കൊല്ലം: കെഎസ്‌യു സംസ്ഥാന ജനറല്‍ സെക്രട്ടറിയെ ഭീഷണിപ്പെടുത്തി പണം തട്ടാന്‍ ശ്രമിച്ചെന്ന് പരാതി. കെഎസ്‌യുവിന്റെ തന്നെ സംസ്ഥാന നേതാക്കളാണ് തന്നെ ഭീഷണിപ്പെടുത്തിയതെന്ന് ജനറല്‍ സെക്രട്ടറി ആഷിഖ് ബൈജു ആരോപിച്ചു. സംഭവത്തില്‍ രണ്ട് സംസ്ഥാന നേതാക്കള്‍ക്കും, ഒരു ജില്ലാ നേതാവിനുമെതിരെ കൊല്ലം ഇരവിപുരം പൊലിസ് കേസെടുത്തു. 

കെഎസ് യു സംസ്ഥാന വൈസ് പ്രസിഡന്റുമാരായ യദു കൃഷ്ണന്‍, അരുണ്‍ രാജേന്ദ്രന്‍, കൊല്ലം ജില്ല പ്രസിഡന്റ് അന്‍വര്‍ സുല്‍ഫിക്കര്‍ എന്നിവര്‍ക്കെതിരെയാണ് പരാതി. 

തനിക്കെതിരെ ഒരു സ്ത്രീ ബലാത്സംഗ കുറ്റം ആരോപിക്കുന്ന ഓഡിയോ ക്ലിപ്പുകള്‍ കെഎസ് യു നേതാക്കള്‍ പ്രചരിപ്പിക്കുകയും, അതുപയോഗിച്ച് ഭീഷണിപ്പെടുത്തിയെന്നുമാണ് ആഷിഖ് ബൈജുവിന്റെ ആരോപണം. 

ALSO READ: സ്വപ്ന ഫൈനലിൽ കോഹ്‌ലിയെ കാത്തിരിക്കുന്നത് ചരിത്രനേട്ടം; ഇടിമിന്നലായാൽ പുത്തൻ നേട്ടത്തിലെത്താം 

കഴിഞ്ഞ ഡിസംബറിലാണ് ജില്ല സെക്രട്ടറിക്ക് നേരെ വാട്‌സ്ആപ്പ് സന്ദേശത്തിലൂടെ ഭീഷണിയെത്തിയത്. സംഭവത്തില്‍ പൊലിസില്‍ പരാതി നല്‍കിയെങ്കിലും ആദ്യം കേസെടുത്തിരുന്നില്ല. പിന്നീട് കോടതിയുടെ നിര്‍ദേശപ്രകാരമാണ് ഇരവിപുരം പൊലിസ് കേസ് രജിസ്റ്റര്‍ ചെയ്യത്. 

അതേസമയം ആരോപണത്തില്‍ തനിക്ക് പങ്കില്ലെന്നും, മാനനഷ്ടത്തിന് കേസ് നല്‍കുമെന്നും കെഎസ്‌യു വൈസ് പ്രസിഡന്റ് യദു കൃഷ്ണന്‍ പറഞ്ഞു.