ന്യൂഡല്‍ഹി: ബി.ജെ.പിയിലെ വിരമിക്കല്‍ പ്രായപരിധിയായ 75 വയസ്സ് തികയാന്‍ പ്രധാനമന്ത്രി നരേന്ദ്രമോദിക്ക് രണ്ടുമാസം മാത്രം ബാക്കിനില്‍ക്കെ, അദ്ദേഹത്തെ പ്രായം ഓര്‍മിപ്പിച്ച് ആര്‍.എസ്.എസ് മേധാവി മോഹന്‍ ഭാഗവത്. 75 വയസ്സായാല്‍ സന്തോഷത്തോടെ മറ്റുള്ളവര്‍ക്ക് വഴിമാറിക്കൊടുക്കണമെന്നായിരുന്നു മോഹന്‍ ഭാഗവതിന്റെ പ്രസ്താവന. നാഗ്പൂരിലെ ആസ്ഥാനത്തുവച്ച് ആര്‍.എസ്.എസ് നേതാവായിരുന്ന മോറോപന്ത് പിംഗ്ലയെ കുറിച്ചുള്ള പുസ്തകത്തിന്റെ പ്രകാശന ചടങ്ങില്‍ സംസാരിക്കവെയാണ്, നരേന്ദ്രമോദിയുടെ പേര് പരാമര്‍ശിക്കാതെ, അദ്ദേഹത്തോട് വഴിമാറാന്‍ മോഹന്‍ ഭാഗവത് പരോക്ഷമായി ആവശ്യപ്പെട്ടത്. 75 വയസ്സ് തികഞ്ഞ് ഷാള്‍ നല്‍കി ആദരിക്കുകയാണെങ്കില്‍, അതിനര്‍ഥം നിങ്ങള്‍ക്ക് വയസ്സായിട്ടുണ്ടെന്നും മറ്റുള്ളവര്‍ക്കായി വഴിയൊരുക്കുക എന്നുമാണെന്ന പിംഗ്ലെയുടെ വാക്ക് ഓര്‍മിപ്പിച്ചുകൊണ്ടായിരുന്നു ഭാഗവതിന്റെ ഒളിയമ്പ്. രാഷ്ട്രസേവനത്തോടുള്ള സമര്‍പ്പണം ഉണ്ടായിരുന്നിട്ടും പ്രായമായി എന്ന് തിരിച്ചറിഞ്ഞ് മാന്യമായി പിന്മാറണമെന്ന തത്വത്തില്‍ മൊറോപാന്ത് വിശ്വസിച്ചിരുന്നുവെന്നും ഭാഗവത് ചൂണ്ടിക്കാട്ടി.

മോദിയെ പായപരിധി ഓര്‍മിപ്പിച്ചുള്ള മോഹന്‍ ഭാഗവതിന്റെ പരാമര്‍ശം ചര്‍ച്ചയായതിന് പിന്നാലെ, വിഷയം പ്രതിപക്ഷം ഏറ്റെടുത്തതോടെ വിവാദം ചൂടുപിടിച്ചെങ്കിലും വിഷയത്തില്‍ ബി.ജെ.പി ഔദ്യോഗികമായി പ്രതികരിക്കാതെ മാറിനില്‍ക്കുകയാണ്. മോദിക്ക് വിരമിക്കല്‍ പ്രായമില്ലെന്നും ആഗ്രഹിക്കുന്ന കാലത്തോളം രാഷ്ട്രീയ ജീവിതം തുടരാമെന്നുമാണ് പാര്‍ട്ടി വൃത്തങ്ങള്‍ പറയുന്നത്. 

ALSO READ: ആചാരങ്ങള്‍ക്ക് വിരുദ്ധമായി ജാതി മാറി വിവാഹം ചെയ്തു; ഒഡിഷയില്‍ യുവ ദമ്പതികളെ നുകത്തില്‍ കെട്ടി വയലിലൂടെ വലിച്ചിഴച്ചു

മോഹന്‍ ഭാഗവതിനും മോദിക്കും ഒരേ പ്രായമാണ്. 1950 സെപ്റ്റംബര്‍ 11 നാണ് ഭാഗവത് ജനിച്ചത്. അതേ വര്‍ഷം സെപ്റ്റംബര്‍ 17നാണ് മോദിയുടെ ജനനം. മോദിയെ സമ്മര്‍ദ്ദത്തിലാക്കാനായി 75 തികയുന്നതോടെ നേതൃപദവിയില്‍നിന്ന് മോഹന്‍ ഭാഗവത് സ്വയം മാറിനില്‍ക്കുമെന്നും റിപ്പോര്‍ട്ടുണ്ട്.

