ന്യൂയോര്‍ക്ക്: വാട്ടര്‍ ബോട്ടിലിന്റെ അടപ്പ് തെറിച്ച് രണ്ട് ഉപഭോക്താക്കളുടെ കാഴ്ച നഷ്ടപ്പെട്ടതിനെ തുടര്‍ന്ന് 850,000 സ്‌റ്റെയിന്‍ലെസ് സ്റ്റീല്‍ വാട്ടര്‍ ബോട്ടിലുകള്‍ തിരിച്ചുവിളിച്ച് വാള്‍മാര്‍ട്ട്. 2017 മുതല്‍ വാള്‍മാര്‍ട്ട് സ്‌റ്റോറുകളില്‍ വിറ്റ ഒസാര്‍ക്ക് ട്രയല്‍ 64 ഒഇസഡ് സ്‌റ്റെയിന്‍ലെസ് സ്റ്റീല്‍ ഇന്‍സുലേറ്റഡ് വാട്ടര്‍ ബോട്ടിലുകളാണ് തിരിച്ചുവിളിച്ചിരിക്കുന്നത്. 

ഗുരുതരമായ ആഘാതങ്ങളും അപകടങ്ങളും ഉണ്ടാക്കുന്നതുകൊണ്ടാണ് കുപ്പികള്‍ തിരിച്ചുവിളിക്കുന്നതെന്നാണ് യുഎസ് കണ്‍സ്യൂമര്‍ പ്രൊഡക്ട് സേഫ്റ്റി കമ്മീഷന്‍ വ്യാഴാഴ്ച പുറത്തിറക്കിയ നോട്ടിസില്‍ പറയുന്നത്. ഭക്ഷണം, അല്ലെങ്കില്‍ പാല്‍, ജ്യൂസ് പോലുള്ള പാനീയങ്ങള്‍ കൂടുതല്‍ സമയം കുപ്പിയില്‍ സൂക്ഷിച്ച ശേഷം അത് തുറക്കുമ്പോള്‍ മൂടി ശക്തിയായി പുറത്തേക്ക് തെറിക്കാന്‍ സാധ്യതയുണ്ടെന്ന് സിപിഎസ്‌സി നോട്ടിസില്‍ പറയുന്നു. 

കുപ്പികള്‍ തുറക്കുമ്പോള്‍ അടപ്പ് മുഖത്ത് തട്ടി പരിക്കേറ്റതായി മൂന്ന് ഉപഭോക്താക്കള്‍ കമ്പനിയെ അറിയിച്ചിരുന്നു. ഇവരില്‍ രണ്ടുപേര്‍ക്ക് സ്ഥിരമായി കാഴ്ച നഷ്ടപ്പെട്ടതായും സിപിഎസ്‌സി കൂട്ടിച്ചേര്‍ത്തു. ഒസാര്‍ക്ക് ട്രയല്‍ ബോട്ടിലുകള്‍ എന്ന് പുനര്‍നാമകരണം ചെയ്ത കുപ്പി ഉപയോഗിക്കുന്നത് നിര്‍ത്താന്‍ വാള്‍മാര്‍ട്ട് ഉപയോക്താക്കളോട് ആവശ്യപ്പെട്ടിട്ടുണ്ട്. 

കുപ്പി തിരിച്ചുനല്‍കുന്ന ഉപഭോക്താക്കള്‍ക്ക് പണം പൂര്‍ണമായും തിരിച്ചുനല്‍കുന്നതാണ്. കടയുടമകള്‍ക്കും പ്രാദേശിക വാള്‍മാര്‍ട്ട് സ്റ്റോറുകളില്‍ കുപ്പികള്‍ തിരിച്ചെത്തിക്കാമെന്നാണ് കമ്പനി വ്യക്തമാക്കുന്നത്. ഉപഭോക്താക്കളുടെ സുരക്ഷക്കും ആരോഗ്യത്തിനുമാണ് എപ്പോഴും മുന്‍ഗണന നല്‍കുന്നതെന്നും സിപിഎസ്‌സിയുമായി പൂര്‍ണമായി സഹകരിക്കുമെന്നും വാള്‍മാര്‍ട്ട് പ്രസ്താവനയില്‍ പറഞ്ഞു.