കുവൈത്ത് സിറ്റി: റിയല്‍ എസ്റ്റേറ്റ് മേഖലയില്‍ വമ്പന്‍ ശകിതിയായി വളര്‍ന്ന യുഎഇയുടെ പാത പിന്തുടരാന്‍ തീരുമാനിച്ച് കുവൈത്ത് സര്‍ക്കാരും. യുഎഇയെ അനുകരിച്ച് വിദേശികളെ കെട്ടിടങ്ങളും വീടുകളും സ്വന്തമാക്കാന്‍ അനുവദിക്കുന്ന പുതിയ ചട്ടത്തിന് കുവൈത്ത് സര്‍ക്കാര്‍ അംഗീകാരം നല്‍കി. കുവൈത്ത് പൗരന്‍മാര്‍ക്ക് അല്ലാതെ രാജ്യത്ത് കെട്ടിടങ്ങളുടെ ഉടമസ്ഥാവകാശം നല്‍കില്ലെന്ന 1979 ലെ നിയമമാണ് സര്‍ക്കാര്‍ പൊളിച്ചെഴുതിയത്. 

ജിസിസി രാജ്യങ്ങള്‍ക്കിടയില്‍ യുഎഇ വര്‍ഷങ്ങള്‍ക്ക് മുമ്പുതന്നെ രാജ്യത്ത് വിദേശികള്‍ക്ക് സ്വത്ത് ഉടമാവകാശത്തിന് അനുമതി നല്‍കിയിരുന്നു. അടുത്ത കാലത്തായി ഖത്തറും സഊദി അറേബ്യയും യുഎഇയുടെ പാത പിന്തുടരാനുള്ള ശ്രമങ്ങള്‍ക്ക് തുടക്കം കുറിച്ചിരുന്നു. കുവൈത്തിന്റെ റിയല്‍ എസ്‌റ്റേറ്റ് മേഖലയിലും സമ്പദ്ഘടനയിലും സമൂലമായ മാറ്റം കൊണ്ടുവരാന്‍ പുതിയ നിയമഭേദഗതിക്കാകുമെന്നാണ് കുവൈത്ത് സര്‍ക്കാര്‍ കരുതുന്നത്.

അറബ് പൗരന്‍മാര്‍ക്ക് കുവൈത്തിലുള്ള സ്വത്ത് വില്‍പ്പന നടത്താന്‍ അനുമതി നല്‍കുന്നതാണ് ഭേദഗതിയിലെ മറ്റൊരു പ്രധാന കാര്യം. ജിസിസി രാജ്യങ്ങളിലുള്ളവര്‍ക്ക് മാതാപിതാക്കളില്‍ നിന്നോ മറ്റോ പരമ്പരാഗതമായി ലഭിച്ച സ്വത്തുവകകള്‍ രണ്ടു വര്‍ഷത്തിനുള്ളില്‍ വില്‍പ്പന നടത്താവുന്നതാണ്. കുവൈത്ത് സ്റ്റോക്ക് എക്‌സ്‌ചേഞ്ചില്‍ ലിസ്റ്റ് ചെയ്ത കമ്പനികള്‍ക്ക് സ്ഥലം വാങ്ങുന്നതിനും കെട്ടിടം നിര്‍മിക്കുന്നതിനുള്ള അനുമതിയും പുതിയ ഭേദഗതിയിലുണ്ട്. കച്ചവട ആവശ്യങ്ങള്‍ക്കും ജീവനക്കാര്‍ക്കുള്ള താമസ സൗകര്യത്തിനും മാത്രമാണ് കെട്ടിടം നിര്‍മിക്കാന്‍ അനുവാദമുള്ളത്. വില്‍പ്പന ലക്ഷ്യമിട്ടു കൊണ്ടുള്ള റിയല്‍ എസ്റ്റേറ്റ് നിര്‍മാണത്തിന് അനുവാദമില്ല.

കുവൈത്തില്‍ സ്വത്തവകാശമുള്ള കമ്പനികളുടെ ഓഹരികള്‍ സ്വന്തമാക്കുന്നതിന് വിദേശികള്‍ക്ക് പുതിയ ചട്ട ഭേദഗതി അനുമതി നല്‍കുന്നു. അതേസമയം, ഇത്തരം കമ്പനികള്‍ അടച്ചു പൂട്ടുകയാണെങ്കില്‍ കമ്പനിയുടെ ആസ്തികളില്‍ വിദേശികള്‍ക്ക് അവകാശം ലഭിക്കില്ല എന്നും ഭേദഗതിയില്‍ പ്രത്യേകം പരാമര്‍ശിക്കുന്നു. പണമായി മാത്രമേ നിക്ഷേപം തിരിച്ചെടുക്കാന്‍ കഴിയുകയുള്ളൂ. റിയല്‍ എസ്റ്റേറ്റ് മേഖലയില്‍ ഊഹക്കച്ചവടം അനുവദിക്കില്ലെന്ന് സര്‍ക്കാര്‍ ഉത്തരവില്‍ വളരെ സുവ്യക്തമായി പറയുന്നു. കുവൈത്തിന്റെ വളര്‍ച്ചക്കും ഭാവിയില്‍ റിയല്‍ എസ്റ്റേറ്റ് മേഖലയുടെ കുതിപ്പിനും സഹായകമാകുന്ന രീതിയിലുള്ള റിയല്‍ എസ്റ്റേറ്റ് ഉപയോഗമാണ് രാജ്യ ലക്ഷ്യം വയ്ക്കുന്നതെന്നും കുവൈത്ത് സര്‍ക്കാര്‍ പുറപ്പെടുവിച്ച ഉത്തരവില്‍ പറയുന്നു.

Foreigners can now own buildings in Kuwait too, following the relaxations in the rules