റിയാദ്: വിസിറ്റ് വിസ സംബന്ധിച്ച നടപടിക്രമങ്ങളില്‍ നിര്‍ണായക മാറ്റം വരുത്തി സഊദി അറേബ്യ. സിംഗിള്‍ എന്‍ട്രി, മള്‍ട്ടിപ്പിള്‍ എന്‍ട്രി എന്നിവ തെരഞ്ഞെടുക്കാനുള്ള ഒപ്ഷന്‍, വിസ ആപ്ലിക്കേഷന്‍ പോര്‍ട്ടലില്‍ നിന്ന് പിന്‍വലിച്ചു. വിദേശകാര്യ മന്ത്രാലയത്തിന്റെ പോര്‍ട്ടലില്‍ ബുധനാഴ്ച മുതല്‍ ഈ ഓപ്ഷന്‍ ലഭ്യമല്ല. ഇതേക്കുറിച്ചുള്ള പുതിയ അറിയിപ്പ് സൈറ്റില്‍ ഉള്‍പ്പെടുത്തിയിട്ടുമുണ്ട്.

വിസിറ്റ് വിസ കാലാവധി, സിംഗിള്‍ എന്‍ട്രി, മള്‍ട്ടിപ്പിള്‍ എന്‍ട്രി, സഊദിയില്‍ കഴിയുന്ന കാലയളവ് എന്നിവ വിസ സ്റ്റാമ്പിങ് സമയത്ത് അതത് രാജ്യങ്ങളിലെ സഊദി അറേബ്യന്‍ എംബസികളാണ് നിശ്ചയിക്കുക. പുതിയ രീതിയനുസരിച്ച് വിസയ്ക്ക് അപേക്ഷിക്കുമ്പോള്‍ താമസ കാലാവധിയും സിംഗിള്‍ എന്‍ട്രി, മള്‍ട്ടിപ്പിള്‍ എന്‍ട്രി എന്നതും അപേക്ഷാ ഘട്ടത്തില്‍ ഉറപ്പിക്കാനാവില്ലെന്ന് ചുരുക്കം.

വിഎഫ്എസ് വഴി വിസ സ്റ്റാമ്പിങ് ഘട്ടത്തിന്റെ സമയത്ത് മാത്രമാണ് ഇക്കാര്യം അറിയാന്‍ സാധിക്കുക. വിസ കാലാവധിയും സിംഗിള്‍, മള്‍ട്ടിപ്പിള്‍ എന്നിവയില്‍ ഏതാണെന്നും നേരത്തേ അറിയാന്‍ സാധിക്കില്ല. ഇക്കാര്യം മനസ്സിലാക്കണമെങ്കില്‍ സ്റ്റാമ്പിങ് നടപടി പൂര്‍ത്തിയാക്കിയ ശേഷം പാസ്‌പോര്‍ട്ട് കൈയില്‍ കിട്ടണം.

മലയാളികള്‍ ഉള്‍പ്പടെ സഊദി അറേബ്യ സന്ദര്‍ശിക്കാന്‍ താല്‍പ്പര്യപ്പെടുന്നവരെ ആശങ്കയിയിലാക്കുന്നതാണ് പുതിയ രീതി. നേരത്തേ ജനുവരി 31ന് അധികൃതര്‍ മള്‍ട്ടിപ്പിള്‍ റീ എന്‍ട്രി വിസ ഒപ്ഷന്‍ ഒഴിവാക്കിയായിരുന്നു. എന്നാല്‍ 18 ദിവസങ്ങള്‍ക്ക് ശേഷം അധികൃതര്‍ ഇത് പുനസ്ഥാപിക്കുകയും ചെയ്തു. എന്നാല്‍ അപേക്ഷകര്‍ക്ക് വിസ സ്റ്റാമ്പ് ചെയ്ത് ലഭിച്ചിരുന്നില്ല. മള്‍ട്ടിപ്പിള്‍ എന്‍ട്രി വിസയുമായി സമീപിക്കുമ്പോള്‍ സിംഗിള്‍ എന്‍ട്രിയേ നിലവിലുള്ളൂ എന്ന മറുപടിയാണ് ഇവര്‍ക്ക് ലഭിച്ചുകൊണ്ടിരുന്നത്. ഇത് അവധിക്കാലത്ത് വിസിറ്റ് വിസയില്‍ സഊദിയില്‍ പോകാന്‍ പദ്ധതിയിട്ടിരുന്ന മലയാളികള്‍ ഉള്‍പ്പടെയുള്ളവരെ നിരാശപ്പെടുത്തിയിരുന്നു.

Saudi Arabia Announces Key Changes to Visit Visas; Embassies to Decide on Single or Multiple Entry