മൂവാറ്റുപുഴ: ഫേസ്ബുക്ക് കമന്റിലൂടെ മുസ് ലിംകള്‍ക്കെതിരെ വിദ്വേഷ പരാമര്‍ശം നടത്തിയ സിപിഎം മൂവാറ്റുപുഴ ഏരിയാ കമ്മിറ്റി അംഗം എം.ജെ ഫ്രാന്‍സിസിനെതിരെ കേസെടുത്തു. മൂവാറ്റുപുഴ സ്വദേശി ഇബ്രാഹീം നല്‍കിയ പരാതിയെ തുടര്‍ന്ന് മൂവാറ്റുപുഴ പൊലിസാണ് ഫ്രാന്‍സിസിനെതിരെ കേസെടുത്തിരിക്കുന്നത്. 

ഏറ്റവും കൂടുതല്‍ ക്രിമിനല്‍ സ്വഭാവമുള്ളത് മുസ്‌ലിംകള്‍ക്കാണെന്നും നോമ്പെടുത്താല്‍ ഒരു വര്‍ഷം പ്ലാന്‍ ചെയ്ത കുറ്റങ്ങള്‍ക്ക് പരിഹാരമായെന്നാണ് ചിലര്‍ കരുതുന്നത് എന്നതന്നടക്കം അങ്ങേയറ്റം വിദ്വേഷം നിറഞ്ഞ ഭാഷയിലാണ് എം.ജെ ഫ്രാന്‍സിസ് ഫേസ്ബുക്കില്‍ കമന്റിട്ടത്.

'ഈ സമൂഹത്തില്‍ ഏറ്റവും കൂടുതല്‍ ക്രിമിനല്‍ സ്വഭാവമുള്ളത് മുസ്‌ലികള്‍ക്കാണ്. അവരെ പഠിപ്പിക്കുന്നത് എന്ത് തെറ്റ് ചെയ്താലും പള്ളിയില്‍ പേയി അഞ്ച് നേരം പ്രാര്‍ഥിച്ചാല്‍ മതി, അതുപോലെ എല്ലാ വര്‍ഷവും നോമ്പ് നോറ്റ് പകല്‍ മുഴുവന്‍ ഉമിനീര് രാത്രി നല്ല ഭക്ഷണവും കഴിച്ച് ഉറങ്ങിയാല്‍ ഒരു വര്‍ഷക്കാലം പ്ലാന്‍ ചെയ്ത ത******** പോരായ്മകളും പരിഹാരം ഉണ്ടാവും എന്നാണ് മതപുരോഹിതന്മാര്‍ പഠിപ്പിക്കുന്നത്.'' എന്നായിരുന്നു ഇയാളുടെ കമന്റ്.

അതേസമയം ഫേസ്ബുക്ക് കമന്റ് വിവാദമായതിന് പിന്നാലെ നേതാവിന്റെ പരാമര്‍ശം തള്ളി മൂവാറ്റുപുഴ ഏരിയ കമ്മിറ്റി രംഗത്തെത്തിയിരുന്നു. ആവോലി സെക്രട്ടറി ഫേസ്ബുക്ക് കമന്റിലൂടെ മുസ്‌ലിം സമുദായത്തെ കുറിച്ച് നടത്തിയ പരാമര്‍ശം പാര്‍ട്ടി നിലപാടല്ല. ന്യൂനപക്ഷങ്ങള്‍ക്കെതിരെ വര്‍ഗീയ ശക്തികള്‍ നടത്തുന്ന അക്രമങ്ങള്‍ക്കെതിരെ ശക്തമായ നിലപാടെടുക്കുന്ന പാര്‍ട്ടിയാണ് സിപിഎം എന്നും, ആര്‍എസ്എസിന്റെയും കാസയുടെയും ആശയങ്ങള്‍ക്ക് പാര്‍ട്ടി അണികളോ നേതാക്കളോ വശംവദരാവരുതെന്നും സിപിഎം പ്രസ്താവനയില്‍ വിശദീകരിച്ചിരുന്നു. മാത്രമല്ല ഇത്തരം പ്രവണതകള്‍ അതീവ ഗൗവരത്തോടെ പാര്‍ട്ടി കാണുകയും, തിരുത്തിക്കാന്‍ ആവശ്യമായ നടപടി സ്വീകരിക്കുകയും ചെയ്യും. ഏത് സാഹചര്യത്തിലും മതേതര നിലപാട് ഉയര്‍ത്തിപ്പിടിച്ച് മുന്നോട്ട് പോകാനും സമൂഹത്തില്‍ സ്പര്‍ദ്ധ വളര്‍ത്തുന്ന ശക്തികളെ ഒറ്റപ്പെടുത്താനും പാര്‍ട്ടി മുന്‍കൈയെടുക്കുമെന്നും മൂവാറ്റുപുഴ ഏരിയ കമ്മിറ്റി പ്രസ്താവനയില്‍ വ്യക്തമാക്കിയിരുന്നു.

ഫേസ്ബുക്ക് കമന്റ് സ്‌ക്രീന്‍ഷോട്ട് സമൂഹമാധ്യമങ്ങളില്‍ വ്യാപകമായി പ്രചരിച്ചതിന് പിന്നാലെ മാപ്പുമായി ഫ്രാന്‍സിസ് എംജെ രംഗത്തെത്തിയിരുന്നു.

Case filed against CPM leader MJ Francis for hate speech against muslims