ഇന്ത്യൻ പ്രീമിയർ ലീഗിന്റെ പതിനെട്ടാം സീസണിനായുള്ള കാത്തിരിപ്പിലാണ് ഇന്ത്യൻ ക്രിക്കറ്റ് ആരാധകർ. മാർച്ച് ൨൨നാണ് ഇന്ത്യൻ ക്രിക്കറ്റ് മാമാങ്കത്തിന് തുടക്കമാവുന്നത്. ടൂർണമെന്റിലെ ആദ്യ മത്സരത്തിൽ ഡിഫൻഡിങ് ചാമ്പ്യൻമാരായ കൊൽക്കത്ത നൈറ്റ് റൈഡേഴ്‌സ് റോയൽ ചലഞ്ചേഴ്‌സ് ബാംഗ്ലൂരിനെയാണ് നേരിടുന്നത്. ഇപ്പോൾ 2025 ഐപിഎല്ലിലെ തന്റെ വലിയ ലക്ഷ്യത്തെക്കുറിച്ച് സംസാരിക്കുകയാണ് ഇന്ത്യൻ താരം ശ്രേയസ് അയ്യർ. പഞ്ചാബ് കിങ്സിന് വേണ്ടി ആദ്യ ഐപിഎൽ കിരീടം നേടികൊടുക്കുകയാണ് തന്റെ ലക്ഷ്യമെന്നാണ് അയ്യർ വ്യക്തമാക്കിയത്. പഞ്ചാബിന്റെ ചരിത്രനേട്ടം സ്വന്തമാക്കാൻ സാധിക്കുമെന്നും അയ്യർ പറഞ്ഞു. 

''ലേലത്തിൽ എന്നെ പഞ്ചാബ് തെരഞ്ഞെടുത്തത് മുതൽ എന്റെ ആഗ്രഹം അതായിരുന്നു. പഞ്ചാബ് കിങ്‌സ് ഇതുവരെ കിരീടം നേടിയിട്ടില്ല. അവർക്കായി കിരീടം ഉയർത്തുക എന്നതാണ് എന്റെ ലക്ഷ്യം. ഇതൊരു ചരിത്ര നേട്ടമായിരിക്കും. അവരുടെ ആരാധകരെ സന്തോഷിപ്പിക്കാനും അവർക്ക് ആഘോഷിക്കാനും അവസരം നൽകാൻ ഞാൻ ആഗ്രഹിക്കുന്നു'' ജിയോ ഹോട്സ്റ്റാറിന് നൽകിയ അഭിമുഖത്തിൽ പറഞ്ഞു. 

ഐപിഎൽ മെഗാ ലേലത്തിൽ 26.5 കോടിക്കായിരുന്നു ശ്രേയസിനെ പഞ്ചാബ് സ്വന്തമാക്കിയിരുന്നത്. ഐപിഎൽ ചരിത്രത്തിൽ ലേലത്തിൽ ഒരു താരത്തിന് ലഭിക്കുന്ന ഏറ്റവും ഉയർന്ന രണ്ടാമത്തെ തുക കൂടിയാണിത്. ഐപിഎഎല്ലിൽ മാർച്ച് 25നാണ് പഞ്ചാബ് കിങ്സിന്റെ ആദ്യ മത്സരം. ഗുജറാത്ത് ടൈറ്റൻസാണ് പഞ്ചാബിന്റെ എതിരാളികൾ. 

അടുത്തിടെ അവസാനിച്ച ഐസിസി ചാമ്പ്യൻസ് ട്രോഫിയിൽ ഇന്ത്യക്കായി മികച്ച പ്രകടനമായിരുന്നു അയ്യർ പുറത്തെടുത്തത്. ടൂർണമെന്റിൽ  അഞ്ചു മത്സരങ്ങളിൽ നിന്നും 243 റൺസാണ് അയ്യർ അടിച്ചെടുത്തത്. 60.75 എന്ന മികച്ച ആവറേജിൽ രണ്ട് അർദ്ധ സെഞ്ച്വറികളാണ് അയ്യർ നേടിയത്. ടൂർണമെന്റിൽ ഇന്ത്യക്കായി ഏറ്റവും കൂടുതൽ റൺസ് നേടിയ താരവും അയ്യർ തന്നെയാണ്. 2023 ഐസിസി ഏകദിന ലോകകപ്പിലും തകർപ്പൻ പ്രകടനമായിരുന്നു ശ്രേയസ് അയ്യർ നടത്തിയിരുന്നത്. ഇന്ത്യയെ ആ ടൂർണമെന്റിൽ ഫൈനലിൽ എത്തിക്കുന്നതിൽ അയ്യർ വഹിച്ച പങ്ക് വളരെ വലുതായിരുന്നു. ടൂർണമെന്റിൽ 530 റൺസ് ആയിരുന്നു താരം അടിച്ചെടുത്തത്. താരത്തിന്റെ ഈ മിന്നും പ്രകടനം ഇന്ത്യൻ പ്രീമിയർ ലീഗിലും കാണാനാവുമെന്നാണ് ആരാധകർ പ്രതീക്ഷിക്കുന്നത്. 

shreyas iyer talks he want to lift ipl trophy with punjab kings in 2025