അബൂദബി: യു.എ.ഇയുടെ ഓപറേഷൻ ഷിവൽറസ് നൈറ്റ്-3യുടെ ഭാഗമായ 'ബേഡ്സ് ഓഫ് ഗുഡ്നസ്' സംരംഭത്തിന് കീഴിലെ 65ാംമത് മാനുഷിക സഹായം ഗസ്സയിൽഎയർ ഡ്രോപ് ചെയ്തു. ജോർദാൻ, ജർമനി, ബെൽജിയം എന്നീ രാജ്യങ്ങളുമായി സഹകരിച്ചാണ് യു.എ.ഇ പദ്ധതി നടപ്പാക്കുന്നത്. വായു മാർഗം വിതരണം ചെയ്ത സഹായത്തിന്റെ അളവ് ഇതേടെ 3,862 ടണ്ണിലധികമായി.

നിലവിലെ ഫീൽഡ് സാഹചര്യങ്ങൾ കാരണം കര മാർഗം എത്തിച്ചേരാൻ പ്രയാസമുള്ള പ്രദേശങ്ങളിലേക്ക് ദുരിതാശ്വാസ സാമഗ്രികൾ എത്തിക്കുക എന്നതാണ് ഈ പദ്ധതിയുടെ ലക്ഷ്യം.

500 ടണ്ണിലധികം ഭക്ഷ്യ സഹായങ്ങൾ നിറച്ച 21 ട്രക്കുകൾ യു.എ.ഇ അതിർത്തികളിലൂടെയും എത്തിച്ചു. ഇത് ഗസ്സയ്ക്കുള്ള വ്യോമ, കര പിന്തുണയുടെ വിപുലീകരണ വ്യാപ്തി പ്രകടമാക്കി. ഗസ്സയിലെ ആവശ്യക്കാർക്ക് സുസ്ഥിര സഹായ വിതരണം ഉറപ്പാക്കുന്നതിന് പ്രാദേശിക, അന്തർദേശീയ പങ്കാളികളുമായി ഏകോപിപ്പിച്ച് പ്രവർത്തിക്കാനുള്ള പ്രതിബദ്ധത യു.എ.ഇ ആവർത്തിച്ച് വ്യക്തമാക്കി. രാഷ്ട്രത്തിന്റെ ആഴത്തിൽ വേരൂന്നിയ മാനുഷിക തത്വങ്ങളെയും ദുരിതാശ്വാസ, സഹായ പ്രവർത്തനങ്ങളിലെ ആഗോള നേതൃത്വത്തെയും പ്രതിഫലിപ്പിക്കുന്നതാണീ സഹായ നീക്കം.

'Birds of Goodness': UAE's 65th aid airdrop in Gaza; Over 500 tons of food delivered in 21 trucks