കൊച്ചിയില്‍ നിന്നും റാസല്‍ഖൈമയിലേക്കാണ് പുതിയ സര്‍വിസ് ആരംഭിക്കാനൊരുങ്ങി ഇൻഡി​ഗോ. മാര്‍ച്ച് 15 മുതല്‍ പ്രതിദിന സര്‍വിസ് ആരംഭിക്കുമെന്ന് ഇന്‍ഡിഗോ ഉദ്യോഗസ്ഥര്‍ വ്യക്തമാക്കി. ചെലവ് കുറഞ്ഞ യാത്ര സൗകര്യം ഒരുക്കാറുള്ള ഇന്‍ഡിഗോ പുതിയ സര്‍വിസ് ആരംഭിക്കുന്നത് പ്രവാസികള്‍ക്ക് നേട്ടമാകുമെന്നാണ് പ്രതീക്ഷിക്കുന്നത്.

ആഭ്യന്തര സര്‍വിസുകള്‍ക്ക് പേരു കേട്ട ഇന്‍ഡിഗോ, ജിസിസി രാജ്യങ്ങളിലേക്കുള്ള സര്‍വിസുകള്‍ക്കും പ്രാധാന്യം നല്‍കുന്നുണ്ട്. കേരളത്തില്‍ നിന്ന് ഏറ്റവും തിരക്കേറിയ റൂട്ടാണ് യുഎഇയിലേക്ക്. ഷാര്‍ജ, ദുബൈ, അബൂദബി എന്നിവിടങ്ങളിലേക്ക് കേരളത്തിലെ എല്ലാ വിമാനത്താവളങ്ങളില്‍ നിന്നും സർവിസുണ്ട്. ഇത് കൂടാതെയാണ് ഇപ്പോൾ ഇന്‍ഡിഗോ പുതിയ സര്‍വിസ് പ്രഖ്യാപിച്ചിരിക്കുന്നത്.

 മാര്‍ച്ച് 15 മുതല്‍ കൊച്ചിയില്‍ നിന്ന് റാസല്‍ഖൈമയിലേക്കുള്ള പ്രതിദിന സര്‍വിസ്ആരംഭിക്കുമെന്ന് ഇന്‍ഡിഗോ ഉദ്യോഗസ്ഥര്‍ വ്യക്തമാക്കി. കേരളത്തില്‍ നിന്ന് വിനോദ സഞ്ചാരത്തിനായി കൂടുതല്‍ പേര്‍ റാസല്‍ഖൈമയിലേക്ക് എത്തുന്നു എന്ന കണക്കുകള്‍ അടുത്തിടെ പുറത്തുവന്നിരുന്നു. മാത്രമല്ല, ജോലിക്കായി പോകുന്ന പ്രവാസികള്‍ക്കും പുതിയ നേരിട്ടുള്ള സര്‍വിസ് ​ഗുണം ചെയ്യും.

കൊച്ചി-റാസൽഖൈമ റൂട്ടിൽ നേരിട്ടുള്ള സർവീസ് പ്രഖ്യാപിക്കുന്നതിൽ സന്തോഷമുണ്ടെന്ന് ഇൻഡിഗോയുടെ ഗ്ലോബൽ സെയിൽസ് മേധാവി വിനയ് മൽഹോത്ര അറിയിച്ചു. കേരളത്തില്‍ നിന്ന് ആഴ്ചയില്‍ 49 നേരിട്ടുള്ള യുഎഇ സര്‍വിസുകളാണ് ഇന്‍ഡിഗോ നടത്തുന്നതെന്നും വിനയ് മല്‍ഹോത്ര വ്യക്തമാക്കി. ഇന്‍ഡിഗോയുടെ വെബ്‌സൈറ്റ് വഴിയോ മൊബൈല്‍ ആപ്പ് ഉപയോഗിച്ചോ  ടിക്കറ്റ് ബുക്ക് ചെയ്യാന്‍ സാധിക്കുമെന്നും അദ്ദേഹം കൂട്ടിച്ചേര്‍ത്തു.

റാസല്‍ഖൈമ യുഎഇയിലെ ചെലവ് കുറഞ്ഞ എമിറേറ്റ്‌സ് ആണ് എന്നതാണ് കൂടുതല്‍ പേരെ ആകര്‍ഷിക്കുന്ന പ്രധാന ഘടകം. കൂടാതെ, വിദേശികളെ ആകര്‍ഷിക്കാന്‍ ഒട്ടേറെ പദ്ധതികളും റാസല്‍ഖൈമ ഒരുക്കിയിട്ടുണ്ട്. ലോകത്തെ ദൈര്‍ഘ്യമേറിയ സിപ്ലൈന്‍, യുഎഇയിലെ ഏറ്റവും വലിയ മലമേഖലയായ ജബല്‍ ജെയ്‌സില്‍ നിന്നുള്ള വ്യൂ, ഒട്ടക ഓട്ടം, കയാക്കിങ്, മലയോര ബൈക്ക് ഓട്ടം എന്നിവയെല്ലാം ഇവിടത്തെ പ്രത്യേകതയാണ്. യുനസ്‌കോ അംഗീകാരമുള്ള ജുല്‍ഫര്‍, ദയ കോട്ട, അല്‍ ജാസിറ അല്‍ ഹംറ ഗ്രാമം എന്നിവയും ഇവിടേക്ക് സഞ്ചാരികളെ ആകർഷിക്കുന്നു.

മാര്‍ച്ച് 15ന് ഷെഡ്യൂള്‍ ചെയ്തിരിക്കുന്ന ഇൻഡി​ഗോ വിമാനം രാത്രി 9.15നാണ് കൊച്ചിയില്‍ നിന്ന് യാത്ര പുറപ്പെട്ട്, 12.10ന് റാസല്‍ഖൈമയിലെത്തും. തിരിച്ച് റാസല്‍ഖൈമയില്‍ നിന്ന് പുലര്‍ച്ചെ 1.10ന് പുറപ്പെടുന്ന ഇന്‍ഡിഗോ വിമാനം അതിരാവിലെ കൊച്ചിയില്‍ എത്തും.

 IndiGo has announced a new daily direct flight service on the UAE-Kochi route, starting from May 9, providing a convenient travel option for passengers between Abu Dhabi and Kannur