തിരുന്നാവായ: ഹൈസ്‌കൂള്‍ അനുബന്ധ പ്രൈമറി സ്‌കൂളുകളില്‍ അധ്യയന ദിവസങ്ങള്‍ കുറയുന്നതിനാല്‍ പാഠഭാഗങ്ങള്‍ പൂര്‍ണമായി തീര്‍ക്കാനാവാതെ അധ്യാപകര്‍. വാര്‍ഷിക പരീക്ഷ നടക്കുന്നത് തന്നെ പാഠഭാഗങ്ങള്‍ പൂര്‍ത്തിയാക്കാതെയാണ്. 200 അധ്യയന ദിവസങ്ങള്‍ ഉറപ്പുനല്‍കുമെന്ന വിദ്യാഭ്യാസ വകുപ്പിന്റെ വാഗ്ദാനവും പാലിക്കപ്പെടുന്നില്ല. മൂന്ന് പാദങ്ങളിലെയും പരീക്ഷാ ദിനങ്ങളും കലാ-കായിക, മറ്റു പഠനാനുബന്ധ പ്രവര്‍ത്തിദിനങ്ങളും ഉള്‍പ്പെടെ ഈ വിഭാഗം സ്‌കൂളുകളില്‍ 170 പ്രവര്‍ത്തിദിനങ്ങള്‍ മാത്രമാണ് ലഭിക്കുന്നത്.

അതേ സമയം സ്വതന്ത്രമായ പ്രൈമറി സ്‌കൂളുകളില്‍ 195 ദിവസം വരെ ലഭിക്കുന്നുണ്ട്. 
അധ്യയന വര്‍ഷാരംഭത്തില്‍ നടത്തേണ്ട പഠനോത്സവങ്ങളും രേഖകളില്‍ മാത്രമാണുള്ളത്. ഈ അധ്യയന വര്‍ഷം പരിഷ്‌കരിച്ചിറക്കിയ ഒന്ന്, മൂന്ന്, അഞ്ച്, ഏഴ് ക്ലാസുകളിലെ പാഠ പുസ്തകങ്ങളിലെ പ്രവര്‍ത്തന വൈപുല്യം കൊണ്ട് പാഠഭാഗങ്ങള്‍ പരീക്ഷയ്ക്ക് മുമ്പ് എടുത്ത് തീര്‍ക്കാന്‍ അധ്യാപകര്‍ ബുദ്ധിമുട്ടുകയാണ്. 
സ്വതന്ത്രമായ പ്രൈമറി സ്‌കൂളുകളില്‍ പോലും പാഠഭാഗങ്ങള്‍ തീര്‍ക്കുന്നതിന് മുമ്പ് എല്‍.എസ്.എസ്, യു.എസ്.എസ് സ്‌കോളര്‍ഷിപ്പ് പരീക്ഷകള്‍ നടത്തുന്നത് സംബന്ധിച്ചും പരാതികള്‍ ഉയര്‍ന്നിട്ടുണ്ട്.

 മുന്‍ കാലങ്ങളില്‍ ജനുവരി മാസം വരെയുള്ള പാഠഭാഗങ്ങളില്‍ നിന്ന് മാത്രമായിരുന്നു ഈ പരീക്ഷയ്ക്ക് ചോദ്യങ്ങള്‍ വന്നിരുന്നതെങ്കില്‍ ഈ വര്‍ഷം മുതല്‍ അതിലും മാറ്റം വരുത്തിയിട്ടുണ്ട്. മാര്‍ച്ച് ഇരുപതിന് തീരേണ്ട പാഠഭാഗങ്ങളില്‍ നിന്ന് ഫെബ്രുവരി 27ന് തന്നെ സ്‌കോളര്‍ഷിപ്പ് പരീക്ഷ നടത്തുകയാണ്.
ഈ സ്‌കൂളുകളില്‍ എസ്.എസ്.എല്‍.സി ക്ലാസുകള്‍ക്ക് മാത്രമാണ് പ്രാധാന്യം നല്‍കുന്നത്.

അവധി ദിവസങ്ങളിലും അധിക പ്രവര്‍ത്തി സമയങ്ങളിലും ക്ലാസുകള്‍ വച്ചാണ് ഇവര്‍ക്ക് പാഠഭാഗങ്ങള്‍ ഡിസംബറില്‍ പൂര്‍ത്തിയാക്കുന്നത്. ഇതിനിടയില്‍ എട്ട്, ഒന്‍പത്, പ്രൈമറി ക്ലാസുകള്‍ അപ്രധാനമായിപ്പോവുകയാണ്. എസ്.എസ്.എല്‍.സിക്കാരുടെ വിവിധ പരീക്ഷകള്‍ക്കായി നഷ്ടപ്പെടുന്നതും ഇവരുടെ പ്രവര്‍ത്തിദിനങ്ങളാണ്. 

മിനിമം മാര്‍ക്ക് നേടാത്തവരെ അതിന് പ്രാപ്തരാക്കി ലക്ഷ്യത്തിലെത്തിക്കാനും അധ്യാപകര്‍ക്ക് നിര്‍ദേശമുണ്ട്. എന്നാല്‍ ഇതെല്ലാം രേഖകള്‍ നിര്‍മിക്കുന്ന പ്രക്രിയയാകാന്‍ മാത്രമാണ് സാധ്യതയുള്ളത്. പ്രവര്‍ത്തിദിനങ്ങളുടെ എണ്ണം രേഖകളിലൊതുക്കാതെ പാഠഭാഗങ്ങള്‍ പൂര്‍ണമായ വിധത്തില്‍ കുട്ടികളില്‍ എത്തിക്കുന്നതിന് മതിയായ അധ്യയ ദിനങ്ങള്‍ ഉറപ്പുവരുത്തണമെന്നാണ് അധ്യാപകരുടെ അഭിപ്രായം.