തിരുവനന്തപുരം: തിരുവനന്തപുരം മെഡിക്കൽ കോളേജുമായി ബന്ധപ്പെട്ടുള്ള വിവാദങ്ങൾ തുടരുന്നതിനിടയിൽ മെഡിക്കൽ ലീവിലായിരുന്ന ഡോ. ഹാരിസ് ഇന്ന് തിരിച്ച് ജോലിയിൽ പ്രവേശിച്ചേക്കും. ഒരാഴ്ചയോളം ആയിരുന്നു ഡോ. ഹാരിസ് അവധിയിൽ ഉണ്ടായിരുന്നത്.  ഇതിനിടെ അവധി ഒരാഴ്ച കൂടി നീട്ടാനുള്ള ആലോചന ഉണ്ടായിരുന്നെങ്കിലും ഇന്ന് തന്നെ ഹാരിസ് ജോലിയിൽ പ്രവേശിക്കാനുള്ള തീരുമാനം ഉണ്ടാവുകയായിരുന്നു.  കഴിഞ്ഞ ദിവസം ഡോ. ഹാരിസിന്റെ അഭാവത്തിൽ ശാസ്ത്രക്രിയ ഉപകരണം കാണാത്തതുമായി ബന്ധപ്പെട്ട് നടത്തിയ പരിശോധന വലിയ വിവാദങ്ങൾ സൃഷ്ടിച്ചിട്ടുണ്ട്.

ഇതിന് ശേഷം ദുരൂഹ സാഹചര്യത്തിൽ ഒരു ബോക്സ് കണ്ടെത്തിയെന്നും പ്രിൻസിപ്പലും സൂപ്രണ്ടും പറഞ്ഞെങ്കിലും പിന്നീട് ഈ വാദം പൊളിയുകയായിരുന്നു. ഇതിന് പിന്നാലെ വാർത്ത സമ്മേളനം തന്നെ അനാവശ്യമായി പോയി എന്ന നിലപാടിലാണ് ഉദ്യോഗസ്ഥർ ഉണ്ടായത്. കെജിഎംസിടിയും ഡോ. ഹാരിസിന് പിന്തുണയുമായി രംഗത്തു വന്നിട്ടുണ്ട്. ഈ സാഹചര്യത്തിൽ ഡിഎംഇയുടെ റിപ്പോർട്ട് തിങ്കളാഴ്ച സമർപ്പിക്കും. എന്നാൽ ഇത്തരത്തിലുള്ള വിവാദം ശക്തമാവുകയും ഹാരിസിന് വലിയ പിന്തുണ ലഭിക്കുകയും ചെയ്തതോടെ കടുത്ത നടപടികൾക്ക് ശുപാർശയില്ലാത്ത റിപ്പോർട്ട് ആയിരിക്കും നൽകുകയെന്നാണ് പ്രതീക്ഷിക്കുന്നത്.