കൊച്ചി: തപാൽ വഴി ലഹരി മരുന്ന് കടത്തിയ കേസിൽ തിരുവനന്തപുരം നെടുമങ്ങാട് സ്വദേശി അതുൽ കൃഷ്ണയെ എറണാകുളം എക്സൈസ് സംഘം അറസ്റ്റ് ചെയ്തു. ഇയാൾ ഡാർക്ക് വെബിലൂടെ ഫ്രാൻസിൽ നിന്ന് എംഡിഎംഎ ഓർഡർ ചെയ്തു വരുത്തിയെന്നാണ് അന്വേഷണത്തിൽ കണ്ടെത്തിയത്.

എറണാകുളം കാരിക്കാമുറിയിലെ ഫോറിൻ പോസ്റ്റ് ഓഫിസിലേക്ക് എത്തിയ പാർസലിലാണ് മയക്കുമരുന്ന് കണ്ടെത്തിയത്. കൊച്ചി ഇന്റർനാഷണൽ പോസ്റ്റൽ അപ്രൈസൽ കേന്ദ്രത്തിൽ നിന്ന് ലഭിച്ച വിവരത്തെ തുടർന്ന് എക്സൈസ് നടത്തിയ പരിശോധനയിലാണ് ലഹരി മരുന്ന് പിടികൂടിയത്.

പാർസലിൽ നൽകിയിരുന്ന ഫോൺ നമ്പർ കേന്ദ്രീകരിച്ച് നടത്തിയ അന്വേഷണത്തിലാണ് അതുൽ കൃഷ്ണ പിടിയിലായത്. ഡാർക്ക് വെബിലൂടെ ഇയാൾ ലഹരി മരുന്ന് വാങ്ങിയതും പണം ബിറ്റ്‌കോയിനായി കൈമാറിയതുമാണ് അന്വേഷണ സംഘം കണ്ടെത്തിയത്.

ഇതിന്റെയും മയക്കുമരുന്ന് വിതരണ ശൃംഖലയുടെയും ഉറവിടം കണ്ടെത്തുന്നതിനായി എക്സൈസ് സംഘം നാർകോട്ടിക് കൺട്രോൾ ബ്യൂറോയുടെ സഹകരണത്തോടെ ഇന്റർപോളിന്റെ സഹായം തേടാൻ ഒരുങ്ങുകയാണ്. കൂടാതെ, ഫ്രാൻസിലേക്ക് ഇന്ത്യൻ എംബസി മുഖാന്തിരം സന്ദേശം അയക്കുന്നതിനും ഇന്റർനാഷണൽ കൺസൈൻമെന്റുകൾ ട്രാക്ക് ചെയ്യുന്നതിനും എക്സൈസ് സൈബർ സെൽ നടപടികൾ ആരംഭിച്ചിട്ടുണ്ട്. ഇതിനായി പ്രത്യേക അന്വേഷണ സംഘവും രൂപീകരിച്ചിരിക്കുകയാണ്.