ന്യൂഡൽഹി: ഇന്ത്യയിൽ ലോകത്തിലെ ഏറ്റവും നീളം കൂടിയ ഹൈപ്പർലൂപ്പ് ടെസ്റ്റ് ട്രാക്ക് നിർമ്മിക്കാൻ തയ്യാറാകുന്നു. ഇന്ത്യൻ റെയിൽവേയുടെ പിന്തുണയോടെ,ഐ.ഐ.ടി മദ്രാസ് 422 മീറ്റർ ദൈർഘ്യമുള്ള വിജയകരമായ പരീക്ഷണത്തെ തുടർന്ന് പദ്ധതി ആരംഭിക്കാനുള്ള തയ്യാറെടുപ്പുകൾ തുടങ്ങിയതായി കേന്ദ്ര റെയിൽവേ മന്ത്രി അശ്വിനി വൈഷ്ണവാണ് ഇക്കാര്യം സമൂഹ മാധ്യമത്തിലൂടെ അറിയിച്ചത്.

ഹൈപ്പർലൂപ്പ് സാങ്കേതികവിദ്യ ഗതാഗതത്തിൽ വിപ്ലവകരമായ മാറ്റം വരുത്തി 1,100 കിലോമീറ്റർ വേഗത കൈവരിക്കും. ഇതിലൂടെ കൂടുതൽ കാര്യക്ഷമതയും ചെലവ്-ഫലപ്രാപ്തിയും വർദ്ധിപ്പിക്കാനാകും. നിർമിക്കാൻ പോകുന്ന ഹൈപ്പർലൂപ്പ് പരീക്ഷണ സൗകര്യം ലോകത്തിലെ ഏറ്റവും നീളം കൂടിയതാകുമെന്നാണ് കരുതുന്നത്. ഈ ഗതാഗത സംവിധാനത്തിനായി 40-50 കിലോമീറ്റർ ദൈർഘ്യമുള്ള വാണിജ്യ പ്രവർത്തന സാധ്യതകൾ പരിശോധിക്കാനാണ് പദ്ധതിയെന്ന് ഉദ്യോഗസ്ഥർ വ്യക്തമാക്കുന്നു.മദ്രാസ് ഐ.ഐ.ടി.യുടെ ഡിസ്‌കവറി കാംപസിലാണ് 422 മീറ്റര്‍ നീളമുള്ള ട്രാക്ക് ഒരുക്കിയത്. രാജ്യത്തെ ആദ്യത്തെ ഹൈപ്പര്‍ലൂപ്പ് പരീക്ഷണ ട്രാക്കെന്ന സവിശേഷതകൂടി ട്രാക്കിനുണ്ട്.

കുറഞ്ഞ മർദ്ദമുള്ള ട്യൂബുകളിൽ വായു വഹിക്കുന്ന പ്രതലങ്ങൾ ഉയർത്തുന്ന കാപ്സ്യൂളുകൾ ഉപയോഗിച്ച് പ്രവർത്തിക്കുന്ന ഹൈപ്പർലൂപ്പ് ഗതാഗത ശൃംഖല വികസിപ്പിക്കുന്നതിൽ ലോകമെമ്പാടും നിരവധി സാങ്കേതിക പരീക്ഷണങ്ങൾ നടക്കുന്നു. ഇന്ത്യയിലും ഈ മേഖലയിൽ കാര്യക്ഷമമായ മുന്നേറ്റം സംഭവിച്ചിരിക്കുകയാണ്. 422 മീറ്റർ വാക്വം ട്യൂബ് പരീക്ഷണ സൗകര്യത്തിന്റെ നിർമ്മാണം എൽ ആൻഡ് ടി കൺസ്ട്രക്ഷൻസ്, ഇന്ത്യൻ റെയിൽവേ, അവിഷ്‌കർ ഹൈപ്പർലൂപ്പ്, ഐഐടി മദ്രാസ് എന്നിവയുടെ കൂട്ടായ ശ്രമത്തിന്റെ ഫലമായിരുന്നു. തിങ്കളാഴ്ച ഐഐടി മദ്രാസിലെ ഡീപ്-ടെക് സ്റ്റാർട്ടപ്പായ ട്യൂട്ടർ ഹൈപ്പർലൂപ്പ് ഇന്ത്യയിലെ ആദ്യ വാണിജ്യ ഇന്റന്റ് ഹൈപ്പർലൂപ്പ് പോഡ് പരീക്ഷണം വിജയകരമായി പൂർത്തിയാക്കി.ഇതോടെ വെറും 30 മിനിറ്റിനുള്ളിൽ 300 കിലോമീറ്റർ മുതൽ 400 കിലോമീറ്റർ വരെ യാത്ര ചെയ്യാനാകും . അതായത് തിരുവനന്തപുരം മുതൽ കാസർ​ഗോഡ് വരെ യാത്ര ചെയ്യാൻ ചുരുങ്ങിയത് ഒരു മണിക്കൂർ മാത്രം മതിയാകും. ഇത് വിമാനത്തെക്കാൾ വേ​ഗത്തിൽ സഞ്ചരിക്കാനാകും. ദീർഘദൂര യാത്രകൾക്ക് ആശ്രയിക്കാവുന്ന ഏറ്റവും വേ​ഗതയേറിയ ​ഗതാ​ഗത സംവിധാനമായി മാറും.