ദുബായ്: ഐസിസി ചാമ്പ്യൻസ് ട്രോഫിയിലെ ഗ്രൂപ്പ് ഘട്ടത്തിലെ അവസാന മത്സരത്തിൽ ന്യൂസിലാൻഡും ഇന്ത്യയും നേർക്കുനേർ ഏറ്റുമുട്ടികൊണ്ടിരിക്കുകയാണ്. ദുബായ് ഇന്റർനാഷണൽ സ്റ്റേഡിയത്തിൽ നടക്കുന്ന മത്സരത്തിൽ ടോസ് നേടിയ ന്യൂസിലാൻഡ് ബൗളിങ് തെരഞ്ഞെടുക്കുകയായിരുന്നു. മത്സരത്തിൽ തുടക്കത്തിൽ ഇന്ത്യ തകരുകയായിരുന്നു. 33 റൺസ് എടുക്കുന്നതിനിടെ ഇന്ത്യക്ക് മൂന്ന് മുൻ നിര വിക്കറ്റുകളാണ് നഷ്ടമായത്. 

ക്യാപ്റ്റൻ രോഹിത് ശർമ്മ 15 റൺസിനും ശുഭ്മൻ ഗിൽ രണ്ട് റൺസും നേടി മടങ്ങിയപ്പോൾ വിരാട് കോഹ്‌ലി 11 റൺസും നേടി പുറത്തായി. എന്നാൽ പിന്നീട് ശ്രെയസ് അയ്യരും അക്‌സർ പട്ടേലും ചേർന്ന് ഇന്ത്യൻ ഇന്നിങ്സ് മുന്നോട്ട് നയിക്കുകയായിരുന്നു. അയ്യർ 98 പന്തിൽ 79 റൺസാണ് നേടിയത്. നാല് ഫോറുകളും രണ്ട് സിക്സുമാണ്‌ താരം നേടിയത്. അക്സർ പട്ടേൽ മൂന്ന് ഫോറുകളും ഒരു സിക്സും ഉൾപ്പടെ 61 പന്തിൽ 42 റൺസും നേടി.

ഇതോടെ ഏകദിനത്തിൽ 63 ഇന്നിങ്സിൽ നിന്നും ഏറ്റവും കൂടുതൽ തവണ 50+ റൺസ് നേടുന്ന രണ്ടാമത്തെ താരമായി മാറാനും ശ്രെയസിന് സാധിച്ചു. 27 50+ സ്കോറുകളാണ് താരം നേടിയത്. ഇതോടെ ഇത്രതന്നെ 50+ റൺസ് നേടിയ ഇമാം ഉൾ ഹഖിന്റെ നേട്ടത്തിനൊപ്പമെത്താനും അയ്യർക്ക്‌ സാധിച്ചു. 26 തവണ 50+ സ്‌കോറുകൾ നേടിയ മുൻ ഇംഗ്ലണ്ട് താരം ജോനാഥാൻ ട്രൊട്ടിനെ മറികടന്നാണ് അയ്യർ രണ്ടാം സ്ഥാനത്തേക്ക്‌ മുന്നേറിയത്. ആദ്യ 63 ഇന്നിങ്സിൽ നിന്നും 30 തവണ 50+ സ്‌കോറുകൾ നേടിയ മുൻ സൗത്ത് ആഫ്രിക്കൻ ഓപ്പണർ ഹാഷിം അംലയാണ് ഈ പട്ടികയിൽ ഒന്നാം സ്ഥാനത്തുള്ളത്.

ഇന്ത്യ പ്ലെയിങ് ഇലവൻ

രോഹിത് ശർമ്മ(ക്യാപ്റ്റൻ), ശുഭ്മാൻ ഗിൽ, വിരാട് കോഹ്‌ലി, ശ്രേയസ് അയ്യർ, അക്സർ പട്ടേൽ, കെ എൽ രാഹുൽ(വിക്കറ്റ് കീപ്പർ), ഹർദിക് പാണ്ഡ്യ, രവീന്ദ്ര ജഡേജ, മുഹമ്മദ് ഷമി, കുൽദീപ് യാദവ്, വരുൺ ചക്രവർത്തി.

ന്യൂസിലാൻഡ് പ്ലെയിങ് ഇലവൻ

വിൽ യങ്, രചിൻ രവീന്ദ്ര, കെയ്ൻ വില്യംസൺ, ഡാരിൽ മിച്ചൽ, ടോം ലാതം(വിക്കറ്റ് കീപ്പർ), ഗ്ലെൻ ഫിലിപ്സ്, മൈക്കൽ ബ്രേസ്‌വെൽ, മിച്ചൽ സാന്റ്‌നർ(ക്യാപ്റ്റൻ), മാറ്റ് ഹെൻറി, കൈൽ ജാമിസൺ, വില്യം ഒറൂർക്ക്.

Sreyas Iyer Create a New Record In Odi Cricket