലനമറ്റ നിലയിലായിരുന്നു.

തുടർന്ന്, വിമാനത്തിലെ ജീവനക്കാരെത്തി ചികിത്സാ ഉപകരണങ്ങൾ നൽകി. ഡോക്ടർമാരുടെ ഏറെ നേരത്തെ പരിശ്രമത്തിനൊടുവിലാണു രണ്ട് യാത്രക്കാർക്കും ജീവൻ തിരിച്ചു കിട്ടിയത്. മറ്റൊരു ഉംറ സംഘത്തിലുണ്ടായിരുന്ന ഫറോക്ക് സ്വദേശിനിയായ പാത്തെ എന്ന തീർഥാടകയും തളർന്നുവീണു, ഇവർക്കും ആവശ്യമായ ചികിത്സ നൽകി.

A team of Kerala doctors on board a flight sprang into action to save a passenger's life after she suffered a heart attack mid-air, providing timely medical treatment.