മോഹന്‍ ഭാഗവതിന്റെ പ്രസ്താവന മോദിയെ ലക്ഷ്യംവച്ചാണെന്ന് കോണ്‍ഗ്രസ് മാധ്യമവിഭാഗം മേധാവി ജയ്‌റാം രമേശ് ട്വീറ്റ്‌ചെയ്തു. സെപ്റ്റംബര്‍ ആയാല്‍ തനിക്കും 75 തികയുമെന്ന കാര്യം ഭാഗവത് ഓര്‍ക്കണം. ഒരമ്പ് രണ്ട് ലക്ഷ്യം എന്നും ജയ്‌റാം രമേശ് കുറിച്ചു. മോദിയെ തന്നെയാണ് മോഹന്‍ ഭാഗവത് ഉദ്ദേശിച്ചതെന്ന് ഉദ്ധവ് പക്ഷ ശിവസേന നേതാവ് ഉദ്ധവ് താക്കറെ അഭിപ്രായപ്പെട്ടു. അദ്വാനി, മുരളീ മനോഹര്‍ ജോഷി, ജസ്വന്ത് സിങ് തുടങ്ങിയ ബി.ജെ.പിയുടെ മുതിര്‍ന്ന നേതാക്കളെയെല്ലാം 75 വയസ് തികഞ്ഞപ്പോള്‍ വിരമിക്കാന്‍ നിര്‍ബന്ധിച്ചയാളാണ് മോദിയെന്നും ആ നിയമം അദ്ദേഹത്തിന് ബാധകമാകുമോ എന്ന് നോക്കാമെന്നും ശിവസേന നേതാവ് സഞ്ജയ് റാവുത്ത് പ്രതികരിച്ചു. പറയുകയല്ല, ചെയ്തുകാണിക്കുകയാണ് വേണ്ടെന്നും നിലവിലെ ഭരണകര്‍ത്താക്കള്‍ ഇതില്‍പ്പെടുമോ എന്നത് നോക്കിക്കാണാമെന്നും കോണ്‍ഗ്രസ് നേതാവ് അഭിഷേക് സിങ്വിയും പ്രതികരിച്ചു.

രാഷ്ട്രീയത്തിലെ വിരമിക്കലിനെക്കുറിച്ചുള്ള കഴിഞ്ഞദിവസത്തെ അമിത്ഷായുടെ പ്രസ്താവനയും ഇതോടൊപ്പം ചേര്‍ത്തുവായിക്കുന്നുണ്ട്. വിരമിച്ച ശേഷം വേദങ്ങള്‍ക്കും ഉപനിഷത്തുകള്‍ക്കും ജൈവ കൃഷിക്കുമായി ശിഷ്ടകാലം നീക്കിവയ്ക്കുമെന്നുമായിരുന്നു അമിത്ഷാ പറഞ്ഞത്.

ആര്‍.എസ്.എസില്‍ ചുമതലകള്‍ക്ക് പ്രായപരിധി നിശ്ചയിച്ചിട്ടില്ല. ചുമതലകള്‍ നിര്‍വഹിക്കാന്‍ സാധിക്കുന്നിടത്തോളം തുടരാമെന്നതാണ് ആര്‍.എസ്.എസിലെ നയം. എന്നാല്‍ ബി.ജെ.പിയില്‍ പ്രായപരിധി കൊണ്ടുവന്നത്, നരേന്ദ്രമോദി പ്രധാനമന്ത്രിയായതിന് പിന്നാലെ 2014 ഓഗസ്റ്റിലാണ്. ആ സമയത്തെ പാര്‍ട്ടിയിലെ ഏറ്റവും മുതിര്‍ന്ന നേതാക്കളായ അദ്വാനി, ജോഷി ഉള്‍പ്പെടെയുള്ളവരെ 75 കഴിഞ്ഞുവെന്ന് ചൂണ്ടിക്കാട്ടി മാറ്റിനിര്‍ത്തി. ഇവരെ പിന്നീട് മാര്‍ഗനിര്‍ദേശ് മണ്ഡല്‍ എന്ന സമിതി രൂപീകരിച്ച് അതില്‍ 'നിയമിച്ചു'. തെരഞ്ഞെടുപ്പില്‍ മത്സരിക്കുന്നതിന് പ്രായം തടസ്സമല്ലെന്നും 75 കഴിഞ്ഞവരെ മന്ത്രിമാരാക്കേണ്ടെന്നു മാത്രമാണ് തീരുമാനിച്ചതെന്നും ബി.ജെ.പി പ്രസിഡന്റായിരുന്ന അമിത്ഷാ വിശദീകരിക്കുകയുംചെയ്തു. 

With just two months left for Prime Minister Narendra Modi to reach the retirement age of 75, the BJP's retirement age, RSS chief Mohan Bhagwat has reminded him of his age. Mohan Bhagwat's statement was that when he turns 75, he should happily make way for others.