പൂനെ: ശമ്പളം കുറച്ചതിൽ പ്രതിഷേധിച്ച് ഡ്രൈവർ ബസിന് തീകൊളുത്തിയ സംഭവത്തിൽ നാല് ജീവനക്കാർക്ക് ദാരുണാന്ത്യം. പൂനെയിലെ ഹിഞ്ചവാഡി പ്രദേശത്ത് വ്യോമ ഗ്രാഫിക്സ് കമ്പനിയുടെ മിനിബസിലാണ് തീപിടിത്തം ഉണ്ടായത്. ജനാർദൻ ഹംബർദേക്കർ എന്ന ഡ്രൈവറാണ് അപകടത്തിന് പിന്നിലെന്ന് പൊലീസ് സ്ഥിരീകരിച്ചു.

കരുതിക്കൂട്ടിയുള്ള പ്രതികാര നടപടി പ്രകാരമാണ് അപകടം എന്ന് ഡെപ്യൂട്ടി പൊലീസ് കമ്മീഷണർ വിശാൽ ഗെയ്‌ക്‌വാഡ് വ്യക്തമാക്കി. ഹംബർദേക്കറിന് ശമ്പളം കുറച്ചതിൽ അതൃപ്തിയുണ്ടായിരുന്നതായും, അതിനാൽ ബെൻസീൻ കൊണ്ടുവന്ന് ബസിന് തീകൊളുത്തിയതായും അന്വേഷണത്തിൽ വ്യക്തമായതായി റിപ്പോർട്ടുകൾ സൂചിപ്പിക്കുന്നു.

ബുധനാഴ്ച രാവിലെ 14 ജീവനക്കാരുമായി ബസ് ജോലിസ്ഥലത്തേക്ക് പോകുമ്പോഴാണ് സംഭവം.പ്രതി ബെൻസീൻ എന്ന ഉയർന്ന സ്ഫോടക ശേഷിയുള്ള രാസവസ്തു കയ്യിൽ കരുതിയിരുന്നു. ടോണറുകൾ തുടയ്ക്കാൻ ഉപയോഗിക്കുന്ന ഒരു തുണിയും അയാൾ ബസിൽ സൂക്ഷിച്ചിരുന്നു. ബസ് ഹിഞ്ചവാഡിക്ക് സമീപം എത്തിയപ്പോൾ പ്രതി സൂക്ഷിച്ചിരുന്ന ബെൻസീൻ നിറച്ച തുണിയിൽ ഡ്രൈവർ തീപിടിപ്പിച്ച് ബസിൽ ഇടുകയായിരുന്നു. അതിനുശേഷം ഓടുന്ന ബസിൽ നിന്ന് ചാടി രക്ഷപ്പെട്ടു.

ശങ്കർ ഷിൻഡെ (63),രാജൻ ചവാൻ (42),ഗുരുദാസ് ലോകരെ (45),സുഭാഷ് ഭോസാലെ (44) എന്നിവരാണ് അപകടത്തിൽ മരണപ്പെട്ടത്.
ഇവർ ബസിന്റെ പിന്നിൽ ഇരിക്കുകയായിരുന്നു, അതിനാൽ എമർജൻസി എക്സിറ്റ് തുറക്കാനാകാതെ വെന്തുമരിക്കുകയായിരുന്നു. കൂടാതെ 6 പേർക്ക് പൊള്ളലേറ്റു, വരും ദിവസങ്ങളിൽ കൂടുതൽ വിവരങ്ങൾ പുറത്ത് വരുമെന്ന് പോലീസ് അറിയിച്ചു.പ്രതി ആശുപത്രിയിൽ ചികിത്സയിലാണ്, വരും ദിവസങ്ങളിൽ അറസ്റ്റ് ചെയ്യുമെന്ന് പോലീസ് വ്യക്തമാക്കി. അന്വേഷണം തുടരുകയാണ്.

A bus driver in Pune set his vehicle on fire in protest against a salary cut, resulting in the tragic death of four people. The incident has sparked outrage, with authorities launching an investigation into the motive and circumstances surrounding the act.