സൈബര്‍ ലോകം ഇപ്പോള്‍ ചര്‍ച്ച ചെയ്യുന്നത് ലോകത്തിലെ ഏറ്റവും മികച്ച എ.ഐ എന്ന് ടെക് ഭീമനും വ്യവസായിയും ടെസ്‌ല സ്ഥാപകനുമായ ഇലോണ്‍ മസ്‌ക് അവകാശപ്പെടുന്ന ഗ്രോക്ക് 3യെക്കുറിച്ചാണ്. ഇന്ന് രാവിലെയാണ് തത്സമയ പ്രദര്‍ശനത്തോടെ എക്‌സ്എ.ഐയുടെ ജനറേറ്റീവ് ആര്‍ട്ടിഫിഷ്യല്‍ ഇന്റലിജന്‍സ് ചാറ്റ്‌ബോട്ടായ ഗ്രോക്ക് 3 പുറത്തിറക്കിയത്.  പിന്നാലെ ചൂടന്‍ ചര്‍ച്ചകളും ആരംഭിച്ചു. 

മൈക്രോസോഫ്റ്റ് പിന്തുണയുള്ള ഓപ്പണ്‍ എ.ഐയ്ക്കും ആല്‍ഫബെറ്റിന്റെ ഗൂഗിളിനും വെല്ലുവിളിയുയര്‍ത്തി ഡീപ്‌സീക് തരംഗം കെട്ടുതീരുന്നതിന് മുന്നെയുള്ള ഗ്രോക്ക് 3 യുടെ കടന്നു വരവ് എ.ഐ സാധ്യതകളെ മുന്‍നിര്‍ത്തുന്ന വിപണികളില്‍ വലിയ ചലനങ്ങള്‍ സൃഷ്ടിക്കുമെന്നാണ് വിലയിരുത്തുന്നതെങ്കിലും പഴയ കാര്യങ്ങള്‍ ഓര്‍ക്കുന്നത് നല്ലതാണ്.

അതായത് 2024ല്‍ ഗ്രോക്കിന് വേണ്ടി ഉപയോക്തളുടെ വിവരങ്ങള്‍ എക്‌സ് ചോര്‍ത്തിയതായി റിപ്പോര്‍ട്ടുകളുണ്ടായിരുന്നു. ഗ്രാക്കിന്റെ പരിശീലനത്തിന് വേണ്ടിയായിരുന്നു വിവരശേഖരണം. ഉപഭോക്താക്കള്‍ക്ക് അവരുടെ വിവരങ്ങള്‍ ഗ്രോക്കിന് നല്‍കണോ എന്ന് തീരുമാനിക്കാനുള്ള സൗകര്യമുണ്ടെങ്കിലും അത്തരം ഒരു ഓപ്ഷനുള്ളത് ഉപഭോക്താക്കളെ കൃത്യമായി അറിയിച്ചിരുന്നില്ല. മാത്രമല്ല ഇത് ഡിഫോള്‍ട്ട് ആയി എക്‌സ് ഓണ്‍ ചെയ്തുവെക്കുകയും ചെയ്തിട്ടുണ്ട്. ഡാറ്റാ പങ്കുവെക്കാനുള്ള ഓപ്ഷന്‍ അനുവാദമില്ലാതെ ഓണ്‍ ചെയ്തുവെച്ചതാണ് എക്‌സിനെതിരെ വ്യാപകമായ പ്രതിഷേധമുയരാന്‍ കാരണമായിരിക്കുന്നത്. 

 ഓപ്ഷന്‍ അനുവാദമില്ലാതെ ഓണ്‍ ചെയ്തുവെച്ചതില്‍ എക്‌സിനെതിരെ വ്യാപകമായ പ്രതിഷേധമുയര്‍ന്നിരുന്നു. ഇത്തരത്തില്‍ ഭാവിയില്‍ മറ്റെന്തിന്റെയെങ്കിലും പരീക്ഷണത്തിനായി ഗ്രോക്ക് ഉപയോക്താക്കളുടെ ഡാറ്റയും ഉപയോഗിച്ചേക്കാം എന്ന സാധ്യത തള്ളിക്കളയാനാകില്ല.

അതേസമയം ലോകം ഭരിക്കുന്ന ടെക് ഭീമന്മാരുടെ തുറന്ന എ.ഐ യുദ്ധമാണ് വരും നാളുകളില്‍ അരങ്ങേറാന്‍ പോകുന്നതെന്നാണ് സൈബര്‍ വിദഗ്ധര്‍ പറയുന്നത്. ഓപ്പണ്‍ എ.ഐയുടെ സി.ഇ.ഒ സാം ആള്‍ട്ട്മാനുമായി കഴിഞ്ഞ ദിവസങ്ങളിലുണ്ടായ പോര്‍വിളിയും അതുമായി ബന്ധപ്പെട്ട വാര്‍ത്തകളും ഇപ്പോഴും നിറഞ്ഞു നില്‍ക്കുകയാണ്. കഴിഞ്ഞ ദിവസം 97.4 ബില്യണ്‍ ഡോളറിന് കമ്പനിയെ ഏറ്റെടുക്കാന്‍ താല്‍പര്യം പ്രകടിപ്പിച്ച് മസ്‌കും സംഘവും ഓപ്പണ്‍ എ.ഐയെ സി.ഇ.ഒ സാം ആള്‍ട്ട്മാനെ സമീപിച്ചിരുന്നു. വേണമെങ്കില്‍ മസ്‌കിന്റെ എക്‌സ് വിലക്കെടുക്കാമെന്നായിരുന്നു ആള്‍ട്ട്മാന്റെ പ്രതികരണം.