ഫ്‌ളോറിഡ: ഒമ്പത് മാസം നീണ്ട ബഹിരാകാശ ദൗത്യത്തിന് ശേഷം സുരക്ഷിതമായി ഭൂമിയിലെത്തിയ നാസയുടെ സുനിത വില്യംസും ബുച്ച് വില്‍മോറും നേരെ നാസയുടെ നേതൃത്വത്തിലുള്ള വിപുലമായ വൈദ്യപരിശോധനകള്‍ക്ക് വിധേയരാകും. ബഹാരാകാശ യാത്രയ്ക്ക് മുമ്പുള്ള ശാരീരിക ക്ഷമതയിലേക്ക് (പോസ്റ്റ് ഫ്ളൈറ്റ് റീഹാബിലിറ്റേഷന്‍) ഇരുവരെയും എത്തിക്കുക എന്നതിനാണ് നാസയുടെ പ്രഥമ പരിഗണന.

യാത്രികരുടെ മാനസിക, ശാരീരിക മാറ്റങ്ങള്‍ നിരീക്ഷിക്കുന്നതോടൊപ്പം ഭൂമിയിലെ അന്തരീക്ഷവുമായും ഗുരുത്വാകര്‍ഷണവുമായും ഇരുവരും പൊരുത്തപ്പെടുന്നതും സൂക്ഷ്മമായി നിരീക്ഷിക്കും. ഫ്ളോറിഡ തീരത്ത് പതിക്കുന്ന സ്പേസ് എക്സ് ക്രൂ ഡ്രാഗണില്‍ നിന്ന് സുരക്ഷിതമായി പുറത്തെത്തിച്ച സുനിത വില്യംസിനെയും ബുച്ച് വില്‍മോറിനെയും ഒപ്പമുള്ള മറ്റ് രണ്ട് ബഹിരാകാശ യാത്രികരെയും സ്ട്രെക്ച്ചറില്‍ അടിയന്തര വൈദ്യ പരിശോധനയ്ക്ക് വിധേയരാക്കി.

ബഹിരാകാശ യാത്രികളുടെ മസിലുകളുടെ പ്രവര്‍ത്തനം, തുലനാവസ്ഥ, ഗുരുത്വാകര്‍ഷണം എന്നിവ ക്രമത്തിലാകുന്നത് വരെ നിരീക്ഷണം തുടരും. പിന്നീട് ഇവരെ ഹൂസ്റ്റണിലെ ജോണ്‍സണ്‍ സ്പേസ് സെന്ററില്‍ പ്രവേശിപ്പിക്കും. തുടര്‍ച്ചയായ ശാരീരിക പരിശോധനകള്‍, ചെറുവ്യായാമങ്ങള്‍ എന്നിവയിലൂടെ ശാരീരികക്ഷമത പൂര്‍വസ്ഥിതിയിലായ ശേഷം മാത്രമേ വീടുകളിലേക്ക് അയക്കുകയുള്ളൂ. നടത്തം, ശരീരത്തിന്റെ ബാലന്‍സ്, മസിലുകളുടെ ശോഷണം, തിരിയാനും ഇരിക്കാനുമുള്ള പ്രയാസം, മാനസിക പ്രശ്നങ്ങള്‍ എന്നിവയില്‍ ക്ഷമത കൈവരിച്ചുകഴിഞ്ഞ ശേഷമേ ബഹിരാകാശ യാത്രയ്ക്ക് മുമ്പുള്ള ശാരീരിക അവസ്ഥയിലേക്ക് യാത്രികള്‍ മടങ്ങിവരുകയുള്ളൂ. നാസയുടെ വിദഗ്ധ ഡോക്ടര്‍മാരുടെ അനുമതിക്ക് ശേഷം മാത്രമെ യാത്രികരെ ആശുപത്രിയില്‍ നിന്ന് വിടുതല്‍ ചെയ്യുകയുള്ളൂ.

ബഹിരാകാശ വാസത്തിന് ശേഷം ഭൂമിയിലെത്തിയ സുനിത വില്യംസ് കുടുംബത്തിനും സുഹൃത്തുക്കള്‍ക്കും ഒപ്പം സമയം ചെലവിടുമെന്നാണ് അറിയുന്നത്.

NASA Astronauts Sunita Williams & Butch Wilmore Return Safely After 9-Month Space Mission

NASA astronauts Sunita Williams and Butch Wilmore safely return to Earth after a nine-month space mission. Undergoing intensive medical evaluations, they focus on post-flight rehabilitation before reuniting with family.